洪玛尼视察公务员普查工作 推进公共行政透明化改革

ឯកឧត្តមឧបនាយករដ្ឋមន្ត្រី ហ៊ុន ម៉ានី ពិនិត្យដំណើរការធ្វើជំរឿនមន្ត្រីជាក់ស្តែងនៅទីស្តីការក្រសួងផែនការ ខណៈ ឯកឧត្តម ប៊ិន ត្រឈៃ កំពុងធ្វើជីវមាត្រ នារសៀលថ្ងៃទី៧ ខែតុលា ឆ្នាំ២០២៦ នេះ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានគណៈកម្មការធ្វើបច្ចុប្បន្នភាពរចនាសម្ព័ន្ធ និងធ្វើជំរឿនមន្ត្រីជាក់ស្តែងនៅតាមរចនាសម្ព័ន្ធក្រសួង ស្ថាប័ន បានអញ្ជើញចុះពិនិត្យដំណើរការស្រង់ទិន្នន័យ ផ្ទៀងផ្ទាត់វត្តមាន និងធ្វើជីវមាត្រជូនថ្នាក់ដឹកនាំ និងមន្ត្រីរាជការជាក់ស្តែង នៅទីស្តីការក្រសួងផែនការ ដែលជាក្រសួងគោលដៅទី២៦ ក្នុងឱកាសនៃយុទ្ធនាការជំរឿនថ្ងៃទី២ របស់ក្រសួង។ នៅក្នុងដំណើរការចុះពិនិត្យផ្ទាល់នេះដែរ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានអញ្ជើញធ្វើជីវមាត្រ ផ្ទៀងផ្ទាត់ទិន្នន័យប្រវត្តិរូបផ្ទាល់ខ្លួន ព្រមទាំងបានដឹកនាំសហការយ៉ាងជិតស្និទ្ធជាមួយគណៈកម្មការ ដើម្បីធានាឱ្យកិច្ចប្រតិបត្តិការស្រង់ទិន្នន័យមន្ត្រីរាជការ មន្ត្រីជាប់កិច្ចសន្យា និងមន្ត្រីផ្សេងៗចំណុះក្រសួងផែនការ ប្រព្រឹត្តទៅដោយរលូន និងត្រឹមត្រូវ។ ក្នុងឱកាសនោះផងដែរ ឯកឧត្តមឧបនាយករដ្ឋមន្ត្រី ហ៊ុន ម៉ានី បានជួបសំណេះសំណាល និងលើកទឹកចិត្ត ដល់ក្រុមការងារបច្ចេកទេសទាំងអស់ ដែលបាន និងកំពុងខិតខំប្រឹងប្រែងបំពេញភារកិច្ចយ៉ាងសកម្ម ក្នុងស្មារតីទទួលខុសត្រូវខ្ពស់ ដើម្បីធានាឱ្យយុទ្ធនាការនេះ ទទួលបានជោគជ័យ។ ការអញ្ជើញចុះពិនិត្យដំណើរជំរឿនដោយផ្ទាល់ពីសំណាក់ ឯកឧត្តមឧបនាយករដ្ឋមន្ត្រី និងការចូលរួមបំពេញកាតព្វកិច្ចរបស់ ឯកឧត្តមរដ្ឋមន្ត្រីក្រសួងផែនការ នាពេលនេះ គឺបានបង្ហាញនូវគំរូដឹកនាំដ៏ខ្ពង់ខ្ពស់ និងការគាំទ្រយ៉ាងពេញទំហឹងចំពោះ គោលនយោបាយកែទម្រង់រដ្ឋបាលសាធារណៈរបស់រាជរដ្ឋាភិបាល ក្នុងការទទួលបានទិន្នន័យមន្ត្រីពិតប្រាកដ ច្បាស់លាស់ និងតម្លាភាព ដើម្បីយកទៅប្រើប្រាស់ជាប្រយោជន៍រួម។