柬埔寨卫生部出席第21届消化系统医学年会 聚焦专科发展

សន្និបាតវិទ្យាសាស្ត្រប្រចាំឆ្នាំ លើកទី២១ របស់សមាគមគ្រូពេទ្យកម្ពុជា ផ្នែកប្រដាប់រំលាយអាហារ។ —— រាជធានីភ្នំពេញ៖ ថ្ងៃទី២៤ ខែតុលា ឆ្នាំ២០២៦ ឯកឧត្តមសាស្ត្រាចារ្យ ឡឹម តារា រដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈគ្រូពេទ្យជាតិ បានអញ្ជើញជាអធិបតី ក្នុងពិធីបើកសន្និបាតវិទ្យាសាស្ត្រប្រចាំឆ្នាំ លើកទី២១ របស់សមាគមគ្រូពេទ្យកម្ពុជា ផ្នែកប្រដាប់រំលាយអាហារ ដែលប្រព្រឹត្តទៅនៅសណ្ឋាគារភ្នំពេញ រាជធានីភ្នំពេញ។   ក្នុងឱកាសនោះ ឯកឧត្តមសាស្ត្រាចារ្យបានសម្តែងការអបអរសាទរ និងវាយតម្លៃខ្ពស់ចំពោះសមាគមគ្រូពេទ្យកម្ពុជា ផ្នែកប្រដាប់រំលាយអាហារ ដែលបានបន្តរួមចំណែកយ៉ាងសកម្មក្នុងការអភិវឌ្ឍវិស័យឯកទេសក្រពះ ពោះវៀន ថ្លើម និងជំងឺរន្ធបាត តាមរយៈការបណ្តុះបណ្តាល ការស្រាវជ្រាវ ការផ្លាស់ប្តូរចំណេះដឹង និងការពង្រឹងកិច្ចសហប្រតិបត្តិការជាតិ និងអន្តរជាតិ។   ឯកឧត្តមសាស្ត្រាចារ្យបានគូសបញ្ជាក់ថា វិស័យឯកទេសក្រពះ ពោះវៀន ថ្លើម និងជំងឺរន្ធបាត គឺជាផ្នែកដ៏សំខាន់មួយនៃប្រព័ន្ធសុខាភិបាល ដោយសារជំងឺទាំងនេះអាចប៉ះពាល់យ៉ាងខ្លាំងដល់សុខភាព សមត្ថភាពការងារ ជីវភាពរស់នៅ និងគុណភាពជីវិតរបស់ប្រជាពលរដ្ឋ។ ដូច្នេះ ការពង្រឹងសមត្ថភាពអ្នកជំនាញ និងការអភិវឌ្ឍសេវាព្យាបាលប្រកបដោយគុណភាព គឺជាកត្តាចាំបាច់ក្នុងការឆ្លើយតបទៅនឹងតម្រូវការសុខភាពរបស់ប្រជាជន។   ពាក់ព័ន្ធនឹងប្រធានបទសំខាន់ៗនៃសន្និបាតស្តីពី «សុខភាពថ្លើម» និង «ទស្សនវិស័យពហុឯកទេស និងការវិវឌ្ឍថ្មីៗក្នុងវិស័យជំងឺប្រដាប់រំលាយអាហារ» ឯកឧត្តមសាស្ត្រាចារ្យបានលើកឡើងថា ការរីកចម្រើនក្នុងវិស័យវេជ្ជសាស្ត្រ មិនមែនពឹងផ្អែកតែលើបច្ចេកវិទ្យា និងឧបករណ៍ទំនើបប៉ុណ្ណោះទេ ប៉ុន្តែថែមទាំងត្រូវការវិធីសាស្ត្រព្យាបាលថ្មីៗ ការអនុវត្តវេជ្ជសាស្ត្រផ្អែកលើភស្តុតាងវិទ្យាសាស្ត្រ និងកិច្ចសហការរវាងអ្នកជំនាញពហុឯកទេស