卫生部巡查磅通省13家卫生中心 评估基层医疗服务质量

ការចុះពិនិត្យស្ថានភាព និងវឌ្ឍនភាពនៃការបម្រើសេវាសុខភាពបឋម នៅមណ្ឌលសុខភាពចំនួន ១៣ ក្នុងខេត្តកំពង់ធំ ជុំទី៣ ឆ្នាំ២០២៦។ —— ខេត្តកំពង់ធំ៖ ចាប់ពីថ្ងៃទី១៤ ដល់ថ្ងៃទី១៨ ខែកញ្ញា ឆ្នាំ២០២៦ ក្រុមការងារបច្ចេកទេសសេវាសុខភាពបឋម ដឹកនាំដោយឯកឧត្តមវេជ្ជបណ្ឌិត នាង ភារិទ្ធ រដ្ឋលេខាធិការក្រសួងសុខាភិបាល រួមដំណើរដោយឯកឧត្តមសាស្ត្រាចារ្យ ម៉ុក ធាវី បានចុះពិនិត្យ និងវាយតម្លៃស្ថានភាពមណ្ឌលសុខភាពចំនួន ១៣ ស្ថិតក្នុងស្រុកប្រតិបត្តិចំនួន២ រួមមាន ស្រុកប្រតិបត្តិកំពង់ធំ និងស្រុកបារាយសន្ទុក។ ការចុះពិនិត្យជុំទី៣ នេះមានគោលបំណងផ្តោតសំខាន់លើការពិនិត្យការអនុវត្តអនុសាសន៍ ដែលបានដាក់ចេញក្នុងជុំមុនៗ ការវាយតម្លៃវឌ្ឍនភាពជាក់ស្តែង និងការស្វែងរកមូលហេតុនៃបញ្ហា ដែលនៅសល់ ដើម្បីរួមគ្នាកំណត់វិធានការកែលម្អឱ្យបានសមស្រប និងទាន់ពេលវេលា។ ការវាយតម្លៃរួមមាន៖ ហេដ្ឋារចនាសម្ព័ន្ធ និងបរិស្ថានអនាម័យ ការគ្រប់គ្រងឱសថ វ៉ាក់សាំង និងសម្ភារៈបរិក្ខារពេទ្យ ស្ថានភាពធនធានមនុស្ស គុណភាព និងសុវត្ថិភាពនៃការផ្តល់សេវា ក្រមសីលធម៌វិជ្ជាជីវៈ ប្រព័ន្ធរបាយការណ៍ និងយន្តការអភិបាលកិច្ចនៅមូលដ្ឋាន និងបានពិភាក្សាដោយផ្ទាល់ជាមួយថ្នាក់ដឹកនាំ និងបុគ្គលិកមណ្ឌលសុខភាព ដើម្បីស្តាប់បញ្ហាប្រឈម ផ្តល់ការណែនាំបច្ចេកទេស និងស្វែងរកដំណោះស្រាយដែលអាចអនុវត្តបានតាមស្ថានភាពរបស់មណ្ឌលនីមួយៗ។ ក្រុមការងារបានគូសបញ្ជាក់ថា គុណភាពសេវាសុខាភិបាលទទួលបានមិនអាស្រ័យតែលើចំណេះដឹង និងសមត្ថភាពបច្ចេកទេសមន្រ្តីសុខាភិបាលប៉ុណ្ណោះទេ ប៉ុន្តែត្រូវផ្សារភ្ជាប់ជាមួយភាពជាអ្នកដឹកនាំ ការទទួលខុសត្រូវ សីលធម៌វិជ្ជាជីវៈ អាកប្បកិរិយាសមរម្យ ការប្រាស្រ័យទាក់ទងល្អ និងការយកចិត្តទុកដាក់ចំពោះអ្នកជំងឺ។ មណ្ឌលសុខភាពត្រូវក្លាយជាកន្លែងដែលប្រជាពលរដ្ឋអាចចូលមកទទួលសេវាដោយមានទំនុកចិត្ត មានសុវត្ថិភាព និងមិនមានការរើសអើង។ ក្នុងឱកាសនោះ ក្រុមការងារបានផ្តាំផ្ញើ និងណែនាំចំណុចសំខាន់ៗដូចខាងក្រោម៖ ១-មណ្ឌលសុខភាពនិមួយៗ ត្រូវមានភាពជាម្ចាស់ការងារ ដោយមានផែនការច្បាស់លាស់ បែងចែកភារកិច្ចតាមសមត្ថភាព និងតាមដានលទ្ធផលជាប្រចាំ។ ការងារគ្រប់ផ្នែកត្រូវមានទំនាក់ទំនងគ្នាជាប្រព័ន្ធ មិនត្រូវធ្វើការដាច់ដោយឡែក ឬទុកឱ្យមានចន្លោះខ្វះការទទួលខុសត្រូវឡើយ។ ប្រធានអង្គភាពត្រូវដឹកនាំដោយគំរូល្អ មានតម្លាភាព និងចេះប្រមូលផ្តុំកម្លាំងបុគ្គលិកឱ្យរួមគ្នាដោះស្រាយបញ្ហា។ ២-ត្រូវរៀបចំការប្រជុំខ្លីជាប្រចាំ ដើម្បីពិនិត្យស្ថានភាពអ្នកជំងឺ សេវាដែលបានផ្តល់ ករណីដែលត្រូវតាមដាន បញ្ហាប្រឈម និងផែនការការងារបន្ត។ ទិន្នន័យ និងរបាយការណ៍ត្រូវបញ្ចូលក្នុងប្រព័ន្ធផ្លូវការឱ្យបានពេញលេញ ត្រឹមត្រូវ និងទាន់ពេលវេលា។ ៣-ថ្នាក់ដឹកនាំគ្រប់កម្រិត ត្រូវជាប់ឱ្យបានពីបញ្ហាប្រឈម និងជួយដោះស្រាយដោយភាពយុត្តិធម៌ ការទទួលស្គាល់ស្នាដៃ ការលើកទឹកចិត្ត និងការបង្កើតបរិយាកាសការងារល្អ គឺជាកត្តាសំខាន់ក្នុងការរក្សាកម្លាំងចិត្ត និងពង្រឹងគុណភាពសេវា។ ៣-ពង្រឹងការចូលរួមរបស់អាជ្ញាធរ និងសហគមន៍ គណៈកម្មការទ្រទ្រង់មណ្ឌលសុខភាព ត្រូវបន្តចូលរួមគាំទ្រដល់ការរៀបចំបរិស្ថាន ការផ្សព្វផ្សាយអប់រំសុខភាព និងការជំរុញប្រជាពលរដ្ឋឱ្យមកប្រើប្រាស់សេវាឱ្យបានទាន់ពេលវេលា។ ការចូលរួមរបស់សហគមន៍ក៏ជាយន្តការសំខាន់សម្រាប់ផ្តល់មតិត្រឡប់ បង្កើនគណនេយ្យភាព និងធ្វើឱ្យសេវាសុខាភិបាលឆ្លើយតបបានកាន់តែល្អទៅនឹងតម្រូវការជាក់ស្តែងរបស់ប្រជាពលរដ្ឋ។ ជាលទ្ធផល ក្រុមការងារបានកត់សម្គាល់ឃើញថា មណ្ឌលសុខភាពភាគច្រើនមានវឌ្ឍនភាពល្អប្រសើរលើការគ្រប់គ្រង ការរៀបចំបរិស្ថាន ការកត់ត្រាទិន្នន័យ និងការផ្តល់សេវាជូនប្រជាពលរដ្ឋ។ វឌ្ឍនភាពនេះឆ្លុះបញ្ចាំងពីការខិតខំប្រឹងប្រែងរបស់បុគ្គលិកសុខាភិបាល និងកិច្ចសហការរវាងមន្ទីរសុខាភិបាលខេត្ត ស្រុកប្រតិបត្តិ អាជ្ញាធរមូលដ្ឋាន គណៈកម្មការទ្រទ្រង់មណ្ឌលសុខភាព និងសហគមន៍។ ទន្ទឹមនឹងសមិទ្ធផលដែលសម្រេចបាន ក្រុមការងារក៏បានកំណត់ចំណុចដែលត្រូវបន្តកែលម្អ និងផ្តល់អនុសាសន៍ជាក់លាក់តាមស្ថានភាពរបស់មណ្ឌលនីមួយៗ។ មណ្ឌលសុខភាពទាំង ២៥ ដែលបានចុះពិនិត្យរួមមាន៖ ១.មណ្ឌលសុខភាពតាំងក្រសាំង ២.មណ្ឌលសុខភាពសំបូរ ៣.មណ្ឌលសុខភាពសាលាវិស័យ ៤.មណ្ឌលសុខភាពជ័យ ៥.មណ្ឌលសុខភាពទីពោធ៏ ៦.មណ្ឌលសុខភាពត្នោតជុំ ៧.មណ្ឌលសុខភាពចុងដូង ៨.មណ្ឌលសុខភាពមានជ័យ ៩.មណ្ឌលសុខភាពព្រៃគុយ ១០.មណ្ឌលសុខភាពទំរីង ១១.មណ្ឌលសុខភាពឈើទាល ១២.មណ្ឌលសុខភាពកំពង់ស្វាយ ១៣.មណ្ឌលសុខភាព សណ្តាន់។ សេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ថ្ងៃទី២ ខែកញ្ញា ឆ្នាំ២០២៦៖ -ករណីឆ្លងថ្មី ០នាក់ -ករណីជាសះស្បើយ ០នាក់ -ករណីស្លាប់ ០នាក់ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)