中国重申最可信赖伙伴 助柬建工业走廊 联手打击电诈

ប្រទេសចិន ក្នុងនាមជាដៃគូយុទ្ធសាស្ត្រ ដ៏គួរឱ្យទុកចិត្តបំផុតរបស់កម្ពុជា នឹងបន្តគាំទ្រយ៉ាងមុតមាំដល់កម្ពុជា ក្នុងការស្វែងរកមាគ៌ាអភិវឌ្ឍន៍ ដែលសមស្របនឹងស្ថានភាពជាក់ស្តែងរបស់ប្រទេស។ ប្រទេសចិនត្រៀមខ្លួនជាស្រេច ក្នុងការពង្រឹងការទំនាក់ទំនងជាយុទ្ធសាស្ត្រជាមួយកម្ពុជា ដើម្បីរួមគ្នាដោះស្រាយបញ្ហា ប្រឈមពីខាងក្រៅ និងជំរុញដំណើរការទំនើបកម្ម របស់ប្រទេសទាំងពីរឱ្យកាន់តែប្រសើរឡើង។ ចិននិងកម្ពុជា គួរតែត្រៀមរៀបចំ ឱ្យបានល្អសម្រាប់ការផ្លាស់ប្តូរទស្សនកិច្ចកម្រិតខ្ពស់ នៅដំណាក់កាលខាងមុខ ការពារផលប្រយោជន៍យុទ្ធសាស្ត្ររួមរបស់ប្រទេសទាំងពីរ ជំរុញការអភិវឌ្ឍ «ច្រករបៀងអភិវឌ្ឍន៍ឧស្សាហកម្ម» និង «ច្រករបៀងត្រី និងអង្ករ» ព្រមទាំងពង្រឹងកិច្ចសហប្រតិបត្តិការជាក់ស្តែងលើវិស័យហេដ្ឋារចនាសម្ព័ន្ធ កសិកម្ម និងវិស័យផ្សេងៗទៀត។ ភាគីទាំងពីរ គួរតែបន្តបង្ក្រាបយ៉ាងម៉ឺងម៉ាត់ លើបទល្មើសឆបោកតាមទូរគមនាគមន៍ និងតាមប្រព័ន្ធអនឡាញ ដើម្បីធានាថាបទល្មើសទាំងនេះ នឹងមិនវិលត្រឡប់មកវិញឡើយ ព្រមទាំងពង្រឹងការសម្របសម្រួលគ្នាលើវេទិកាពហុភាគី៕ ប្រភព៖ ទូតចិនប្រចាំកម្ពុជា