柬埔寨勋爵协会成员捐资44套住房 援助上丁省退伍军人

អ្នកឧកញ៉ា អ៊ឹង លីហេង សមាជិកក្រុមប្រឹក្សាភិបាល នៃសមាគមឧកញ៉ាកម្ពុជា និងជាទីប្រឹក្សាសម្ដេចតេជោ ហ៊ុន សែន ប្រធានព្រឹទ្ធសភា ព្រមទាំងភរិយាគឺអ្នកឧកញ៉ា តាំង ហ្គិចលៀង បានចូលរួមឧបត្ថម្ភថវិកាជួយសាងសង់ផ្ទះចំនួន ៤៤ខ្នងជូនអតីតយុទ្ធជន និងនិវត្តជនក្នុងខេត្តស្ទឹងត្រែងដែលមានជីវភាពខ្វះខាត គ្មានដី ឬគ្មានផ្ទះស្នាក់នៅ។ ការចូលរួមឧបត្ថម្ភថវិកានេះបានធ្វើឡើងស្របតាមប្រសាសន៍ដ៏ខ្ពង់ខ្ពស់របស់សម្តេចតេជោកាលពីថ្ងៃទី៦ ខែកក្កដា ឆ្នាំ២០២៦ ដែលបានណែនាំឱ្យអាជ្ញាធរគ្រប់លំដាប់ថ្នាក់បន្តយកចិត្តទុកដាក់ចំពោះអតីតយុទ្ធជន និងនិវត្តន៍ជនពីព្រោះពួកគាត់ជាអ្នកដែលធ្លាប់បានចូលរួមចំណែកយ៉ាងសំខាន់ក្នុងកិច្ចការអភិវឌ្ឍន៍ប្រទេសជាតិ។ ជាមួយគ្នានេះ អ្នកឧកញ៉ា អ៊ឹង លីហេង ក៏បានអមដំណើរសម្ដេចតេជោ ក្នុងឱកាសចុះជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានា ជុំវិញខេត្តស្ទឹងត្រែងនាព្រឹកថ្ងៃទី៩ ខែកក្កដា ឆ្នាំ២០២៦ម្សិលមិញនេះផងដែរ។ សូមបញ្ជាក់ថា អ្នកឧកញ៉ា អ៊ឹង លីហេង និងអ្នកឧកញ៉ា តាំង ហ្គិចលៀង ដែលត្រូវបានគេស្គាល់ថា ជាស្ថាបនិក និងជាថ្នាក់ដឹកនាំជាន់ខ្ពស់ នៃក្រុមហ៊ុន H&L Group Co., Ltd. គឺជាធុរជនដែលមានកិត្តិនាម និងជាសប្បុរសជនដែលបានចូលរួមឧបត្ថម្ភថវិកាផ្ទាល់ខ្លួនជាបន្តបន្ទាប់ទាំងតាមរយៈសមាគមឧកញ៉ាកម្ពុជា ក៏ដូចជាស្ថាប័នមនុស្សធម៌ និងសកម្មភាពសង្គមកិច្ចជាច្រើនទៀតដូចជា មន្ទីរពេទ្យគន្ធបុប្ជា, កាកបាទក្រហមកម្ពុជា, ការប្រយុទ្ធប្រឆាំងការរីករាលដាលនៃជំងឺកូវីត១៩, មូលនិធិសម្តេចអគ្គមហាសេនាបតីតេជោ ព្រមទាំងមូលនិធិជួយដល់វីរៈកងទ័ព និងជនភៀសសឹកជាដើម។ ក្រៅពីសកម្មភាពធុរកិច្ចដែលបានរួមចំណែកអភិវឌ្ឍន៍សេដ្ឋកិច្ចសង្គមតាមរយៈការផ្តល់ឱកាសការងារជូនប្រជាជនកម្ពុជា អ្នកឧកញ៉ា អ៊ឹង លីហេង ក៏មានតួនាទីជាប្រធានអង្គការមូលនិធិរ៉ូតថារីនៅកម្ពុជា និងប្រធានអង្គការមូលនិធិដើម្បីឧត្តមភាពនៃការអប់រំផងដែរ។