柬埔寨青年联合会与柬埔寨国际青年商会深化合作

នារសៀល ថ្ងៃទី១៤ ខែកញ្ញា ឆ្នាំ២០២៦ ឯកឧត្តម សុខ សប្បាយណា សមាជិកគណៈអចិន្រ្ដៃយ៍ ​ជាតំណាងឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ព្រមទាំង ឯកឧត្តម លោកជំទាវ សមាជិកសមាជិកា ស.ស.យ.ក. អញ្ជើញជួបសមែ្ដងការគួរសម និងពិភាក្សាការងារ ដើម្បីពង្រឹងកិច្ចសហប្រតិបត្តិការរវាង ស.ស.យ.ក. និងសភាយុវពាណិជ្ជករអន្ដរជាតិកម្ពុជា នៅអគារKampus។ ជាកិច្ចចាប់ផ្ដើម លោក អន ឡៃឃាង ប្រធានថ្នាក់ជាតិ សភាយុវពាណិជ្ជករអន្តរជាតិកម្ពុជា (JCI Cambodia) បានធ្វើការស្វាគមន៍យ៉ាងកក់ក្ដៅចំពោះវត្តមាន ឯកឧត្តម លោកជំទាវ សមាជិក សមាជិកាទាំងអស់នៅទីនេះ ព្រមទាំងបានធ្វើការរាយការណ៍អំពីសមិទ្ធផល និងវឌ្ឍនភាពការងារដែលសម្រេចបាននាពេលកន្លងមក។ ជាមួយគ្នានេះ លោកបានរំលេចផងដែរថា សភាយុវពាណិជ្ជករអន្តរជាតិកម្ពុជា ត្រូវបានបង្កើតឡើងក្នុងគោលបំណងចូលរួមដោះស្រាយបញ្ហាសង្គម និងអភិវឌ្ឍសមត្ថភាពយុវពាណិជ្ជករ ឱ្យក្លាយជាសហគ្រិនឆ្នើម ដែលមានសមត្ថភាព និងទំនួលខុសត្រូវក្នុងការចូលរួមអភិវឌ្ឍសង្គម ស្របតាមចក្ខុវិស័យរបស់អង្គភាព និងគោលនយោបាយអភិវឌ្ឍន៍របស់កម្ពុជា។ ក្នុងនោះ ឯកឧត្តម សុខ សប្បាយណា សមាជិកគណៈអចិន្រ្ដៃយ៍ បានធ្វើការកោតសរសើរ និងវាយតម្លៃខ្ពស់ចំពោះ សភាយុវពាណិជ្ជករអន្តរជាតិកម្ពុជា ចំពោះការរៀបចំផែនការសកម្មភាពឆ្ពោះទៅមុខ និងសកម្មភាពការងារដែលសម្រេចបាននាពេលកន្លងមក។ លើសពីនោះ ឯកឧត្តមបានបន្ថែមទៀតថា បេសកកម្មរបស់សភាយុវពាណិជ្ជករអន្តរជាតិកម្ពុជា មានភាពស្របគ្នាជាមួយបេសកកម្មរបស់ ស.ស.យ.ក. ដែលតែងតែផ្តួចផ្តើម និងរៀបចំព្រឹត្តិការណ៍ កម្មវិធី យុទ្ធនាការ និងវេទិកានានា ដើម្បីលើកទឹកចិត្ត និងបង្កើតឱកាសឱ្យយុវជនចូលរួមក្នុងសកម្មភាពសង្គម ការងារសប្បុរសធម៌ និងការងារស្ម័គ្រចិត្ត ព្រមទាំងបំផុសស្មារតីស្នេហាជាតិ ក្នុងស្មារតីជាគ្រួសារខ្មែរតែមួយ រួមចំណែកសម្រេចបាននូវសមិទ្ធផលថ្មីៗជូនជាតិ និងមាតុភូមិ។ **👉🏽តំណភ្ជាប់ទៅកាន់បណ្តាញសង្គមរបស់ ស.ស.យ.ក.** 🌐 [**uyfc.org**](https://www.uyfc.org/) 📱 [**Facebook**](https://www.facebook.com/uyfccambodia) 📱 [**YouTube**](https://www.youtube.com/@unionofyouthfederationcambodia)** ** 📱 [**Telegram**](https://t.me/uyfc_news)** ** 📱** **[**TikTok**](https://www.tiktok.com/@uyfccambodia?_t=8fUJ9WcjHX8)