公务部推行公务员绩效评估制度 提升行政效率

ក្រសួងមុខងារសាធារណៈ ដាក់ចេញវិធានការសំខាន់ៗ ៤ចំណុច ដល់រដ្ឋបាលថ្នាក់ក្រោមជាតិ ក្នុងការវាយតម្លៃ និងគ្រប់គ្រងមន្ត្រីផ្អែកលើកិច្ចព្រមព្រៀងការងារ ខេត្តកំពង់ចាម៖ គោលបំណងពិតប្រាកដនៃការវាយតម្លៃសមិទ្ធកម្មការងាររបស់មន្ត្រី គឺដើម្បីវាស់ស្ទង់សមត្ថភាពការងារជំនាញជាក់ស្តែង និងជាមូលដ្ឋានសម្រាប់ការសម្រេចចិត្តរបស់ប្រធានអង្គភាព ក្នុងការបន្ត ឬបញ្ចប់កិច្ចព្រមព្រៀងការងារដល់មន្ត្រីសម្រាប់ឆ្នាំបន្ទាប់។ នេះជាការលើកឡើងរបស់ ឯកឧត្តម គង់ សុភី រដ្ឋលេខាធិការក្រសួងមុខងារសាធារណៈ ក្នុងសិក្ខាសាលាផ្សព្វផ្សាយ ស្ដីពីការវាយតម្លៃសមិទ្ធកម្មការងាររបស់មន្ត្រី ផ្អែកលើកិច្ចព្រមព្រៀងការងារ នៅសាលាខេត្តកំពង់ចាម។ ជាក់ស្តែង នៅក្នុងបទបង្ហាញ និងវេទិកាសំណួរចម្លើយក្នុងអង្គសិក្ខាសាលានាថ្ងៃនេះ វាគ្មិនទាំងអស់បានជម្រាបជូនសិក្ខាកាមទាំងអស់ អំពីទស្សនទាន គោលនយោបាយ និងលិខិតបទដ្ឋានរបស់រាជរដ្ឋាភិបាល រួមជាមួយនឹងការចែករំលែកបទពិសោធថ្មីៗ និងធាតុចូលបន្ថែមពីសិក្ខាសាលានេះ ដើម្បីធ្វើឱ្យការអនុវត្តការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារ ជាពិសេសការវាយតម្លៃសមិទ្ធកម្មការងាររបស់មន្ត្រី ប្រកបដោយប្រសិទ្ធភាព និងសុក្រឹតភាពខ្ពស់។ ឯកឧត្តមរដ្ឋលេខាធិការបានបញ្ជាក់ថា ក្រោយការវាយតម្លៃ ប្រធានអង្គភាពអាចបន្តកិច្ចព្រមព្រៀងការងារជូនមន្ត្រីបានត្រឹមតែ ១ឆ្នាំម្តងប៉ុណ្ណោះ ប៉ុន្តែអាចបន្តលើសពី ១ឆ្នាំបាន តាមការសម្រេចរបស់ សម្តេចមហាបវរធិបតី នាយករដ្ឋមន្ត្រី។ ទន្ទឹមនឹងនេះ ប្រព័ន្ធគ្រប់គ្រងថ្មីក៏បានគិតគូរដិតដល់ពីការធានាការពារសិទ្ធិ និងអត្ថប្រយោជន៍នានា ដូចជា របបមាតុភាព និងការបំពាក់គ្រឿងឥស្សរិយយសជូនមន្ត្រីមានស្នាដៃផងដែរ។ ដើម្បីធានាឱ្យបាននូវប្រសិទ្ធភាព និងសុក្រឹតភាព ស្របតាមលិខិតដ្ឋានគតិយុត្ត និងសម្រេចឱ្យបានជោគជ័យនូវចក្ខុវិស័យរបស់ សម្តេចធិបតី ឯកឧត្តមបានស្នើដល់តំណាងក្រសួង-ស្ថាប័ន អភិបាលក្រុង-ស្រុក និងប្រធានមន្ទីរនានា ពិសេសមន្ទីរមុខងារសាធារណៈ អប់រំ និងសុខាភិបាល ត្រូវចូលរួមអនុវត្តវិធានការសំខាន់ៗចំនួន៤ ដោយស្មារតីទទួលខុសត្រូវខ្ពស់៖ (១)ត្រូវយកចំណេះដឹងពីសិក្ខាសាលានេះ ទៅផ្សព្វផ្សាយបន្តដល់ប្រធានមណ្ឌលសុខភាព នាយក-នាយិកាសាលាបឋមសិក្សា និងអ្នកពាក់ព័ន្ធនៅក្នុងមូលដ្ឋានរបស់ខ្លួន ដើម្បីធ្វើជាមូលដ្ឋានដ៏សំខាន់ក្នុងការវាយតម្លៃ, (២)ត្រៀមខ្លួនឱ្យបានរួចរាល់ក្នុងការផ្តល់ជំនួយបច្ចេកទេស និងការត្រួតពិនិត្យមើលលើលទ្ធផលនៃការវាយតម្លៃសមិទ្ធកម្មការងាររបស់មន្ត្រី, (៣)រៀបចំការស្នើសុំជ្រើសរើសមន្ត្រីផ្អែកលើកិច្ចព្រមព្រៀងការងារឱ្យបានត្រឹមត្រូវតាមនីតិវិធីនាពេលខាងមុខ និង (៤)ចូលរួមនិងជំរុញឱ្យថ្នាក់ដឹកនាំរដ្ឋបាលថ្នាក់ក្រោមជាតិ ប្រធានអង្គភាព និងមន្ត្រីពាក់ព័ន្ធ ចូលរួមវគ្គបណ្តុះបណ្តាលស្តីពីការជ្រើសរើស និងការគ្រប់គ្រងមន្ត្រីផ្អែកលើកិច្ចព្រមព្រៀងការងារតាមប្រព័ន្ធបច្ចេកវិទ្យាព័ត៌មានដែលរៀបចំដោយសាលាភូមិន្ទរដ្ឋបាល ឱ្យបានគ្រប់ៗគ្នា៕