巴扬平台行政审批数字化覆盖率达100% 提升政府办事效率

«ថ្នាលបាយ័ន» នឹងជាសមិទ្ធផលមួយបន្ថែមទៀតនៃការកែទម្រង់រដ្ឋបាលសាធារណៈ ដែលជាការសម្រេចបានតាមរយៈកិច្ចសហការរវាងក្រសួង ស្ថាប័ន នៅក្នុងកិច្ចប្រជុំលើកទី៣ របស់គណៈកម្មាធិការលើកកម្ពស់អភិបាលកិច្ច កាលពីថ្ងៃទី១៦ ខែកញ្ញា ឆ្នាំ២០២៦ ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ បានគូសបញ្ជាក់ពីជោគជ័យដ៏លេចធ្លោក្នុងការដាក់ឱ្យដំណើរការថ្នាលឌីជីថល «ថ្នាលបាយ័ន»។ ការធ្វើបរិវត្តកម្មប្រព័ន្ធគ្រប់គ្រងនេះ បានជួយឱ្យការបញ្ជូន និងប្រគល់-ទទួលឯកសាររដ្ឋបាលនៅតាមបណ្តាក្រសួង ស្ថាប័ន កាន់តែមានភាពរហ័ស តម្លាភាព និងប្រសិទ្ធភាពខ្ពស់បំផុត ដោយបច្ចុប្បន្នប្រព័ន្ធនេះត្រូវបានអនុវត្តក្នុងអត្រាស្ទើរតែ ១០០% ព្រមទាំងមានមន្ត្រីបង្គោលជាង ៣០០នាក់ ទទួលបានការបណ្តុះបណ្តាល។ ទន្ទឹមនឹងសមិទ្ធផលឌីជីថលដ៏សំខាន់នេះ ឯកឧត្តមក៏បានរំលេចពីវឌ្ឍនភាពនៃការរៀបចំយន្តការស្ថាប័ន ដើម្បីគាំទ្រដល់ការកែទម្រង់អភិបាលកិច្ច ដែលជាស្នូលនៃយុទ្ធសាស្ត្របញ្ចកោណ។ សមិទ្ធផលទាំងនោះរួមមាន ការបង្កើតគណៈកម្មការលើកកម្ពស់អភិបាលកិច្ច ការរៀបចំស្តង់ដារអគ្គលេខាធិការដ្ឋាន និងការបង្កើតបណ្តាញអគ្គលេខាធិការនៅគ្រប់ក្រសួង ស្ថាប័នរដ្ឋ។ លើការរៀបចំមុខងារជាក់លាក់សម្រាប់ក្រសួង ស្ថាប័ន ឯកឧត្តមបានបន្ថែមថា ការបែងចែក និងកំណត់មុខងារច្បាស់លាស់ទាំងនេះ មិនមែនធ្វើឱ្យក្រសួងនីមួយៗដាច់ពីគ្នានោះទេ ផ្ទុយទៅវិញគឺជាការតភ្ជាប់ការដ្ឋានកែទម្រង់ទាំងអស់ឱ្យមានភាពប្រទាក់ក្រឡាគ្នាក្នុងជវភាពនៃប្រព័ន្ធតួអង្គតែមួយ ដើម្បីបាញ់ឆ្ពោះទៅកាន់គោលដៅរួម គឺប្រសិទ្ធភាពរដ្ឋបាលសាធារណៈកម្ពុជា៕