柬埔寨司法部举办反洗钱金融调查培训 提升跨境执法能力

លោកជំទាវ សុន សុខាលីដា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអយ្យការ និងព្រហ្មទណ្ឌ បានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលស្ដីពី កិច្ចសហប្រតិបត្ដិការអន្ដរជាតិ និងការស៊ើបអង្កេតហិរញ្ញវត្ថុក្នុងសំណុំរឿងសម្អាតប្រាក់ ==================== នារសៀល ថ្ងៃព្រហស្បតិ៍ ១១កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២២ ខែតុលា ឆ្នាំ២០២៦ ដោយទទួលបានការអនុញ្ញាតដ៏ខ្ពង់ខ្ពស់ ពីឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, លោកជំទាវ សុន សុខាលីដា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអយ្យការ និងព្រហ្មទណ្ឌ បានអញ្ជើញចូលរួមជាអធិបតីក្នុងពិធីបិទវគ្គបណ្ដុះបណ្ដាលស្ដីពី កិច្ចសហប្រតិបត្ដិការអន្ដរជាតិ និងការស៊ើបអង្កេតហិរញ្ញវត្ថុក្នុងសំណុំរឿងសម្អាតប្រាក់ នៅសណ្ឋាគារ សាន់អេនម៉ូន (Sun&Moon) រាជធានីភ្នំពេញ។ ការរៀបចំវគ្គបណ្ដុះបណ្ដាលនេះ ត្រូវបានរៀបចំឡើងក្នុងក្របខណ្ឌនៃកិច្ចសហប្រតិបត្តិការរវាងក្រសួងយុត្តិធម៌ និងការិយាល័យអង្គការសហប្រជាជាតិទទួលបន្ទុកកម្មវិធីគ្រឿងញៀន និងឧក្រិដ្ឋកម្ម (UNODC)។ វគ្គបណ្តុះបណ្តាលមានការចូលរួមធ្វើបទបង្ហាញពីវាគ្មិនដែលជាអ្នកជំនាញជាតិ និងអន្តរជាតិ។ តាមរយៈវគ្គបណ្តុះបណ្តាលទាំងបីថ្ងៃនេះ សិក្ខាកាមបានស្វែងយល់អំពីបច្ចេកទេសនៃការស៊ើបអង្កេតហិរញ្ញវត្ថុ និងការប្រើប្រាស់យន្តការកិច្ចសហប្រតិបត្តិការអន្តរជាតិ ទាំងយន្តការផ្លូវការ និងក្រៅផ្លូវការ ព្រមទាំងការអនុវត្តជាក់ស្តែងក្នុងករណីសិក្សា ដើម្បីគាំទ្រដល់ការស៊ើបអង្កេតឆ្លងដែន។ វគ្គបណ្តុះបណ្តាលនេះ មានការអញ្ជើញចូលរួមពី ចៅក្រម ព្រះរាជអាជ្ញា, តំណាងក្រសួងយុត្តិធម៌, តំណាងអង្គភាពស៊ើបការណ៍ហិរញ្ញវត្ថុកម្ពុជា, តំណាងអគ្គស្នងការដ្ឋាននគរបាលជាតិ, តំណាងអគ្គនាយកដ្ឋានគយ និងរដ្ឋាករ, តំណាងបណ្ឌិត្យសភាភូមិន្ទយុត្តិធម៌កម្ពុជា រួមជាមួយតំណាងស្ថាប័នពាក់ព័ន្ធក្នុងការប្រឆាំងការសម្អាតប្រាក់ សរុបជាង ៤០រូប។