卫生部部署第20届法语国家峰会医疗团队

កិច្ចប្រជុំពិនិត្យវឌ្ឍនភាពការងារ និងការត្រៀមរៀបចំក្រុមគ្រូពេទ្យប្រចាំការតាមគោលដៅនីមួយៗ ដើម្បីធានាសុវត្ថិភាពសុខភាពសាធារណៈ សម្រាប់ការត្រៀមក្នុងកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦។ —— រាជធានីភ្នំពេញ៖ រសៀលថ្ងៃចន្ទ ទី០២ ខែវិច្ឆិកា ឆ្នាំ២០២៦ លោកជំទាវវេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងជាប្រធានអនុគណៈកម្មការទី៧៖ សុខាភិបាល បានដឹកនាំកិច្ចប្រជុំ ដើម្បីពិនិត្យវឌ្ឍនភាពការងារ និងការត្រៀមរៀបចំក្រុមគ្រូពេទ្យប្រចាំការតាមគោលដៅនីមួយៗ សម្រាប់បម្រើការងារក្នុងឱកាសកិច្ចប្រជុំកំពូលហ្វ្រង់កូហ្វូនីលើកទី២០ ឆ្នាំ២០២៦។ គោលបំណង នៃកិច្ចប្រជុំនេះ ដើម្បីពិនិត្យ និងជម្រាបជូនអំពីការបែងចែកគោលដៅប្រចាំការ ការកំណត់តួនាទី និងភារកិច្ចរបស់ក្រុមការងារនីមួយៗ ព្រមទាំងការត្រៀមរៀបចំឧបករណ៍ បរិក្ខារ និងសម្ភារវេជ្ជសាស្ត្រចាំបាច់ ដើម្បីធានាឱ្យការផ្តល់សេវា និងការថែទាំសុខភាពជូនគណៈប្រតិភូ និងអ្នកចូលរួមប្រកបដោយប្រសិទ្ធភាព និងទាន់ពេលវេលា។ ក្នុងឱកាសនេះ លោកជំទាវរដ្ឋលេខាធិការ បានផ្តល់អនុសាសន៍ណែនាំដល់មន្ត្រីរាជការ បុគ្គលិកសុខាភិបាល និងក្រុមគ្រូពេទ្យទាំងអស់ ដែលត្រូវចុះបំពេញការងារតាមគោលដៅនីមួយៗ ឱ្យយកចិត្តទុកដាក់ខ្ពស់ អនុវត្តតួនាទី និងភារកិច្ចដែលបានប្រគល់ជូនឱ្យបានត្រឹមត្រូវ។ ជាពិសេស ត្រូវពង្រឹងការប្រុងប្រយ័ត្ន ការតាមដាន និងការឆ្លើយតបចំពោះជំងឺឆ្លងនានា ជាពិសេសជំងឺអេបូឡា ជំងឺគ្រុនចាញ់ និងជំងឺគ្រុនលឿងជាដើម។ កិច្ចប្រជុំនេះក៏មានការអញ្ជើញចូលរួមពីលោកឱសថការី ហ៊ុន ហួង អគ្គនាយករងបច្ចេកទេសសុខាភិបាល ឯកឧត្តមវេជ្ជបណ្ឌិត ងី ម៉េងហេង ប្រធានមន្ទីរសុខាភិបាលរាជធានីភ្នំពេញ និងលោក លោកស្រី ជាគ្រូពេទ្យតំណាងមន្ទីរពេទ្យជាតិ តេជោសន្តិភាព មន្ទីរពេទ្យជាតិព្រះអង្គឌួង មន្ទីរពេទ្យមិត្តភាពខ្មែរ-សូវៀត មន្ទីរពេទ្យមិត្តភាពកម្ពុជា-ចិន ព្រះកុសុមៈ ព្រមទាំងក្រុមការងារពាក់ព័ន្ធផងដែរ។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)