洪玛奈总理主持内阁会议 重点推进公共行政改革

**សម្តេចធិបតី ហ៊ុន ម៉ាណែត ដឹកនាំកិច្ចប្រជុំពេញអង្គគណៈរដ្ឋមន្ត្រី ពិនិត្យ និងឆ្លងរបៀបវារៈសំខាន់ៗចំនួន៥ រួមទាំងរបាយការណ៍វឌ្ឍនភាពការងារកែទម្រង់រដ្ឋបាលសាធារណៈ** នាព្រឹកថ្ងៃសុក្រ ទី២៨ ខែសីហា ឆ្នាំ២០២៦ នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ដឹកនាំ កិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព។ នៅក្នុងកិច្ចប្រជុំដ៏មានសារៈសំខាន់នេះ គណៈរដ្ឋមន្ត្រីបានធ្វើការពិភាក្សា និងឆ្លងលើរបៀបវារៈគន្លឹះចំនួន៥។ ក្នុងនោះ វិធានការគន្លឹះក្នុងការកែទម្រង់រដ្ឋបាលសាធារណៈ ដែលជាបេសកកម្មដ៏ចម្បងរបស់ក្រសួងមុខងារសាធារណៈ ត្រូវបានលើកយកមកពិនិត្យ និងវាយតម្លៃយ៉ាងយកចិត្តទុកដាក់។ របៀបវារៈទាំង៥ នៃកិច្ចប្រជុំពេញអង្គរួមមាន៖ (១)សេចក្តីព្រាងរបាយការណ៍វឌ្ឍនភាពពាក់កណ្តាលអាណត្តិ នៃការអនុវត្តគោលនយោបាយជាតិប្រជាជន ២០១៦-២០៣០, (២)របាយការណ៍វឌ្ឍនភាពនៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាល នីតិកាលទី៧ នៃរដ្ឋសភា, (៣)របាយការណ៍វឌ្ឍនភាពនៃការអនុវត្តកម្មវិធីគោលនយោបាយអាទិភាព និងវិធានការគន្លឹះក្នុងវិស័យសុខាភិបាល, (៤)សេចក្តីព្រាងច្បាប់ស្តីពីការអនុម័តយល់ព្រមលើពិធីសាសេប៊ូ ស្តីពីវិសោធនកម្មធម្មនុញ្ញអាស៊ាន និង (៥)សេចក្តីព្រាងច្បាប់ស្តីពីការអនុម័តយល់ព្រមលើអនុសញ្ញាស្តីពីបុព្វសិទ្ធិ និងអភ័យឯកសិទ្ធិនៃលេខាធិការដ្ឋាន បុគ្គលិក និងតំណាងរបស់ សមាជិកនៃសន្និសីទអន្តរសកម្មភាព និងវិធានការកសាងទំនុកចិត្ត នៅអាស៊ី (CICA)។ ការលើកយករបាយការណ៍វឌ្ឍនភាពនៃការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈ មកពិភាក្សានាព្រឹកនេះ ឆ្លុះបញ្ចាំងពីការប្តេជ្ញាចិត្តយ៉ាងមុតមាំរបស់រាជរដ្ឋាភិបាល ក្នុងការលើកកម្ពស់ប្រសិទ្ធភាពការងារ គុណាធិបតេយ្យ និងការផ្តល់សេវាសាធារណៈជូនប្រជាពលរដ្ឋឱ្យកាន់តែល្អប្រសើរ ស្របតាមយុទ្ធសាស្ត្របញ្ចកោណ-ដំណាក់កាលទី១។ ក្នុងនាមជាសេនាធិការដឹកនាំការងារកំណែទម្រង់នេះ ក្រសួងមុខងារសាធារណៈ ប្តេជ្ញាចិត្តយ៉ាងមុតមាំក្នុងការបន្តជម្រុញ និងអនុវត្តវិធានការគន្លឹះទាំងឡាយ ឱ្យសម្រេចបានលទ្ធផលកាន់តែផ្លែផ្កា ដើម្បីបម្រើផលប្រយោជន៍ជាតិ និងប្រជាពលរដ្ឋ ក្រោមការដឹកនាំដ៏ឈ្លាសវៃរបស់ សម្តេចធិបតីនាយករដ្ឋមន្ត្រី។