柬埔寨3部委公务员招考结束 4257名考生角逐

[អ្នកសង្កេតការណ៍ជាង ៣៥០នាក់ ចូលរួមឃ្លាំមើលការប្រឡងប្រជែងជ្រើសរើសមន្ត្រីរាជការសម្រាប់ក្រសួង-ស្ថាប័នចំនួន៣ ដើម្បីធានាតម្លាភាព និងយុត្តិធម៌](https://www.facebook.com/share/p/1CufwAiFXq/) ដំណើរការប្រឡងប្រជែងជ្រើសរើសមន្ត្រីរាជការថ្មី ឱ្យចូលបម្រើការងារនៅក្រសួង-ស្ថាប័នចំនួន៣ បានប្រព្រឹត្តទៅដោយរលូន ក្រោមការឃ្លាំមើលយ៉ាងយកចិត្តទុកដាក់ពីសំណាក់អ្នកសង្កេតការណ៍ចម្រុះចំនួន ៣៥៩រូប ដើម្បីធានាឱ្យបាននូវគោលការណ៍តម្លាភាព យុត្តិធម៌ និងគុណាធិបតេយ្យ។ ក្រសួងមុខងារសាធារណៈ បានរៀបចំការប្រឡងប្រជែងនេះឡើងរយៈពេល ៣ថ្ងៃ គឺចាប់ពីថ្ងៃទី២៩ ដល់ថ្ងៃទី៣១ ខែឧសភា ឆ្នាំ២០២៦ ដោយបានកំណត់យកមណ្ឌលប្រឡងចំនួនពីរទីតាំង រួមមាន៖ សាលាភូមិន្ទរដ្ឋបាល និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ ការប្រឡងទាំង៣នេះ ធ្វើឡើងដើម្បីជ្រើសរើសមន្ត្រីក្របខ័ណ្ឌឱ្យចូលបម្រើការងារនៅក្នុងក្រសួងយុត្តិធម៌ ស្ថាប័នរដ្ឋលេខាធិការដ្ឋាន និងក្រសួងការបរទេសនិងសហប្រតិបត្តិការអន្តរជាតិ។ ការប្រឡងនេះមានបេក្ខជនចូលរួមសរុបចំនួន ៤ ២៥៧នាក់ ដោយប្រើប្រាស់បន្ទប់ប្រឡងចំនួន ១២១បន្ទប់។ ដើម្បីធានាបាននូវភាពសុក្រឹត និងយុត្តិធម៌ ក្នុងរយៈពេល ៣ថ្ងៃនេះ មានវត្តមានអ្នកសង្កេតការណ៍ចូលរួមសរុបចំនួន ៣៥៩រូប ដែលមកពីស្ថាប័ន និងភាគីពាក់ព័ន្ធផ្សេងៗគ្នា។ ក្នុងចំណោមនោះរួមមាន៖ អ្នកសង្កេតការណ៍ពីអង្គភាពប្រឆាំងអំពើពុករលួយ (ACU) ចំនួន ២២៣រូប អ្នកសង្កេតការណ៍ពីសហភាពសហព័ន្ធយុវជនកម្ពុជា (ស.ស.យ.ក.) ចំនួន ៤៥រូប អ្នកសង្កេតការណ៍ជាតំណាងសាកលវិទ្យាល័យ ចំនួន ២៤រូប និងអ្នកសង្កេតការណ៍មកពីសាធារណជន ចំនួន ២៦រូប។