公务部核查波罗勉省教育人员数据 确保行政透明

គណៈកម្មការជំរឿនមន្ត្រីនៃក្រសួងមុខងារសាធារណៈ បន្តចុះពិនិត្យ និងផ្ទៀងផ្ទាត់ទិន្នន័យបុគ្គលិកអប់រំគ្រប់កម្រិត ក្នុងស្រុកមេសាង និងស្រុកព្រះស្តេច ខេត្តព្រៃវែង មេសាង-ព្រះស្តេច៖ នាព្រឹកថ្ងៃទី២៤ ខែសីហា ឆ្នាំ២០២៦នេះ គណៈកម្មការជំរឿនមន្ត្រីនៃក្រសួងមុខងារសាធារណៈ បានសហការយ៉ាងជិតស្និទ្ធជាមួយរដ្ឋបាលស្រុកមេសាង ស្រុកព្រះស្តេច និងការិយាល័យអប់រំ យុវជន និងកីឡាស្រុក ចាប់ផ្តើមបន្តយុទ្ធនាការចុះពិនិត្យ ផ្ទៀងផ្ទាត់ និងធ្វើបច្ចុប្បន្នភាពស្ថិតិបុគ្គលិកអប់រំ និងលោកគ្រូ-អ្នកគ្រូ យ៉ាងហ្មត់ចត់ នៅតាមបណ្តាស្រុកគោលដៅ នៃខេត្តព្រៃវែង។ យុទ្ធនាការនេះ ត្រូវបានដំណើរការទន្ទឹមគ្នានៅក្នុងស្រុកទាំងពីរ ដោយបែងចែកក្រុមការងារដឹកនាំ និងកាលវិភាគអនុវត្តជាក់ស្តែងរួមមាន៖ (១)សម្រាប់យុទ្ធនាការជំរឿននៅស្រុកមេសាង គ្រោងអនុវត្តរយៈពេល ៤ថ្ងៃពេញ ចាប់ពីថ្ងៃទី២៤ ដល់ថ្ងៃទី២៧ ខែសីហា ឆ្នាំ២០២៦ និង (២)សម្រាប់យុទ្ធនាការជំរឿននៅស្រុកព្រះស្តេច គ្រោងអនុវត្តរយៈពេល ៦ថ្ងៃពេញ ចាប់ពីថ្ងៃទី២៤ ដល់ថ្ងៃទី២៩ ខែសីហា ឆ្នាំ២០២៦។ សកម្មភាពចុះជំរឿនមន្ត្រីជាក់ស្តែងនៅតាមគ្រឹះស្ថានសិក្សាសាធារណៈទាំងអស់នាពេលនេះ គឺដើម្បីផ្ទៀងផ្ទាត់វត្តមានផ្ទាល់របស់គណៈគ្រប់គ្រង និងលោកគ្រូ-អ្នកគ្រូនៅតាមបណ្តាសាលារៀនគ្រប់ភូមិ-ឃុំ ក្នុងគោលបំណងត្រួតពិនិត្យ ផ្ទៀងផ្ទាត់ទិន្នន័យ លើអត្តលេខមន្ត្រីរាជការ ជីវប្រវត្តិ ឋានន្តរស័ក្តិ ថ្នាក់ និងមុខវិជ្ជាឯកទេស ដើម្បីធានាឱ្យមានភាពស៊ីសង្វាក់គ្នាទាំងស្រុង រវាងស្ថានភាពជាក់ស្តែង ជាមួយនឹងប្រព័ន្ធគ្រប់គ្រងទិន្នន័យ នៃការបែងចែកគ្រូបង្រៀនឱ្យចំគោលដៅប្រកបដោយគណនេយ្យភាព និងតម្លាភាពខ្ពស់។ គណៈកម្មការជំរឿនមន្ត្រី សូមរំលឹក និងអំពាវនាវដល់លោក-លោកស្រី នាយក នាយិកា លោកគ្រូ-អ្នកគ្រូ និងបុគ្គលិកអប់រំគ្រប់កម្រិតសិក្សាទាំងអស់ ក្នុងស្រុកមេសាង និងស្រុកព្រះស្តេច មេត្តាត្រៀមលក្ខណៈរៀបចំឯកសារគតិយុត្តពាក់ព័ន្ធ និងវត្តមានឱ្យបានគ្រប់គ្រាន់ ដើម្បីចូលរួមសហការជាមួយក្រុមការងារបច្ចេកទេស ឱ្យទទួលបានលទ្ធផលត្រឹមត្រូវ តម្លាភាព និងបញ្ចប់ទៅតាមផែនការដែលបានកំណត់ទុក៕