司法部与美国使馆磋商 拟共建指纹数据库系统

ឯកឧត្តម កេង សុម៉ារិទ្ធ រដ្ឋលេខាធិការក្រសួងយុត្តិធម៌ បានអញ្ជើញជួបពិភាក្សាការងារជាមួយតំណាងស្ថានទូតសហរដ្ឋអាម៉េរិក ប្រចាំព្រះរាជាណាចក្រកម្ពុជា ==================== នាព្រឹកថ្ងៃពុធ ៩រោច ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៤ ខែវិច្ឆិកា ឆ្នាំ២០២៦ នៅទីស្តីការក្រសួងយុត្តិធម៌ ដោយទទួលបានការអនុញ្ញាតដ៏ខ្ពង់ខ្ពស់ ពីឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌, ឯកឧត្តម កេង សុម៉ារិទ្ធ បានអញ្ជើញដឹកនាំក្រុមការងារជួបពិភាក្សាការងារលើការពិនិត្យលទ្ធភាពក្នុងការសហការរៀបចំប្រព័ន្ធផ្ទុកទិន្នន័យម្រាមដៃជាមួយតំណាងស្ថានទូតសហរដ្ឋអាម៉េរិក។ នៅក្នុងជំនួបនេះមានគោលបំណងដើម្បីពិភាក្សាពិនិត្យលទ្ធភាពក្នុងការសហការលើរបៀបវារៈចំនួន៣​ ដូចខាងក្រោម៖ ១-កិច្ចសហការជាមួយរាជរដ្ឋាភិបាលកម្ពុជាក្នុងការស្កែន និងថតចម្លងស្នាមម្រាមដៃជាប្រព័ន្ធឌីជីថល ២-ស្នើផ្តល់ជំនួយជាប្រព័ន្ធស្នាមម្រាមដៃឌីជីថល ដោយឥតគិតថ្លៃពីស្ថានទូតសហរដ្ឋអាមេរិកប្រចាំប្រទេសកម្ពុជា ៣-ផ្តល់ការបណ្តុះបណ្តាលបន្ថែមពាក់ព័ន្ធនឹងការប្រមូលស្នាមម្រាមដៃ។ នៅក្នុងជំនួបនេះផងដែរក៏មានការចូលរួមធ្វើបទបង្ហាញពាក់ព័ន្ធនឹងឧបករណ៍​ប្រព័ន្ធ និងរបៀបនៃការប្រើប្រាស់ប្រព័ន្ធនៃការប្រមូលចងក្រងទិន្នន័យស្នាមម្រាមដៃរបស់សហរដ្ឋអាមេរិក ដោយភ្នាក់ងារពិសេស​មកពីអង្គភាពស៊ើបអង្កេតឧក្រិដ្ឋកម្មកងទ័ពជើងទឹកសហរដ្ឋអាមេរិក​, អ្នកឯកទេសផ្នែកអត្ដសញ្ញាណ​នៃអង្គភាពស៊ើបអង្កេតឧក្រិដ្ឋកម្មកងទ័ពជើងទឹកសហរដ្ឋអាមេរិក និងមន្ដ្រីស៊ើបអង្កេតឧក្រិដ្ឋកម្មក្រៅប្រទេស ស្ថានទូតអាមេរិកប្រចាំកម្ពុជា។​ គូសបញ្ជាក់ផងដែរថា ភ្នាក់ងារអនុវត្ដច្បាប់របស់ស្ថានទូតអាម៉េរិកប្រចាំប្រទេសកម្ពុជាក៏បានធ្វើពិភាក្សាការងារនេះជាមួយក្រសួងស្ថាប័នពាក់ព័ន្ធមួយចំនួនរួមមាន​៖ ក្រសួងមហាផ្ទៃ កងរាជអាវុធហត្ថលើផ្ទៃប្រទេស និងអគ្គនាយកដ្ឋានអន្ដោប្រវេសន៍នៃក្រសួងមហាផ្ទៃរួចមកហើយផងដែរ។