洪玛尼视察教师岗位分配 新教师12月准时领薪

ឯកឧត្តមឧបនាយករដ្ឋមន្ត្រី ហ៊ុន ម៉ានី៖ មកជួបជុំគ្នា ដើម្បីចាប់ប៉ុស្តិ៍ផង ឃើញដំណើរការផង និងធ្វើជាសាក្សីផង ក្រោយបញ្ចប់កិច្ចប្រជុំត្រួតពិនិត្យវឌ្ឍនភាពការងារប្រចាំខែតុលា របស់ក្រសួងមុខងារសាធារណៈ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញចុះពិនិត្យផ្ទាល់ នូវដំណើរការបែងចែកកន្លែងការងារ ជូនបេក្ខជនប្រឡងជាប់ស្ថាពរ ជាគ្រូបង្រៀនផ្អែកលើកិច្ចព្រមព្រៀងការងារ កម្រិតវិទ្យាល័យ ឆ្នាំសិក្សា២០២៦-២០២៧ នៅវិទ្យាស្ថានជាតិអប់រំ។ នៅក្នុងឱកាសជួបសំណេះសំណាលផ្ទាល់ជាមួយបេក្ខជនគ្រូបង្រៀន ឯកឧត្តមឧបនាយករដ្ឋមន្ត្រី បានមានប្រសាសន៍សាកសួរ និងពន្យល់ពីគោលបំណងនៃការរៀបចំឱ្យមានការជ្រើសរើសទីតាំងការងាររួមគ្នាយ៉ាងដូច្នេះថា "កាលពីមុន បើផ្អែកតាមបទពិសោធន៍ គឺយើងមិនដែលបានរៀបចំឱ្យមកជួបជុំគ្នាបែបនេះទេ គឺយើងធ្វើការបែងចែកតែម្តង។ ការមកជួបជុំគ្នាបែបនេះ អាចនឹងបង្កការរំខានដល់ប្អូនៗបន្តិចមែន ប៉ុន្តែដល់ពេលមកជួបជុំគ្នា គឺយើងបានឃើញដំណើរការទាំងអស់គ្នាថា លោកណាត្រូវចាប់បានប៉ុស្តិ៍ការងារណា។ ដល់ពេលបានឃើញផ្ទាល់ភ្នែកបែបនេះ ធ្វើឱ្យយើងអស់មន្ទិល និងស្ងប់ចិត្តជាង... បានទាំងចាប់ប៉ុស្តិ៍ បានទាំងឃើញដំណើរការច្បាស់លាស់ និងបានធ្វើជាសាក្សីទាំងអស់គ្នាទៀត។" លើសពីនេះ ឯកឧត្តមបានដេញដោលសួរនាំបេក្ខជន ដើម្បីដឹងថា តើការមកចាប់ប៉ុស្តិ៍ជុំគ្នាបែបនេះ បង្កការលំបាក ឬផ្តល់ភាពកក់ក្តៅ និងភាពស្ងប់ចិត្តជាងមុន។ បេក្ខជនទាំងអស់បានសម្តែងការពេញចិត្ត និងគាំទ្រយ៉ាងខ្លាំងចំពោះរបៀបរៀបចំបែបនេះ។ ទន្ទឹមនឹងការចាត់ចែងទីតាំងបំរើការងារនេះ ឯកឧត្តមឧបនាយករដ្ឋមន្ត្រី ហ៊ុន ម៉ានី ក៏បានណែនាំដល់ក្រុមការងារឱ្យយកចិត្តទុកដាក់ខ្ពស់លើការរៀបចំនីតិវិធីរដ្ឋបាល បែបបទកិច្ចសន្យា និងការបញ្ចូលទិន្នន័យបៀវត្សរ៍ឱ្យបានលឿន និងត្រឹមត្រូវ ដើម្បីធានាថាគ្រូបង្រៀនថ្មីទាំងអស់ នឹងទទួលបានប្រាក់បៀវត្សរ៍ទាន់ពេលវេលា ចាប់ពីដើមខែធ្នូ ខាងមុខនេះតទៅ។