柬埔寨公务部推行公务员选拔改革 强调公平竞争与能力导向

ក្រសួងមុខងារសាធារណៈ បន្តជំរុញអភិក្រម «ជាប់ដោយមោទនៈ ធ្លាក់ដោយអស់ចិត្ត» ដើម្បីកែលម្អប្រព័ន្ធជ្រើសរើសមន្ត្រីនៅកម្ពុជា រាជធានីភ្នំពេញ៖ ការកែទម្រង់រដ្ឋបាលសាធារណៈនៅកម្ពុជា កំពុងឈានចូលរបត់ថ្មីមួយទៀត ដោយផ្ដោតសំខាន់លើការគ្រប់គ្រងផ្អែកលើលទ្ធផលការងារ និងគោលការណ៍គុណាធិបតេយ្យជាចម្បង។ តាមរយៈវេទិកាកែទម្រង់ស្តីពី «ការកែលម្អប្រព័ន្ធជ្រើសរើសមន្ត្រី» កាលពីរសៀលថ្ងៃទី២៩ ខែមេសា ឆ្នាំ២០២៦ ក្រសួងមុខងារសាធារណៈ បានសង្កត់ធ្ងន់លើអភិក្រមដ៏មានសារៈសំខាន់របស់ប្រមុខរាជរដ្ឋាភិបាលគឺ «ជាប់ដោយមោទនៈ ធ្លាក់ដោយអស់ចិត្ត» និង «រើសឱ្យចំ បំពេញឱ្យត្រូវ»។ វេទិកាកែទម្រង់នាពេលនេះ ជាការរៀបចំលើកទី២ ដោយសាលាភូមិន្ទរដ្ឋបាល នៃក្រសួងមុខងារសាធារណៈ ដោយមានបទបង្ហាញចំនួន៣ និងកិច្ចពិភាក្សាជាបន្ត។ តាមរយៈបទបង្ហាញទី១ ឯកឧត្ដម គង់ សុភី រដ្ឋលេខាធិការ និងជាប្រធានក្រុមការងារបច្ចេកទេសកែលម្អប្រព័ន្ធជ្រើសរើសមន្ត្រីនៃគណៈកម្មាធិការប្រតិបត្តិនៃ គ.វ.រ. បាន ថ្លែងទៅកាន់អង្គវេទិកាអំពី «ទស្សនាទាននៃការកែលម្អប្រព័ន្ធជ្រើសរើសមន្ត្រី និងការប្រើប្រាស់មន្ត្រីផ្អែក លើកិច្ចព្រមព្រៀងការងារ»។ ឯកឧត្ដមរដ្ឋលេខាធិការ បានគូសបញ្ជាក់ថា អភិក្រមដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា គឺជាមូលដ្ឋានគ្រឹះដ៏សំខាន់ក្នុងការឆ្ពោះទៅរកការគ្រប់គ្រងរដ្ឋបាលសាធារណៈបែបថ្មី។ ការអនុវត្តអភិក្រមនេះ បានឆ្លុះបញ្ចាំងយ៉ាងច្បាស់អំពីការលើកកម្ពស់កត្តាអាទិភាពមួយចំនួនរួមមាន ការធានាការប្រកួតប្រជែងដោយស្មើភាព និងយុត្តិធម៌សម្រាប់បេក្ខជនទាំងអស់ ការជ្រើសរើសមន្ត្រីដោយផ្អែកលើសមត្ថភាពពិតប្រាកដ និងសមិទ្ធកម្មការងារស្របតាមមុខតំណែងរួមទាំង ការឆ្លើយតបយ៉ាងសកម្ម ទៅនឹងបរិបទនៃការកែទម្រង់រដ្ឋបាលសាធារណៈរបស់រាជរដ្ឋាភិបាលនីតិកាលទី៧ នៃរដ្ឋសភា។ បទបង្ហាញទី១ នៃវេទិកានេះក៏បានពន្យល់លម្អិតអំពីនីតិវិធីជាក់ស្តែង ក្នុងដំណើរការអនុវត្តការជ្រើសរើស និងគ្រប់គ្រងមន្ត្រីផ្អែកលើកិច្ចព្រមព្រៀង ដែលរួមមាន៖ ដំណាក់កាលនៃការជ្រើសរើស និងការគ្រប់គ្រងប្រចាំថ្ងៃ, យន្តការនៃការវាយតម្លៃសមិទ្ធកម្មលទ្ធផលការងារ, ការផ្តល់ប្រាក់បៀវត្ស និងអត្ថប្រយោជន៍ផ្សេងៗ និងយន្តការនៃការដោះស្រាយវិវាទនានា។ បទបង្ហាញ និងបទពិសោធដែលបានចែករំលែកដោយ ឯកឧត្តម គង់ សុភី ទទួលបានការចាប់អារម្មណ៍ និងការយកចិត្តទុកដាក់យ៉ាងខ្លាំងពីសំណាក់អង្គវេទិកា។ ការកែលម្អប្រព័ន្ធជ្រើសរើសមន្ត្រីនេះ ត្រូវបានរំពឹងថានឹងក្លាយជាកម្លាំងចលករដ៏សំខាន់ ក្នុងការជំរុញឱ្យស្ថាប័នរដ្ឋកាន់តែទំនើប មានសមត្ថភាពខ្ពស់ ខ្លាំង វៃឆ្លាត និងស្អាតស្អំ និងមានប្រសិទ្ធភាពខ្ពស់ក្នុងការបម្រើសេវាសាធារណៈជូនប្រជាពលរដ្ឋ៕