洪玛尼突访公务部数字化培训班 强调提升行政服务效率

ឯកឧត្តមឧបនាយករដ្ឋមន្ត្រី ហ៊ុន ម៉ានី ជួបសំណេះសំណាលជាមួយអនុប្រធានមន្ទីរ និងប្រធានការិយាល័យនៃមន្ទីរមុខងារសាធារណៈរាជធានី-ខេត្ត ដោយមិនបានត្រៀមទុក ឆ្លៀតពីការងារប្រចាំថ្ងៃ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអញ្ជើញចូលជួបអនុប្រធានមន្ទីរ និងប្រធានការិយាល័យនៃមន្ទីរមុខងារសាធារណៈរាជធានី-ខេត្ត ដែលជាសិក្ខាកាមក្នុងវគ្គបណ្តុះបណ្តាលស្តីពី «ការអភិវឌ្ឍសមត្ថភាពឌីជីថល សម្រាប់កិច្ចការរដ្ឋបាល និងប្រព័ន្ធគ្រប់គ្រងទិន្នន័យមន្ត្រី» នៅទីស្តីការក្រសួង ដោយមិនបានត្រៀមទុកជាមុន។ ក្នុងជំនួបឥតព្រៀងទុកនេះ សិក្ខាកាមបានបង្ហាញភាពភ្ញាក់ផ្អើល និងអារម្មណ៍រំភើបដែលឯកឧត្តមឧបនាយករដ្ឋមន្ត្រី អញ្ជើញចូលជួប ដោយមិនមានកំណត់ក្នុងរបៀបវារៈនៃវគ្គបណ្តុះបណ្តាលនោះឡើយ។ សកម្មភាពនេះ ជាការបង្ហាញពីភាពជិតស្និទ្ធរវាងថ្នាក់ដឹកនាំ និងមន្ត្រីគ្រប់ជាន់ថ្នាក់ និងការយកចិត្តទុកដាក់ចំពោះមន្ត្រីរាជការទាំងអស់ ព្រមទាំងជាការលើកទឹកចិត្តឱ្យបន្តប្រឹងប្រែងក្នុងការបម្រើប្រជាពលរដ្ឋ និងការអភិវឌ្ឍប្រទេសជាតិ។ ឆ្លៀតក្នុងឱកាសនេះផងដែរ ឯកឧត្តមឧបនាយករដ្ឋមន្ត្រី បានថ្លែងអំណរគុណ និងកោតសរសើរដល់មន្ទីរមុខងារសាធារណៈទាំងអស់ ដែលបានខិតខំប្រឹងប្រែងបំពេញកិច្ចការងារកន្លងមក ទាំងកិច្ចការងារស្នូលផង ការងារកែទម្រង់ផង។ ឯកឧត្តមសង្ឃឹមថា វគ្គបណ្តុះបណ្តាលនេះសិក្ខាកាមទាំងអស់មានការចូលរួម ចែករំលែកនូវបទពិសោធ និងវិធីសាស្ត្រនានា ក្នុងការដោះស្រាយបញ្ហាដែលមន្ទីរនីមួយៗ បានជួបប្រទះនាពេលកន្លងមក។ "វគ្គបណ្តុះបណ្តាលនេះ គឺជាវេទិកាមួយ សម្រាប់រៀនសូត្រពីគ្នាទៅវិញទៅមក រួមគ្នាដោយស្មារតីជាក្រុម និងការទទួលខុសត្រូវខ្ពស់ ក្នុងការអនុវត្តកិច្ចការងារដោយផ្ទាល់ ដើម្បីដើម្បីធានាថាការងាររដ្ឋបាល មានប្រសិទ្ធភាព ភាពច្បាស់លាស់ និងធានាបាននូវពេលវេលា​ដែលជាការចូលរួមក្នុងការពង្រឹងប្រព័ន្ធរដ្ឋបាលសាធារណៈ ក្នុងការផ្តល់សេវាសាធារណៈមានប្រសិទ្ធភាព និងឆ្លើយតបតាមតម្រូវការពិតប្រាកដរបស់ប្រជាពលរដ្ឋ។" ឯកឧត្តមបានបន្ថែម៕