柬埔寨公务员部与卫生部拟定医疗人员人事管理新规

ការកែទម្រង់រដ្ឋបាលសាធារណៈ៖ ក្រសួងមុខងារសាធារណៈ និងក្រសួងសុខាភិបាល ជួបពិភាក្សាសេចក្តីព្រាងអនុក្រឹត្យ ដើម្បីពង្រឹងការគ្រប់គ្រងធនធានមនុស្សក្នុងវិស័យសុខាភិបាល ដើម្បីបន្តជំរុញការអនុវត្តកំណែទម្រង់រដ្ឋបាលសាធារណៈឱ្យកាន់តែមានប្រសិទ្ធភាព តម្លាភាព និងគណនេយ្យភាព ស្របតាមអភិក្រម «ពង្រឹង ជាជាងពង្រីក» និង «រៀបចំផ្ទះ ឱ្យរៀបរយ» របស់រាជរដ្ឋាភិបាល ក្រសួងមុខងារសាធារណៈបន្តពិនិត្យ និងសម្រួចលិខិតបទដ្ឋានគតិយុត្តពាក់ព័ន្ធនឹងការគ្រប់គ្រងធនធានមនុស្សក្នុងវិស័យសាធារណៈ ដើម្បីធានាឱ្យការអនុវត្តការងារមានគោលការណ៍ច្បាស់លាស់ និងមានប្រសិទ្ធភាពខ្ពស់។ ដើម្បីបន្តការងារទាំងនេះ នារសៀលថ្ងៃទី៦ ខែកក្កដា ឆ្នាំ២០២៦នេះ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ បានដឹកនាំកិច្ចប្រជុំពិនិត្យ និងពិភាក្សាលើសេចក្តីព្រាងអនុក្រឹត្យស្តីពី «គោលការណ៍ និងនីតិវិធីនៃការតែងតាំង ការបញ្ចប់មុខតំណែង ការផ្លាស់ប្តូរកន្លែងធ្វើការ និងការផ្ទេរអង្គភាពរបស់មន្ត្រីសុខាភិបាលនៃអង្គភាពសុខាភិបាលមូលដ្ឋាន និងនិយាមនីតិវិធីប្រតិបត្តិ»។ ដើម្បីធានាបាននូវការឯកភាពរួម និងប្រសិទ្ធភាពខ្ពស់ កិច្ចប្រជុំនេះមានការចូលរួមពីតំណាងក្រសួង-ស្ថាប័នសំខាន់ៗរួមមាន៖ ក្រសួងសុខាភិបាល, ក្រសួងអប់រំ យុវជន និងកីឡា,​ ក្រសួងសេដ្ឋកិច្ច និងហិរញ្ញវត្ថុ, ក្រសួងមហាផ្ទៃ, ព្រមទាំងក្រុមប្រឹក្សាអ្នកច្បាប់ និងក្រសួង ស្ថាប័នពាក់ព័ន្ធផ្សេងទៀតផងដែរ។ តាមរយៈការពិភាក្សាយ៉ាងផុសផុល និងស៊ីជម្រៅ អង្គប្រជុំបានប្រមូលធាតុចូល និងអនុសាសន៍សំខាន់ៗជាច្រើន ដើម្បីកែលម្អសេចក្តីព្រាងអនុក្រឹត្យទាំងពីរ ឱ្យកាន់តែមានភាពច្បាស់លាស់ គ្រប់ជ្រុងជ្រោយ និងអាចអនុវត្តបានប្រកបដោយប្រសិទ្ធភាព។ សូមបញ្ជាក់ថា សេចក្តីព្រាងអនុក្រឹត្យនេះ កំណត់អំពីគោលការណ៍ និងនីតិវិធីនៃការតែងតាំង ​ការផ្អាកការងារពីមុខតំណែង ការបញ្ចប់មុខតំណែង ការផ្លាស់ប្តូរកន្លែងធ្វើការ និងការផ្ទេរអង្គភាពរបស់មន្ត្រីសុខាភិបាលនៃអង្គភាពសុខាភិបាលមូលដ្ឋាន ព្រមទាំងការលើកកម្ពស់ប្រសិទ្ធភាពនៃការដឹកនាំ និងការគ្រប់គ្រងស្ថាប័ន ពង្រឹងគុណភាពនៃការផ្តល់សេវាសុខាភិបាល និងគាំទ្រដល់ការអនុវត្តកំណែទម្រង់រដ្ឋបាលសាធារណៈឱ្យកាន់តែមានប្រសិទ្ធភាព៕