旅游部举办旅游应用研究研讨会 旨在优化行业政策

[English Below] រាជធានីភ្នំពេញ៖ នាថ្ងៃទី២៥ ខែសីហា ឆ្នាំ២០២៦ នៅទីស្តីការក្រសួងទេសចរណ៍ ឯកឧត្តម ហោ សារុន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានអញ្ជើញជាអធិបតីក្នុងសិក្ខាសាលាតម្រង់ទិសស្តីពី «ការសិក្សាស្រាវជ្រាវបែបអនុវត្ត/សកម្មភាព (Applied/Action Research) ក្នុងវិស័យទេសចរណ៍»។ សិក្ខាសាលានេះ មានការអញ្ជើញចូលរួមពី ឯកឧត្តម នាង ម៉ៅ រដ្ឋលេខាធិការ, ឯកឧត្តម លោកជំទាវ ថ្នាក់ដឹកនាំក្រសួងទេសចរណ៍ និងសាកលវិទ្យាល័យ, លោក លោកស្រីប្រធាននាយកដ្ឋាន និងប្រធានមន្ទីរទេសចរណ៍, លោក លោកស្រីជាមន្ត្រីជំនាញគ្រប់នាយកដ្ឋានចំណុះក្រសួងទេសចរណ៍ និងមន្ទីរទេសចរណ៍រាជធានី-ខេត្ត, ព្រមទាំងសាស្ត្រាចារ្យ អ្នកជំនាញស្រាវជ្រាវ និងនិស្សិត សរុបប្រមាណ ៣០០ នាក់។ សិក្ខាសាលានេះ ត្រូវបានរៀបចំឡើងក្នុងគោលបំណងដូចខាងក្រោម៖ ១. ផ្សព្វផ្សាយ និងផ្តល់ព័ត៌មានលម្អិត អំពីចលនាប្រឡងប្រណាំងស្នាដៃអត្ថបទស្រាវជ្រាវឆ្នើមក្នុងវិស័យទេសចរណ៍ ប្រចាំឆ្នាំ២០២៦ ២. តម្រង់ទិសនិស្សិតដែលជាបេក្ខជនចូលរួមចលនាប្រឡងប្រណាំង និងពង្រឹងសមត្ថភាពមន្ត្រីជំនាញក្រសួងទេសចរណ៍ ក្នុងការរៀបចំការសិក្សាស្រាវជ្រាវបែបអនុវត្ត/សកម្មភាព ៣. បង្កើនកិច្ចសហប្រតិបត្តិការរវាងក្រសួងទេសចរណ៍ និងបណ្តាសាកលវិទ្យាល័យក្នុងការលើកកម្ពស់ការសិក្សាស្រាវជ្រាវក្នុងវិស័យទេសចរណ៍។ ក្នុងឱកាសនោះ ឯកឧត្តម ហោ សារុន បានគូសបញ្ជាក់អំពីក្តីរំពឹងទុកយ៉ាងមុតមាំថា សិក្ខាសាលាតម្រង់ទិស និងចលនាប្រឡងប្រណាំងស្នាដៃអត្ថបទស្រាវជ្រាវឆ្នើមក្នុងវិស័យទេសចរណ៍នេះ នឹងក្លាយជាកាតាលីករដ៏សំខាន់ ក្នុងការជំរុញការកសាង និងពង្រឹងវប្បធម៌ស្រាវជ្រាវបែបវិទ្យាសាស្ត្រ ព្រមទាំងប្រែក្លាយចំណេះដឹង និងទ្រឹស្តីស្រាវជ្រាវទៅជាដំណោះស្រាយដែលមានប្រសិទ្ធភាព និងអាចអនុវត្តបានជាក់ស្តែង ឆ្លើយតបនឹងតម្រូវការ និងបញ្ហាប្រឈមនានាក្នុងវិស័យទេសចរណ៍។ ជាមួយគ្នានេះ ឯកឧត្តម ហោ សារុន ក៏បានលើកឡើងថា ការលើកកម្ពស់ការស្រាវជ្រាវក្នុងវិស័យទេសចរណ៍ មិនត្រឹមតែមានសារៈសំខាន់សម្រាប់ការបង្កើត និងពង្រីកមូលដ្ឋានចំណេះដឹងប៉ុណ្ណោះទេ ប៉ុន្តែថែមទាំងជាឧបករណ៍យុទ្ធសាស្ត្រដ៏ចាំបាច់សម្រាប់គាំទ្រដល់ការរៀបចំគោលនយោបាយ ការធ្វើផែនការ និងការសម្រេចចិត្តដោយផ្អែកលើភស្តុតាង។ លទ្ធផលស្រាវជ្រាវដែលមានគុណភាព នឹងជួយកំណត់បានកាន់តែច្បាស់នូវនិន្នាការ ឱកាស បញ្ហាប្រឈម និងតម្រូវការរបស់វិស័យទេសចរណ៍ ព្រមទាំងផ្តល់មូលដ្ឋានសម្រាប់បង្កើតនវានុវត្តន៍ និងដំណោះស្រាយថ្មីៗ ដែលអាចបង្កើនគុណភាពសេវាកម្ម ភាពប្រកួតប្រជែង ប្រសិទ្ធភាពនៃការគ្រប់គ្រង និងការចូលរួមរបស់ភាគីពាក់ព័ន្ធ។ ជាពិសេស សកម្មភាពនេះនឹងរួមចំណែកបង្កើតផលប៉ះពាល់ជាក់ស្តែងពីកម្រិតចំណេះដឹង ទៅកាន់ការអនុវត្ត និងពីការអនុវត្ត ទៅកាន់ការកែលម្អគោលនយោបាយ ដើម្បីជំរុញការអភិវឌ្ឍវិស័យទេសចរណ៍កម្ពុជាឱ្យកាន់តែមានភាពធន់ ចីរភាព និងបរិយាបន្ន។