柬媒质疑泰方单方面展示奥斯马边境地带真实性

**ការសម្ដែងអាចបំភាន់អ្នកមើលបាន ប៉ុន្តែមិនអាចបំភាន់ភ្នែកអ្នកសង្កេតការណ៍អាស៊ានបានឡើយ ** __ដោយ៖លោកតា__ ចំពោះការរៀបចំដំណើរទស្សនកិច្ចរបស់ភាគីថៃទៅកាន់តំបន់ O’Smach ហើយបង្ហាញទីតាំងមួយចំនួនថាជា “មជ្ឈមណ្ឌល Scam Online” និងបង្ហាញទីតាំងយោធាដើម្បីបកស្រាយថា ការគ្រប់គ្រងតំបន់របស់ខ្លួនគឺជាការការពារខ្លួន យើងគួរតែសួរយ៉ាងសាមញ្ញថា៖ តើការបង្ហាញដោយភាគីម្ខាង គឺស្មើនឹងការពិតដែលបានផ្ទៀងផ្ទាត់រួចហើយឬ? អតីតកាល យើងធ្លាប់ឃើញខ្សែភាពយន្ត និងរឿងភាគថៃជាច្រើន ដែលសុទ្ធតែជាការសម្ដែង។ ប៉ុន្តែពេលនេះ យើងហាក់ដូចជាកំពុងឃើញ “ឆាកសម្ដែង” មួយទៀត ដែលតួអង្គមិនមែននៅលើកញ្ចក់ទូរទស្សន៍ទេ ប៉ុន្តែស្ថិតនៅលើឆាកនយោបាយ និងព័ត៌មានអន្តរជាតិ។ ប៉ុន្តែសូមកុំភ្លេចថា ក្រុមអ្នកសង្កេតការណ៍អាស៊ាន (AOT) មិនមែនជាអ្នកទស្សនាភាពយន្តដែលគ្រាន់តែមើលតាមសាច់រឿងដែលអ្នករៀបចំឱ្យមើលនោះទេ។ ពួកគេមានភារកិច្ចសង្កេត ប្រមូលព័ត៌មាន និងវាយតម្លៃដោយខ្លួនឯង។ ភ្នែករបស់អ្នកសង្កេតការណ៍ មិនមែនជាភ្នែកដែលបិទដោយការរៀបចំឆាកឡើយ។ “តើអ្វីដែលគេបង្ហាញ អាចឆ្លងកាត់ការផ្ទៀងផ្ទាត់ដោយឯករាជ្យបានឬទេ?” ព្រោះនៅចុងក្រោយ ប្រវត្តិសាស្ត្រមិនកត់ត្រាតាមសាច់រឿងដែលអ្នកណាម្នាក់សរសេរឱ្យទេ—វាកត់ត្រាតាមអ្វីដែលអាចបញ្ជាក់បាន។