水利气象部完成公务员普查 900余名官员参与改革

ក្រសួងធនធានទឹក និងឧតុនិយម បិទបញ្ចប់យុទ្ធនាការជំរឿនមន្ត្រីជាក់ស្តែង ប្រកបដោយផ្លែផ្កាជាវិជ្ជមាន យុទ្ធនាការជំរឿនមន្ត្រីជាក់ស្តែងនៅក្នុងក្របខ័ណ្ឌក្រសួងធនធានទឹក និងឧតុនិយម បានបញ្ចប់ដោយជោគជ័យ នៅទីស្តីការក្រសួង។ ក្រសួងធនធានទឹក និងឧតុនិយម គឺជាស្ថាប័នថ្នាក់ជាតិទី១៩ ដែលបានអនុវត្តយុទ្ធនាការជំរឿនមន្ត្រីជាក់ស្តែង ក្រោមការសម្របសម្រួលពី គណៈកម្មការបច្ចេកទេសនៃក្រសួងមុខងារសាធារណៈ។ ក្នុងដំណើរការនៃយុទ្ធនាការនេះ ថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាគ្រប់លំដាប់ថ្នាក់នៃក្រសួងធនធានទឹក និងឧតុនិយម ប្រមាណជាង ៩០០នាក់ បានចូលរួមបំពេញកាតព្វកិច្ចយ៉ាងសកម្ម និងប្រកបដោយទំនុកចិត្តខ្ពស់ ដោយគ្មានការព្រួយបារម្ភឡើយ។ ការចូលរួមនេះ ស្តែងឱ្យឃើញពីស្មារតីទទួលខុសត្រូវខ្ពស់ សាមគ្គីភាពឯកភាពផ្ទៃក្នុង និងការយល់ដឹងច្បាស់លាស់អំពីសារៈសំខាន់ជាយុទ្ធសាស្ត្រ នៃការកែទម្រង់រដ្ឋបាលសាធារណៈរបស់រាជរដ្ឋាភិបាល។ ក្រសួងមុខងារសាធារណៈ ក្នុងនាមគណៈកម្មការធ្វើបច្ចុប្បន្នភាពរចនាសម្ព័ន្ធ និងជំរឿនមន្ត្រីជាក់ស្តែងនៅតាមរចនាសម្ព័ន្ធក្រសួង ស្ថាប័នចំណុះអង្គការនីតិប្រតិបត្តិ សូមសម្តែងនូវការកោតសរសើរ និងថ្លែងអំណរគុណយ៉ាងជ្រាលជ្រៅបំផុតចំពោះថ្នាក់ដឹកនាំ មន្ត្រីរាជការ និងមន្ត្រីជាប់កិច្ចសន្យាទាំងអស់ ដែលបានមកចូលរួមបំពេញកាតព្វកិច្ចដោយស្មារតីទទួលខុសត្រូវខ្ពស់ ប្រកបដោយសាមគ្គីភាព និងយល់ដឹងច្បាស់ពីសារៈសំខាន់នៃយុទ្ធនាការនេះ៕