柬埔寨公共行政改革委员会调研民意 优化公共服务

ឈ្វេងយល់ និងស្តាប់ពលរដ្ឋ ដើម្បីលើកកម្ពស់គុណភាពសេវាសាធារណៈជូនពលរដ្ឋ នារសៀលថ្ងៃទី១១ ខែសីហា ឆ្នាំ២០២៦ នៅគណៈកម្មការកែទម្រង់រដ្ឋបាលសាធារណៈ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ បានដឹកនាំកិច្ចប្រជុំអន្តរក្រសួងដើម្បីពិនិត្យ និងពិភាក្សាលើសេចក្តីព្រាងរបាយការណ៍អង្កេតស្ទង់មតិស្តីពី ការយល់ឃើញរបស់ប្រជាពលរដ្ឋចំពោះប្រសិទ្ធភាពសេវារដ្ឋបាល។ កិច្ចប្រជុំនេះមានការចូលរួមពីតំណាងក្រសួង-ស្ថាប័នពាក់ព័ន្ធជាច្រើន សំដៅផ្ទៀងផ្ទាត់យ៉ាងយកចិត្តទុកដាក់លើលទ្ធផលនៃការផ្តល់សេវារដ្ឋបាលប្រចាំថ្ងៃរបស់ប្រជាពលរដ្ឋមួយចំនួន ដូចជា សេវាអត្រានុកូលដ្ឋាន ការធ្វើអត្តសញ្ញាណបណ្ណ លិខិតឆ្លងដែន សេវាចុះបញ្ជីនិងផ្ទេរកម្មសិទ្ធិយានយន្ត និងសេវាសាធារណៈចាំបាច់ជាច្រើនទៀត។ ជាលទ្ធផល ក្រុមការងារបានសម្រួចខ្លឹមសាររបាយការណ៍នេះឱ្យកាន់តែមានភាពគ្រប់ជ្រុងជ្រោយ និងឆ្លុះបញ្ចាំងយ៉ាងពិតប្រាកដពីស្ថានភាពជាក់ស្តែង ព្រមទាំងមតិយោបល់របស់ប្រជាពលរដ្ឋ។ របាយការណ៍នេះ នឹងក្លាយជាត្រីវិស័យ និងជាធាតុចូលជាយុទ្ធសាស្ត្រក្នុងការរៀបចំវិធានការកែទម្រង់ ដើម្បីធានាថាសេវាសាធារណៈនៅកម្ពុជាកាន់តែមានគុណភាព តម្លាភាព ភាពងាយស្រួល ឆាប់រហ័ស និងឆ្លើយតបចំគោលដៅនៃតម្រូវការរបស់ប្រជាពលរដ្ឋពិតប្រាកដ។