旅游部在上丁省举办性别平等研讨会 约200人参加

ក្រសួងទេសចរណ៍ និងរដ្ឋបាលខេត្តស្ទឹងត្រែង រួមគ្នាជំរុញការលើកកម្ពស់សមភាពយេនឌ័រក្នុងវិស័យទេសចរណ៍ ក្រសួងទេសចរណ៍ សហការជាមួយរដ្ឋបាលខេត្តស្ទឹងត្រែង បានរៀបចំសិក្ខាសាលាផ្សព្វផ្សាយគោលនយោបាយស្តីពី «ការលើកកម្ពស់សមភាពយេនឌ័រក្នុងវិស័យទេសចរណ៍» ក្រោមអធិបតីភាពលោកជំទាវ ហ៊ុន ដានី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ រួមជាមួយឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង។ សិក្ខាសាលាដ៏មានសារៈសំខាន់នេះ ធ្វើឡើងនៅសាលាខេត្តស្ទឹងត្រែង ដោយមានការអញ្ជើញចូលរួមពីថ្នាក់ដឹកនាំក្រសួងទេសចរណ៍ ក្រុមការងារថ្នាក់ក្រសួង ថ្នាក់ខេត្ត លោក-លោកស្រីប្រធានមន្ទីរ អង្គភាពជុំវិញខេត្ត តំណាងរដ្ឋបាលក្រុង ស្រុក សមាគមទេសចរណ៍ ប្រតិបត្តិករទេសចរណ៍ យុវជនស.ស.យ.ក យុវជនកាកបាទក្រហម និងផ្នែកពាក់ព័ន្ធសរុបប្រមាណ ២០០នាក់។ ថ្លែងក្នុងពិធី លោកជំទាវរដ្ឋលេខាធិការ បានលើកឡើងថា សិក្ខាសាលានេះ មានគោលបំណងចូលរួមអនុវត្តផែនការយុទ្ធសាស្រ្តនារីរតនៈទី៦ ឆ្នាំ២០២៤-២០២៨ និងគោលនយោបាយស្តីពីការលើកកម្ពស់សមភាពយេនឌ័ររបស់រាជរដ្ឋាភិបាល សំដៅចូលរួមសម្រេចឱ្យបាននូវគោលដៅជាយុទ្ធសាស្រ្តដែលពាក់ព័ន្ធការលើកកម្ពស់សមភាពយេនឌ័រ និងការបង្កើនភាពអង់អាចដល់ស្រ្តី ជាពិសេសផ្តល់ឱកាសនៃការចូលរួម ការលើកកម្ពស់តួនាទី និងស្ថានភាពស្រ្តីនៅក្នុងការងារនិងការអភិវឌ្ឍធនធានមនុស្សប្រកបដោយសមភាព សមធម៌ និងបរិយាបន្ន ក្នុងដែនសមត្ថកិច្ចរបស់ក្រសួងទេសចរណ៍។ លោកជំទាវ ហ៊ុន ដានី បានលើកបន្ថែមផងដែរថា រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃនិងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់យ៉ាងខ្លាំងក្នុងការជំរុញអភិវឌ្ឍសង្គម-សេដ្ឋកិច្ច តាមរយៈការដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បីកំណើន ការងារ សមធម៌ ប្រសិទ្ធភាព និងចីរភាព ដែលផ្តោតសំខាន់លើ «មនុស្ស ផ្លូវ ទឹក ភ្លើង និងបច្ចេកវិទ្យា»។ ជាងនេះទៀត ការលើកកម្ពស់សិទ្ធិ និងការចូលរួមរបស់ស្រ្តីក៏ត្រូវបានឆ្លុះបញ្ចាំងផងដែរនៅក្នុងរបៀបវារៈនៃគោលនយោបាយ ដោយចាត់ទុកស្ត្រីគឺជាស្នូល។ ទន្ទឹមនឹងនេះ ក្រសួងទេសចរណ៍ក្រោមការដឹកនាំរបស់ឯកឧត្តមរដ្ឋមន្ត្រី ហួត ហាក់ ក៏បានដាក់ចេញនូវផែនការយុទ្ធសាស្ត្រលើកកម្ពស់សមភាពយេនឌ័រក្នុងវិស័យរបស់ខ្លួន ស្របតាមយន្តការជាតិ ដើម្បីជំរុញលើកកម្ពស់សមត្ថភាព តួនាទី និងបង្កើនភាពអង់អាចដល់ស្ត្រីដែលជាមន្ត្រីរាជការក្នុងក្របខ័ណ្ឌក្រសួង និងស្ត្រីដែលប្រកបមុខរបរក្នុងឧស្សាហកម្មទេសចរណ៍ ដោយកំណត់ច្បាស់នូវចក្ខុវិស័យ បេសកកម្ម និងសកម្មភាពជាយុទ្ធសាស្ត្រ សំដៅពង្រឹងស្ថានភាពរបស់ស្ត្រីឱ្យកាន់តែមានប្រសិទ្ធភាពក្នុងភាពជាដៃគូ ទាំងក្នុងក្របខ័ណ្ឌនៃការរៀបចំគោលនយោបាយ ការអនុវត្តតួនាទីភារកិច្ច និងការធ្វើសេចក្តីសម្រេច ដើម្បីធានាបាននូវសុខដុមនីយកម្ម និងការអភិវឌ្ឍដែលប្រកបដោយសមភាព សមធម៌ ចីរភាព និងបរិយាបន្ន៕ ខេត្តស្ទឹងត្រែង៖ ថ្ងៃទី២១ ខែឧសភា ឆ្នាំ២០២៦ #Cambodia #greenseasoncambodia #SolidaritySeason #ministryoftourismcambodia #huothak