洪森赴磅通省调研 强调提升基层行政服务效率

ពិធីសំណេះសំណាលជាមួយអាជ្ញាធរ និងអង្គបោះឆ្នោតព្រឹទ្ធសភា ក្រោមអធិបតី សម្តេចតេជោ ហ៊ុន សែន ប្រមុខរដ្ឋស្ដី ដោយមានការចូលរួមពីសមាជិកព្រឹទ្ធសភា រដ្ឋសភា ក្រុមការងារថ្នាក់ជាតិចុះជួយខេត្តកំពង់ធំ ក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ និងអង្គភាពជុំវិញខេត្តកំពង់ធំ សរុប ១,១៨៩នាក់ ការចុះជួបនេះ គឺជាការពង្រឹងគណនេយ្យភាពរវាងព្រឹទ្ធសភា និងអង្គបោះឆ្នោត ព្រមទាំងជំរុញឱ្យការងារនៅមូលដ្ឋានកាន់តែមានប្រសិទ្ធភាព តាមរយៈឱកាសទទួលបានការតម្រង់ទិសដោយផ្ទាល់ពី សម្តេចតេជោ ជាពិសេសការបន្តយកចិត្តទុកដាក់ខ្ពស់លើសេវាតម្រូវការ និងសេវាចាំបាច់នានា ជូនប្រជាពលរដ្ឋឱ្យបានលឿន រហ័ស និងមានប្រសិទ្ធភាព។ នេះក៏បានបង្ហាញពីការយកចិត្តទុកដាក់ ផ្សារភ្ជាប់ទំនាក់ទំនងកាន់តែជិតស្និទ្ធ បង្កើនភាពកក់ក្តៅ និងផ្តល់ថាមពលបន្ថែមដល់មន្ត្រីក្នុងការបំពេញតួនាទីភារកិច្ចរបស់ខ្លួនផងដែរ។ ខេត្តកំពង់ធំ គឺជាបេសកកម្មលើកទី១១ និងជាខេត្តទី១២ នៃដំណើរឆ្ពោះទៅកាន់មូលដ្ឋាន បន្ទាប់ពីខេត្តកំពង់ចាម ត្បូងឃ្មុំ កំពង់ស្ពឺ តាកែវ កំពត កែប ស្វាយរៀង ព្រៃវែង រាជធានីភ្នំពេញ កំពង់ឆ្នាំង និងពោធិ៍សាត់។ ខេត្តកំពង់ធំ ក៏ទទួលបានការកោតសរសើរ ចំពោះការគិតគូរយកចិត្តទុកដាក់លើសុខទុក្ខរបស់និវត្តន៍ជន និងអតីតយុទ្ធជន ដែល សម្តេចតេជោ បានគូសបញ្ជាក់ថា សុទ្ធសឹងជាអ្នកមានស្នាដៃចំពោះជាតិមាតុភូមិ។ ក្នុងស្មារតីជាមន្ត្រីបម្រើប្រជាជន យើងខ្ញុំទាំងអស់គ្នា តែងចងចាំជានិច្ចនូវប្រសាសន៍ក្រើនរំលឹករបស់ សម្តេចតេជោ ជាប្រចាំ ថា “យើងត្រូវរត់ទៅរកប្រជាជន កុំឱ្យប្រជាជនរត់មករកយើង… មន្ត្រីមិនមែនជាចៅហ្វាយរបស់ប្រជាជនទេ ប៉ុន្តែជាអ្នកបម្រើដ៏ស្មោះត្រង់របស់ប្រជាជន” ក្នុងការបំពេញតួនាទីភារកិច្ចបម្រើជាតិ និងប្រជាជនឱ្យកាន់តែល្អប្រសើរ ស្របតាមដែនសមត្ថកិច្ចរបស់ខ្លួន។ ——— ថ្ងៃពុធ ទី៣ ខែមិថុនា ឆ្នាំ២០២៦, មណ្ឌលភូមិភាគទី៨ ខេត្តកំពង់ធំ