司法部出席第26次国家民主发展委员会会议

ឯកឧត្តមបណ្ឌិត ជិន ម៉ាលីន រដ្ឋមន្ត្រីស្តីទីនៃក្រសួងយុត្តិធម៌ តំណាងដ៏ខ្ពង់ខ្ពស់ឯកឧត្តមឧបនាយករដ្ឋមន្រ្តី បានអញ្ជើញចូលរួមក្នុងកិច្ចប្រជុំលើកទី២៦ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ(គ.ជ.អ.ប.) ==================== នាព្រឹកថ្ងៃអង្គារ ៤កើត ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៥ ខែកញ្ញា ឆ្នាំ២០២៦ ឯកឧត្តមបណ្ឌិត ជិន ម៉ាលីន រដ្ឋមន្ត្រីស្តីទីនៃក្រសួងយុត្តិធម៌ តំណាងដ៏ខ្ពង់ខ្ពស់ឯកឧត្តមឧបនាយករដ្ឋមន្រ្តី បានអញ្ជើញចូលរួមក្នុងកិច្ចប្រជុំលើកទី២៦ របស់គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ(គ.ជ.អ.ប.) នៅទីស្តីការក្រសួងមហាផ្ទៃ។ កិច្ចប្រជុំនេះ ដឹកនាំដោយ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប. ក្នុងគោលបំណងពិនិត្យ ពិភាក្សា និងអនុម័តលើរបៀបវារៈសំខាន់ៗមួយចំនួនរួមមាន៖ (១). ការពិនិត្យ និងអនុម័តលើ កំណត់ហេតុកិច្ចប្រជុំ គ.ជ.អ.ប.លើកទី២៥ (២).ការពិនិត្យ និងអនុម័តលើរបាយការណ៍វឌ្ឍនភាពនៃការអនុវត្ត ផែនការសកម្មភាព និងថវិកាប្រចាំឆមាសទី១ របស់ គ.ជ.អ.ប. និងទិសដៅការងារបន្តសម្រាប់ឆមាសទី២ ឆ្នាំ២០២៦ របស់ គ.ជ.អ.ប. (៣).ការពិនិត្យ និងអនុម័តលើសៀវភៅណែនាំស្តីពីការអនុវត្តគម្រោងមូលនិធិឃុំ សង្កាត់ (៤). ការពិនិត្យ និងអនុម័តលើឯកសារយុទ្ធសាស្ត្រស្តីពីការបញ្ជាបយេនឌ័រ បរិយាបន្ន និងសមធម៌សង្គមក្នុង កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិដំណាក់កាលទី២(២០២១-២០៣០) (៥). ការពិនិត្យ និងអនុម័តលើសេចក្តីព្រាងយុទ្ធសាស្ត្រស្តីពីនិរន្តរភាពការងារគណនេយ្យភាពសង្គមនៅថ្នាក់ឃុំ សង្កាត់ និង (៦). បញ្ហាប្រឈមផ្សេងៗទៀត។ កិច្ចប្រជុំខាងលើ មានការអញ្ជើញចូលរួមដោយឯកឧត្តមឧបនាយករដ្ឋមន្ត្រី ឯកឧត្តមទេសរដ្ឋមន្ត្រី ឯកឧត្តម លោកជំទាវរដ្ឋមន្ត្រី និងថ្នាក់ដឹកនាំរដ្ឋលេខាធិការប្រចាំការ រដ្ឋលេខាធិការ ដែលទទួលបន្ទុកការងារកំណែទម្រង់វិមជ្ឈការ និងវិសហមជ្ឈការ អភិបាលនៃគណៈអភិបាលខេត្ត/ក្រុង ព្រមទាំងមន្ត្រីពាក់ព័ន្ធតំណាងក្រសួង-ស្ថាប័ន សរុបប្រមាណ ១៦០រូប។