柬埔寨基层行政改革成效显著 完成9824项基础设施项目

ក្រុមប្រឹក្សាឃុំ-សង្កាត់ បានពង្រីកតួនាទីកាន់តែទូលំទូលាយ លើការងាររដ្ឋបាល អភិវឌ្ឍហេដ្ឋារចនាសម្ព័ន្ធ ផ្តល់សេវាសង្គម និងការគាំពារសង្គម ព្រមទាំងការពារស្ត្រី និងកុមារ អនាម័យ បរិស្ថាន ការបន្សាំនឹងការប្រែប្រួលអាកាសធាតុ និងបរិវត្តកម្មឌីជីថល។ ជាក់ស្តែង រដ្ឋបាលឃុំ-សង្កាត់ បានអនុវត្ត និងបញ្ចប់គម្រោងសេដ្ឋកិច្ចសរុប ៩ ៨២៤គម្រោង រួមមានការសាងសង់ និងកែលម្អផ្លូវបេតុងជាង ៤ ៥២០គីឡូម៉ែត្រ ផ្លូវគ្រួសក្រហមជាង ១១ ៤៣៤គីឡូម៉ែត្រ ព្រមទាំងផ្លូវកៅស៊ូ ស្ពានបេតុងខ្នាតតូច ប្រព័ន្ធធារាសាស្ត្រ និងហេដ្ឋារចនាសម្ព័ន្ធចាំបាច់ផ្សេងៗ។ លោកអភិសន្តិបណ្ឌិត ស សុខា បានបញ្ជាក់ថា សមិទ្ធផលទាំងនេះបានរួមចំណែកតភ្ជាប់មូលដ្ឋានទៅកាន់ទីផ្សារ សាលារៀន មណ្ឌលសុខភាព និងតំបន់សេដ្ឋកិច្ច កាត់បន្ថយពេលវេលា និងចំណាយធ្វើដំណើរ ព្រមទាំងលើកកម្ពស់ជីវភាពប្រជាពលរដ្ឋ។ ទន្ទឹមនេះ ក្រុមប្រឹក្សាឃុំ-សង្កាត់បានចូលរួមផ្តល់សេវារដ្ឋបាល កំណត់អត្តសញ្ញាណគ្រួសារក្រីក្រ គាំទ្រជនងាយរងគ្រោះ សម្រុះសម្រួលវិវាទ រក្សាសន្តិសុខសណ្តាប់ធ្នាប់ និងអនុវត្តគោលនយោបាយភូមិ-ឃុំ-សង្កាត់មានសុវត្ថិភាព។ ការប្រើប្រាស់ FMIS Portal និងឧបករណ៍ឌីជីថល ក៏បានជួយធ្វើទំនើបកម្មរដ្ឋបាល ពង្រឹងភាពត្រឹមត្រូវនៃទិន្នន័យ ប្រសិទ្ធភាព និងតម្លាភាពនៃការគ្រប់គ្រងថវិកា។ លោកបានចាត់ទុកសមិទ្ធផលទាំងនេះថា ជាសក្ខីភាពនៃភាពចាស់ទុំ និងការរីកចម្រើនជាលំដាប់នៃប្រជាធិបតេយ្យ និងអភិបាលកិច្ចនៅថ្នាក់មូលដ្ឋាន ព្រមទាំងការចូលរួមរបស់ប្រជាពលរដ្ឋក្នុងការគ្រប់គ្រង និងអភិវឌ្ឍមូលដ្ឋានរបស់ខ្លួន។ [**Join AMS One-minute**](https://t.me/ams1minute)