ដើម្បីធានាបាននូវគុណភាព សុវត្ថិភាព ប្រសិទ្ធភាព និងមនុស្សធម៌ក្នុងការថែទាំអ្នកជំងឺ។ ឯកឧត្តមសាស្ត្រាចារ្យក៏បានលើកទឹកចិត្តឱ្យសន្និបាតវិទ្យាសាស្ត្រនេះ ក្លាយជាវេទិកាដ៏មានសារៈសំខាន់ សម្រាប់ការពិភាក្សា ការផ្លាស់ប្តូរបទពិសោធន៍ ការចែករំលែកលទ្ធផលស្រាវជ្រាវ និងការបង្កើតគំនិតថ្មីៗ ដែលអាចយកទៅអនុវត្តជាក់ស្តែង ដើម្បីលើកកម្ពស់ប្រសិទ្ធភាព នៃការធ្វើរោគវិនិច្ឆ័យ ការព្យាបាល និងការថែទាំអ្នកជំងឺ។   ជាមួយគ្នានេះ ឯកឧត្តមសាស្ត្រាចារ្យបានផ្តាំផ្ញើដល់គ្រូពេទ្យឯកទេសវ័យក្មេង វេជ្ជបណ្ឌិតកំពុងបន្តការសិក្សា និងអ្នកស្រាវជ្រាវទាំងអស់ ឱ្យខិតខំបន្តអភិវឌ្ឍចំណេះដឹង និងជំនាញវិជ្ជាជីវៈ តាមរយៈការសិក្សាស្រាវជ្រាវ ការអនុវត្តជាក់ស្តែង និងការរៀនសូត្រជាបន្តបន្ទាប់ ព្រមទាំងប្រកាន់ខ្ជាប់នូវក្រមសីលធម៌វិជ្ជាជីវៈ និងការទទួលខុសត្រូវខ្ពស់ចំពោះអ្នកជំងឺ។   ឯកឧត្តមសាស្ត្រាចារ្យបានសង្កត់ធ្ងន់បន្ថែមថា ការអភិវឌ្ឍវិស័យឯកទេសនេះ ទាមទារឱ្យមានកិច្ចសហការយ៉ាងជិតស្និទ្ធរវាងសមាគមវិជ្ជាជីវៈ ស្ថាប័នបណ្តុះបណ្តាល មន្ទីរពេទ្យ អ្នកជំនាញ និងដៃគូជាតិ និងអន្តរជាតិ ដើម្បីពង្រឹងគុណភាពនៃការបណ្តុះបណ្តាល ការស្រាវជ្រាវ និងការផ្តល់សេវាសុខាភិបាលឱ្យកាន់តែប្រសើរឡើង។ ជាចុងក្រោយ ឯកឧត្តមសាស្ត្រាចារ្យបានអំពាវនាវដល់សមាជិកសមាគម និងអ្នកប្រកបវិជ្ជាជីវៈសុខាភិបាលទាំងអស់ ឱ្យបន្តសហការគ្នាលើកកម្ពស់ចំណេះដឹង ជំនាញ សីលធម៌វិជ្ជាជីវៈ គុណភាព និងសុវត្ថិភាពអ្នកជំងឺ ដើម្បីរួមចំណែកអភិវឌ្ឍវិស័យសុខាភិបាល និងលើកកម្ពស់គុណភាពជីវិតរបស់ប្រជាពលរដ្ឋកម្ពុជា។ គួរបញ្ជាក់ផងដែរថា សន្និបាតវិទ្យាសាស្ត្រប្រចាំឆ្នាំលើកទី២១ នេះ មានការចូលរួមពីវាគ្មិនជាតិ និងអន្តរជាតិដែលមានបទពិសោធន៍ និងជំនាញខ្ពស់ជាច្រើនរូប ព្រមទាំងសាស្ត្រាចារ្យ វេជ្ជបណ្ឌិត អ្នកជំនាញ និងអ្នកចូលរួមសរុបប្រមាណ ៣០០នាក់។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)