公务员部代表出席吊唁活动 慰问逝者家属

ប្រតិភូក្រសួងមុខងារសាធារណៈ អញ្ជើញចូលរួមគោរពវិញ្ញាណក្ខន្ធ ឧបាសក គង់ តារា នារសៀលថ្ងៃទី២៥ ខែសីហា ឆ្នាំ២០២៦ លោកជំទាវ ដៀប ចាន់សុភា អនុរដ្ឋលេខាធិការក្រសួងមុខងារសាធារណៈ បានអញ្ជើញជាតំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ ដឹកនាំប្រតិភូក្រសួង អញ្ជើញចូលរួមគោរពវិញ្ញាណក្ខន្ធ ឧបាសក គង់ តារា ត្រូវជាឪពុកបង្កើតរបស់លោក គង់តារា ផល្គុន ប្រធាននាយកដ្ឋានត្រួតពិនិត្យ និងវាយតម្លៃ នៃក្រសួងមុខងារសាធារណៈ ដែលបានទទួលអនិច្ចកម្មកាលពីថ្ងៃអាទិត្យ ទី២៣ ខែសីហា ឆ្នាំ២០២៦ ក្នុងជន្មាយុ ៨៦វស្សា ដោយជរាពាធ។ ក្នុងពិធីប្រកបដោយសេចក្តីក្តុកក្តួលនោះ លោកជំទាវអនុរដ្ឋលេខាធិការ និងប្រតិភូទាំងអស់ បានអញ្ជើញអុជធូប និងសម្តែងនូវការសោកស្តាយស្រណោះអាឡោះអាល័យជាទីបំផុត។ ជាមួយគ្នានេះ លោកជំទាវ ក៏បាននាំយកនូវសារលិខិតរំលែកទុក្ខ និងការសួរសុខទុក្ខប្រកបដោយសមានចិត្តជ្រាលជ្រៅពីសំណាក់ ឯកឧត្តមឧបនាយករដ្ឋមន្ត្រី ហ៊ុន ម៉ានី និងលោកជំទាវ ជូនចំពោះ លោក គង់តារា ផល្គុន ព្រមទាំងក្រុមគ្រួសារសពផងដែរ។ មរណភាពរបស់ ឧបាសក គង់ តារា គឺជាការបាត់បង់ដ៏ធំធេងនូវលោកឪពុកបង្កើត ឪពុកក្មេក និងជាជីតាដែលមានគុណូបការៈដ៏ជ្រាលជ្រៅ ក្នុងការចិញ្ចឹមបីបាច់ថែរក្សា និងអប់រំណែនាំកូនចៅ ប្រកបដោយព្រហ្មវិហារធម៌ រហូតក្លាយជាធនធានមនុស្សដ៏ល្អ និងជាមន្ត្រីរាជការដ៏មានសមត្ថភាពក្នុងបម្រើជាតិមាតុភូមិ។ តាងនាមថ្នាក់ដឹកនាំ និងមន្ត្រីរាជការទាំងអស់នៃក្រសួងមុខងារសាធារណៈ ប្រតិភូសូមឧទ្ទិសបួងសួងដល់ដួងវិញ្ញាណក្ខន្ធ ឧបាសក គង់ តារា សូមបានទៅកាន់សុគតិភព កុំបីឃ្លៀងឃ្លាតឡើយ៕