柬埔寨司法部与公务员部召开岗位职能规范会议

ឯកឧត្តម កើត សេកាណូ ប្រតិភូរាជរដ្ឋាភិបាល និងជាអគ្គលេខាធិការនៃក្រសួងយុត្តិធម៌ អញ្ជើញចូលរួមកិច្ចប្រជុំស្តីពី ការកំណត់ និងការពិពណ៌នាមុខតំណែង ជាមួយតំណាងក្រសួងមុខងារសាធារណៈ ================= នៅព្រឹកថ្ងៃអង្គារ ទី១៨ ខែសីហា ឆ្នាំ២០២៦ ឯកឧត្តម កើត សេកាណូ ប្រតិភូរាជរដ្ឋាភិបាល និងជាអគ្គលេខាធិការនៃក្រសួងយុត្តិធម៌ បានអញ្ជើញចូលរួមកិច្ចប្រជុំស្តីពី ការកំណត់ និងការពិពណ៌នាមុខតំណែង ជាមួយតំណាងក្រសួងមុខងារសាធារណៈ នៅសាលាភូមិន្ទរដ្ឋបាល។ ក្នុងកិច្ចប្រជុំខាងលើនេះ ក្រសួងមុខងារសាធារណៈ បានផ្សព្វផ្សាយនូវអនុក្រឹត្យលេខ ១៤២ អនក្រ ចុះថ្ងៃទី២ ខែកក្កដា ឆ្នាំ២០២៦ ស្តីពីការដាក់ឱ្យអនុវត្តគោលការណ៍ណែនាំស្តីពី ការកំណត់ និងការពិពណ៌នាមុខតំណែង សម្រាប់ជាមូលដ្ឋានដល់ក្រសួង-ស្ថាប័ន ក្នុងការកំណត់ និងការពិពណ៌នាមុខតំណែងមន្រ្តីឱ្យបានច្បាស់លាស់នៅតាមរចនាសម្ព័ន្ធអង្គភាពក្រោមឱវាទក្រសួង-ស្ថាប័ន ក្នុងក្របខណ្ឌនៃការកែទម្រង់រដ្ឋបាលសាធារណៈ សំដៅឱ្យការបែងចែកតួនាទី ភារកិច្ច និងការទទួលខុសត្រូវរបស់មន្រ្តីម្នាក់ៗ មានភាពច្បាស់លាស់ ចំគោលដៅ មិនជាន់ស្ទួនគ្នា និងស្របតាមមុខងាររបស់អង្គភាពផ្ទាល់ ដើម្បីធានាឱ្យបាននូវប្រសិទ្ធភាព និងស័ក្តិសិទ្ធិភាពនៃការផ្តល់សេវាសាធារណៈជូនប្រជាពលរដ្ឋ ព្រមទាំងជាមូលដ្ឋានសម្រាប់ក្រសួង-ស្ថាប័ន ក្នុងការពង្រឹងការគ្រប់គ្រង និងអភិវឌ្ឍធនធានមនុស្ស, ផែនការធនធានមនុស្ស, ការជ្រើសរើស, ការតែងតាំង, ការពង្រាយមន្រ្តី, ការលើកទឹកចិត្ត, ការរៀបចំបៀវត្ស, លាភការ និងការវាយតម្លៃសមិទ្ធកម្មការងាររបស់មន្រ្តីម្នាក់ៗផងដែរ។