劳工部举办性别平等培训 聚焦纺织业女性权益保障

ក្រសួងការងារ បើកវគ្គបណ្តុះបណ្តាលស្តីពី «ការលើកកម្ពស់សមធម៌យេនឌ័រ និងការងារដែលគិតគូរលើការថែទាំ» (ភ្នំពេញ)៖ នៅព្រឹកថ្ងៃទី២៤ ខែមិថុនា ឆ្នាំ២០២៦ លោកជំទាវ សុវណ្ណ វណ្ណារតន៍ រដ្ឋលេខាធិការប្រចាំការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ អញ្ជើញជាអធិបតីក្នុងពិធីបើកវគ្គបណ្តុះបណ្តាលស្តីពី «ការលើកកម្ពស់សមធម៌យេនឌ័រ និងការងារដែលគិតគូរលើការថែទាំ» ដោយមានការអញ្ជើញចូលរួមពីមន្រ្តីក្រសួងការងារនិងបណ្តុះបណ្តាលវិជ្ជាជីវ: និងមន្ទីរការងារនិងបណ្តុះបណ្តាលវិជ្ជាជីវៈរាជធានី-ខេត្ត ប្រមាណ ៣៥នាក់ នៅសណ្ឋាគារ Sun & Moon Riverside រាជធានីភ្នំពេញ។ វគ្គបណ្តុះបណ្តាលនេះ រៀបចំឡើងដោយកិច្ចសហប្រតិបត្តិការនៃការអនុវត្តអនុស្សរណៈយោគយល់គ្នា លើកទី៨ សម្រាប់ឆ្នាំ២០២៣-២០២៧ រវាងក្រសួងការងារនិងបណ្តុះបណ្តាលវិជ្ជាជីវៈ និងគម្រោងរោងចក្រកាន់តែប្រសើរនៅកម្ពុជា (ILO-BFC) ក្នុងគោលបំណងពង្រឹងការយល់ដឹង និងសមត្ថភាពរបស់មន្ត្រីក្រសួងការងារនិងបណ្តុះបណ្តាលវិជ្ជាជីវៈ លើបញ្ហាសមភាពយេនឌ័រ ការទប់ស្កាត់ការរើសអើង និងអំពើហិង្សាផ្អែកលើយេនឌ័រនៅកន្លែងធ្វើការ ព្រមទាំងការលើកកម្ពស់ការងារថែទាំដែលមានលក្ខណៈបរិយាបន្ន និងប្រកបដោយសមធម៌។ លោកជំទាវក៏បានថ្លែងអំណរគុណចំពោះអង្គការអន្តរជាតិខាងការងារ (ILO) និងគម្រោងរោងចក្រកាន់តែប្រសើរនៅកម្ពុជាដែលបានបន្តគាំទ្រកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការលើកកម្ពស់សមភាពយេនឌ័រ និងការងារសមរម្យនៅកន្លែងធ្វើការ។ លោកជំទាវបានគូសបញ្ជាក់ថា វិស័យវាយនភណ្ឌ កាត់ដេរ  ផលិតស្បែកជើង និង​ផលិតផលិតផលធ្វើដំណើរ និងកាបូប គឺជាវិស័យស្នូលមួយនៃសេដ្ឋកិច្ចកម្ពុជា ដែលផ្តល់ការងារដល់កម្មករ-និយោជិតរាប់លាននាក់ ក្នុងនោះស្ត្រីមានចំនួនជាង ៧០ភាគរយ នៃកម្មករ-និយោជិតសរុប។ ការចូលរួមរបស់ស្ត្រីក្នុងវិស័យនេះ បានរួមចំណែកដល់កំណើនសេដ្ឋកិច្ច លើកកម្ពស់ជីវភាពគ្រួសារ កាត់បន្ថយភាពក្រីក្រ និងពង្រឹងការអភិវឌ្ឍសង្គម ប៉ុន្តែនៅតែមានបញ្ហាប្រឈមពាក់ព័ន្ធនឹងយេនឌ័រ ដូចជា ការរើសអើង ការបៀតបៀនផ្លូវភេទ ភាពមិនស្មើគ្នាក្នុងឱកាសដឹកនាំ និងបន្ទុកការងារថែទាំក្នុងគ្រួសារដែលភាគច្រើនធ្លាក់លើស្ត្រី។ ទន្ទឹមនេះ លោកជំទាវបានសង្កត់ធ្ងន់ថា កម្ពុជាត្រូវបន្តយកចិត្តទុកដាក់លើ «ការងារថែទាំ» តាមរយៈការចែករំលែកការទទួលខុសត្រូវក្នុងការងារថែទាំ ការពង្រីកសេវាថែទាំដែលមានគុណភាព និងការបង្កើតគោលនយោបាយគាំទ្រគ្រួសារ។ លោកជំទាវក៏បានអំពាវនាវដល់មន្ត្រីពាក់ព័ន្ធ ដៃគូអភិវឌ្ឍន៍ និងភាគីពាក់ព័ន្ធទាំងអស់ បន្តពង្រឹងការអនុវត្តច្បាប់ កសាងសមត្ថភាព និងរួមគ្នាលើកកម្ពស់សមភាពយេនឌ័រ ដើម្បីធានាថាកំណើនសេដ្ឋកិច្ចរបស់កម្ពុជាមានលក្ខណៈបរិយាបន្ន និងមិនទុកនរណាម្នាក់ចោល។ បន្ថែមពីនេះ លោកជំទាវសង្ឃឹមយ៉ាងមុតមាំថា វគ្គបណ្តុះបណ្តាលរយៈពេលពីរថ្ងៃ ចាប់ពីថ្ងៃទី២៤-២៥ ខែមិថុនានេះ ផ្តល់ចំណេះដឹង បទពិសោធ និងគំនិតថ្មីៗដល់អ្នកចូលរួមទាំងអស់ ដើម្បីចូលរួមក្នុងការផ្សព្វផ្សាយ និងពង្រឹងការអនុវត្តច្បាប់ប្រកបដោយប្រសិទ្ធភាព៕ #MLVT #HENGSour