内政部全力救助磅湛省受伤警官 赴越治疗费用全额承担

**ក្រសួងមហាផ្ទៃ កំពុងតាមដានយ៉ាងយកចិត្តទុកដាក់លើស្ថានភាពសង្គ្រោះបន្ទាន់របស់លោកអធិការរងស្រុកស្ទឹងត្រង់ នៅមន្ទីរពេទ្យក្នុងប្រទេសវៀតណាម** ​លោក រ៉េន រតនៈ អ្នកនាំពាក្យលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅព្រលប់ថ្ងៃទី២៦ ខែមេសា ឆ្នាំ២០២៦នេះ បានចេញមកបញ្ជាក់ពីស្ថានភាពសុខភាព និងការយកចិត្តទុកដាក់ខ្ពស់ពីថ្នាក់ដឹកនាំ ចំពោះលោកវរសេនីយ៍ទោ ម៉ាប់ សុផាត អធិការរងនៃអធិការដ្ឋាននគរបាលស្រុកស្ទឹងត្រង់ ដែលកំពុងស្ថិតក្នុងដំណាក់កាលសង្គ្រោះបន្ទាន់។ ​យោងតាមការបញ្ជាក់របស់អ្នកនាំពាក្យ ស្ថានភាពរបស់លោកវរសេនីយ៍ទោ ម៉ាប់ សុផាត ត្រូវបានតាមដានជាប់ជាប្រចាំពីសំណាក់ក្រសួងមហាផ្ទៃ ជាពិសេសពីលោកអភិសន្តិបណ្ឌិត ស សុខា ផ្ទាល់តាមរយៈក្រុមការងារ។ គិតត្រឹមព្រលប់ថ្ងៃអាទិត្យនេះ លោកអធិការរង កំពុងបន្តទទួលការសង្គ្រោះ និងព្យាបាលយ៉ាងយកចិត្តទុកដាក់ពីសំណាក់ក្រុមវេជ្ជបណ្ឌិតជំនាញ នៅមន្ទីរពេទ្យក្នុងសាធារណរដ្ឋសង្គមនិយមវៀតណាម។ ​ក្នុងស្មារតីទទួលខុសត្រូវខ្ពស់ លោកអភិសន្តិបណ្ឌិត ស សុខា ក្នុងនាមក្រសួងមហាផ្ទៃ រួមជាមួយលោកនាយឧត្តមសេនីយ៍អគ្គស្នងការនគរបាលជាតិ លោកអភិបាលខេត្ត និងលោកស្នងការនគរបាលខេត្តកំពង់ចាម បានសម្រេចរ៉ាប់រងទាំងស្រុងលើ៖ -​រាល់តម្រូវការសង្គ្រោះបន្ទាន់ និងថ្លៃព្យាបាលបន្តទាំងអស់។ -​ការដោះស្រាយបញ្ហាប្រឈមផ្នែកជីវភាពប្រចាំថ្ងៃរបស់ក្រុមគ្រួសារលោកវរសេនីយ៍ទោផ្ទាល់។ ​លោក រ៉េន រតនៈ បានសង្កត់ធ្ងន់ថា កាយវិការប្រកបដោយមនោសញ្ចេតនារបស់ថ្នាក់ដឹកនាំនាពេលនេះ គឺជាការឆ្លុះបញ្ចាំងយ៉ាងច្បាស់អំពីការគោរព និងស្ញប់ស្ញែងចំពោះវីរភាពរបស់លោកវរសេនីយ៍ទោ ម៉ាប់ សុផាត ដែលបានធ្វើពលិកម្មក្នុងនាមជាមន្ត្រីនគរបាលជាតិ។ ការលះបង់របស់លោក ក្នុងភារកិច្ចការពារសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋ គឺជាបុព្វហេតុដ៏ឧត្តុង្គឧត្តមដែលថ្នាក់ដឹកនាំមិនអាចបំភ្លេចបាន។ ​បច្ចុប្បន្ន ក្រសួងមហាផ្ទៃ និងភាគីពាក់ព័ន្ធ នៅតែបន្តបួងសួង និងសង្ឃឹមលើកិច្ចខិតខំប្រឹងប្រែងរបស់ក្រុមគ្រូពេទ្យ ដើម្បីជួយសង្គ្រោះជីវិតមន្ត្រីនគរបាលរូបនេះឱ្យឆ្លងផុតពីដំណាក់កាលគ្រោះថ្នាក់៕