磅湛省公立小学教师资格考核开考 持续至23日

គ្រូបង្រៀនផ្អែកលើកិច្ចព្រមព្រៀងការងារ ប្រឡងបញ្ចប់ការបណ្ដុះបណ្ដាលតាមប្រព័ន្ធបណ្ដុះបណ្ដាលបរិញ្ញាបត្រ+១ ជំនាន់ទី១ ខេត្តកំពង់ចាម៖ នាថ្ងៃទី២២ ខែតុលា ឆ្នាំ២០២៦ លោក ម៉ម ភឿក អគ្គនាយករងនៃអគ្គនាយកដ្ឋានគ្រប់គ្រងមុខងារសាធារណៈ ជាតំណាងក្រសួងមុខងារសាធារណៈ បានអញ្ជើញចូលរួមជាគណៈមេប្រយោគ និងចុះពិនិត្យដំណើរការប្រឡងបញ្ចប់ការបណ្ដុះបណ្ដាលគ្រូបង្រៀន ផ្អែកលើកិច្ចព្រមព្រៀងការងារបង្រៀននៅតាមគ្រឹះស្ថានបឋមសិក្សាសាធារណៈ តាមប្រព័ន្ធបណ្ដុះបណ្ដាលបរិញ្ញាបត្រ+១ ជំនាន់ទី១។ ការប្រឡងនេះប្រព្រឹត្តទៅរយៈពេល ២ថ្ងៃ គឺចាប់ពីថ្ងៃទី២២ ដល់ថ្ងៃទី២៣ ខែតុលា ឆ្នាំ២០២៦ នៅមណ្ឌលវិទ្យាស្ថានគរុកោសល្យកំពង់ចាម ខេត្តកំពង់ចាម ដោយមានបេក្ខជនចូលរួមប្រឡងសរុបចំនួន ៦២៥នាក់ ក្នុងនោះស្ត្រីមានចំនួន ៤៤៣នាក់។ បេក្ខជនទាំងអស់ គឺជាគ្រូបង្រៀនផ្អែកលើកិច្ចព្រមព្រៀងការងារ ដែលធ្លាប់បានប្រឡងជាប់ជាស្ថាពរ និងជាប់បម្រុង ព្រមទាំងបានឆ្លងកាត់ការបណ្ដុះបណ្ដាលរយៈពេល១ឆ្នាំពេញរួចមកហើយ។ ក្រោយពីប្រឡងជាប់ជាស្ថាពរ បេក្ខជនម្នាក់ៗនឹងទទួលបានវិញ្ញាបនបត្រគរុវិជ្ជាសម្បទាវិជ្ជាជីវៈគ្រូបង្រៀន ចេញដោយក្រសួងអប់រំ យុវជន និងកីឡា។ វិញ្ញាបនបត្រនេះ ជាការបញ្ជាក់អំពីគុណវុឌ្ឍិផ្នែកគរុកោសល្យរបស់គ្រូបង្រៀន ដែលជាតម្រូវការដ៏ចាំបាច់បំផុតក្នុងការធានាគុណភាពអប់រំ ស្របតាមលក្ខណៈវិនិច្ឆ័យនៃគ្រូបង្រៀនសតវត្សទី២១។ ទន្ទឹមនឹងនេះ ការបណ្តុះបណ្តាលនេះក៏ជាផ្នែកមួយនៃការឆ្លើយតបទៅនឹងកំណែទម្រង់វិស័យអប់រំ ដែលជាការគិតគូរ និងជាបំណងប្រាថ្នារបស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា៕