柬埔寨商务参赞赴日本新潟 出席世界锦鲤峰会与日本酷展

លោក ស៊ីន សារ៉ាយ អនុព័ន្ធពាណិជ្ជកម្ម អមស្ថានឯកអគ្គរាជទូតកម្ពុជាប្រចាំប្រទេសជប៉ុន ចូលរួមកិច្ចប្រជុំកំពូល «World Nishikigoi Summit 2026» និងពិព័រណ៍ «Cool Japan Expo 2026» នៅខេត្តនីហ្គាតា ប្រទេសជប៉ុន ... (នីហ្គាតា, ជប៉ុន)៖ នាថ្ងៃទី៧-៨ ខែវិច្ឆិកា ឆ្នាំ២០២៦ នៅខេត្តនីហ្គាតា ប្រទេសជប៉ុន លោក ស៊ីន សារ៉ាយ អនុព័ន្ធពាណិជ្ជកម្ម អមស្ថានឯកអគ្គរាជទូតកម្ពុជាប្រចាំប្រទេសជប៉ុន បានចូលរួមកិច្ចប្រជុំកំពូល «World Nishikigoi Summit 2026» ក្រោមប្រធានបទ «Bridging the World with Nishikigoi to a Future of Tradition and Trust» និងព្រឹត្តិការណ៍ពិព័រណ៍ «Cool Japan Expo 2026» ដែលរៀបចំឡើងដោយគណៈកម្មាធិការប្រតិបត្តិនៃកិច្ចប្រជុំកំពូលត្រីកយពិភពលោក ( World Nishikigoi Summit Executive Committee ៖ រដ្ឋបាលខេត្តនីហ្គាតា និងសមាគម All Japan Nishikigoi Promotion Association) និងគាំទ្រដោយក្រសួងការបរទេសជប៉ុន ក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន និងក្រសួងកសិកម្ម រុក្ខាប្រមាញ់ និងនេសាទជប៉ុន។ កិច្ចប្រជុំកំពូល «World Nishikigoi Summit 2026» នេះ មានការចូលរួមពី ឯកឧត្តម អភិបាលខេត្តនីហ្គាតា, បណ្តាអភិបាលក្រុង នៃខេត្តនីហ្គាតា, តំណាងក្រសួង-ស្ថាប័នរដ្ឋាភិបាលជប៉ុន, សមាជិកគណៈកម្មាធិការប្រតិបត្តិនៃកិច្ចប្រជុំកំពូលត្រីកយពិភពលោក, វិស័យឯកជនជប៉ុនពាក់ព័ន្ធនឹងការចិញ្ចឹម និងជំនួញត្រីកយ (Nishikigoi), ព្រមទាំងឯកអគ្គរាជទូត-ឯកអគ្គរដ្ឋទូត និងតំណាងស្ថានទូតបរទេសនានាប្រចាំប្រទេសជប៉ុន សរុបប្រមាណ ១៥០ នាក់ មកពី ២១ ប្រទេស។ ព្រឹត្តិការណ៍សំខាន់ៗក្នុងកិច្ចប្រជុំកំពូលនេះ រួមមាន៖ ពិព័រណ៍កសិកម្ម និងទេសចរណ៍ជប៉ុន «Cool Japan Expo 2026», កម្មវិធី «Niigata Prefecture Nishikigoi Show» ដែលមានការតាំងបង្ហាញត្រីកយ ជ្រើសរើសពិសេសជិត ៦០០ ក្បាល, ទស្សនកិច្ចសិក្សានៅកសិដ្ឋានចិញ្ចឹមត្រីកយ «Nishikigoi no Sato» ដែលជាទីកន្លែងកំណើតដើមនៃត្រីកយ និងកម្មវិធីលែងត្រីកយ, ព្រមទាំងកម្មវិធីជំនួបសម្តែងការគួរសមជាមួយ ឯកឧត្តម អភិបាលខេត្តនីហ្គាតា និងបណ្តាអភិបាលក្រុងក្នុងខេត្តនីហ្គាតា។ កិច្ចប្រជុំកំពូលឆ្នាំ២០២៦ បានផ្តោតលើការចែកចាយប្រកបដោយតម្លាភាព ការធានាគុណភាព និងវិធានការអន្តរជាតិនានា ដើម្បីការពារសភាវៈពិតនៃត្រីកយរបស់ជប៉ុន។ នៅក្នុងសុន្ទរកថាគន្លឹះ និងកិច្ចពិភាក្សាក្នុងកិច្ចប្រជុំនេះ ក៏បានលើកឡើងអំពីតម្លៃវប្បធម៌នៃត្រីកយ ក្នុងនាមជា «ត្រីជាតិ» របស់ប្រទេសជប៉ុន ព្រមទាំងស្ថានភាព និងបញ្ហាប្រឈមនានា ទាក់ទងនឹងអ្នកបង្កាត់ពូជ និងអ្នកជួញដូរត្រីកយ នៅជុំវិញពិភពលោកផងដែរ។ ក្នុងឱកាសជួបសម្តែងការគួរសមជាមួយ ឯកឧត្តម HIDEYO Hanazumi អភិបាលខេត្តនីហ្គាតា និងជាប្រធានគណៈកម្មាធិការប្រតិបត្តិនៃកិច្ចប្រជុំកំពូលត្រីកយពិភពលោក និងឯកឧត្តម ETSUO Miyazaki អភិបាលក្រុងអូជីយ៉ា (Ojiya City), លោកអនុព័ន្ធពាណិជ្ជកម្ម បានជម្រាបជូនអំពីកាលានុវត្តភាពវិនិយោគ និងផលិតផលសក្តានុពលខ្ពស់របស់កម្ពុជា ព្រមទាំងបានស្នើសុំរដ្ឋបាលខេត្តនីហ្គាតា ឱ្យជួយជំរុញ និងលើកទឹកចិត្តដល់វិនិយោគិនជប៉ុនក្នុងខេត្ត ឱ្យទៅស្វែងយល់ និងធ្វើធុរកិច្ចវិនិយោគនៅកម្ពុជា លើវិស័យកសិកម្ម ឧស្សាហកម្មកែច្នៃអាហារ និងសេវាកម្មទេសចរណ៍។ --- Mr. SIN Saray, Trade Attaché to the Royal Embassy of Cambodia to Japan, Participated in the "World Nishikigoi Summit 2026" and "Cool Japan Expo 2026" in Niigata Prefecture, Japan ... (Niigata, Japan): On 7–8 November 2026, in Niigata Prefecture, Japan, Mr. SIN Saray, Trade Attaché to the Royal Embassy of Cambodia to Japan, attended the "World Nishikigoi Summit 2026"—held under the theme “Bridging the World with Nishikigoi to a Future of Tradition and Trust”—as well as the "Cool Japan Expo 2026". These events were organized by the World Nishikigoi Summit Executive Committee (comprising the Niigata Prefectural Government and the All Japan Nishikigoi Promotion Association) and supported by Japan’s Ministry of Foreign Affairs; Ministry of Economy, Trade and Industry; and Ministry of Agriculture, Forestry and Fisheries. The "World Nishikigoi Summit 2026" was attended by His Excellency the Governor of Niigata Prefecture, Mayors within Niigata Prefecture, representatives of Japanese ministries and government institutions, members of the World Nishikigoi Summit Executive Committee, the Japanese private sector specializing in Nishikigoi breeding and dealership, as well as Ambassadors and representatives of foreign embassies in Japan, totaling approximately 150 participants from 21 countries. … ភ្ជាប់មកកាន់ក្រសួងពាណិជ្ជកម្ម តាមតំណភ្ជាប់ខាងក្រោម៖ Connect with Ministry of Commerce: 🌐 [Facebook ](https://web.facebook.com/moc.gov.kh) 🌐 [Telegram](https://t.me/mocnewsfeed) 🌐 [Website](https://www.moc.gov.kh/) 🌐 [YouTube](https://www.youtube.com/@mocgovkhcambodia) 🌐 [X (Twitter](https://twitter.com/MoCCambodia))