公务员管理与行政改革宣讲会在磅通省举行

ថ្នាក់ដឹកនាំក្រសួងមុខងារសាធារណៈ អញ្ជើញជាអធិបតី និងធ្វើបទបង្ហាញក្នុងសិក្ខាសាលាផ្សព្វផ្សាយស្តីពីការគ្រប់គ្រងមន្ត្រី និងការកែទម្រង់រដ្ឋបាលសាធារណៈ នៅខេត្តកំពង់ធំ កំពង់ធំ៖ កាលពីរសៀលថ្ងៃទី២១ ខែសីហា ឆ្នាំ២០២៦ មន្ទីរមុខងារសាធារណៈខេត្តកំពង់ធំ និងរដ្ឋបាលខេត្ត ដោយសហការជាមួយក្រសួងមុខងារសាធារណៈ បានរៀបចំសិក្ខាសាលាផ្សព្វផ្សាយ លិខិតបទដ្ឋានគតិយុត្តពាក់ព័ន្ធការគ្រប់គ្រងមន្ត្រី និងការអនុវត្តវិធានការគន្លឹះទាំង៣ នៃកម្មវិធីជាតិកែទម្រង់រដ្ឋបាលសាធារណៈ។ សិក្ខាសាលានេះប្រព្រឹត្តទៅនៅសាលាខេត្តកំពង់ធំ ក្រោមសហធិបតីភាព ឯកឧត្តម ស សាម៉ីឌី រដ្ឋលេខាធិការក្រសួងមុខងារសាធារណៈ ឯកឧត្តម ជាតិ ស៊ីវុត្ថា សមាជិកក្រុមប្រឹក្សាខេត្ត និងលោក លី វេត អភិបាលរងខេត្តកំពង់ធំ។ សិក្ខាសាលារៀបចំឡើងក្នុងគោលបំណងពង្រឹងសមត្ថភាព ការទទួលខុសត្រូវ និងការយល់ដឹងឱ្យកាន់តែស៊ីជម្រៅដល់មន្ត្រីរាជការគ្រប់លំដាប់ថ្នាក់ក្នុងខេត្តកំពង់ធំ អំពីច្បាប់ លិខិតបទដ្ឋានគតិយុត្ត និងយន្តការថ្មីៗ សំដៅជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈឱ្យសម្រេចបានលទ្ធផលជាក់ស្តែង ស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាល។ ក្នុងសិក្ខាសាលានេះ ថ្នាក់ដឹកនាំក្រសួងមុខងារសាធារណៈ បានធ្វើបទបង្ហាញយ៉ាងក្បោះក្បាយទៅលើឯកសារបទដ្ឋានគតិយុត្តសំខាន់ៗ ព្រមទាំងបើកវេទិកាពិភាក្សា ដើម្បីដោះស្រាយរាល់ចម្ងល់ ភាពស្មុគស្មាញ និងបញ្ហាប្រឈមនានាដែលកើតមានឡើងក្នុងការគ្រប់គ្រងមន្ត្រីរាជការ នៅតាមមន្ទីរ-អង្គភាព និងរដ្ឋបាលថ្នាក់ក្រោមជាតិ។ យន្តការនេះ បានជួយឱ្យអ្នកចូលរួមយល់កាន់តែច្បាស់អំពីរបៀបអនុវត្តលិខិតបទដ្ឋានគតិយុត្តថ្មីៗ កាត់បន្ថយភាពស្រពិចស្រពិល និងធានាបានថាការគ្រប់គ្រងមន្ត្រីរាជការនៅមូលដ្ឋាន គឺធ្វើឡើងត្រឹមត្រូវតាមស្តង់ដាគតិយុត្តតែមួយ។ សិក្ខាសាលាបានបិទបញ្ចប់ប្រកបដោយលទ្ធផលជាផ្លែផ្កា និងសម្រេចបានជោគជ័យគួរជាទីមោទនៈ។ តាមរយៈការចូលរួមយ៉ាងសកម្ម និងការពិភាក្សាដោះដូរមតិយោបល់យ៉ាងផុសផុលពេញនៃអង្គសិក្ខាសាលា ថ្នាក់ដឹកនាំ និងសិក្ខាកាមទាំងអស់ បានបង្ហាញការប្តេជ្ញាចិត្តយ៉ាងមុតមាំ ក្នុងការបំប្លែងចំណេះដឹងទ្រឹស្តី និងយន្តការគតិយុត្តថ្មីៗទាំងនេះ ទៅជាសកម្មភាពអនុវត្តជាក់ស្តែង ព្រមទាំងត្រៀមខ្លួនចែករំលែកបន្តដល់មន្ត្រីរាជការក្រោមឱវាទក្នុងស្ថាប័ន-អង្គភាពរៀងៗខ្លួន ដើម្បីធានាបាននូវការយល់ដឹងជាធ្លុងមួយ។ លើសពីនេះ ការយល់ដឹងស៊ីជម្រៅនេះ នឹងក្លាយជាកាតាលីករដ៏មានឥទ្ធិពល ក្នុងការលើកកម្ពស់វប្បធម៌ការងារ បង្កើនប្រសិទ្ធភាពស្ថាប័ន ពង្រឹងភាពស្អាតស្អំ និងជំរុញគុណភាពនៃការផ្តល់សេវាសាធារណៈនៅមូលដ្ឋាន ឆ្លើយតបទៅនឹងតម្រូវការជាក់ស្តែង និងក្តីរំពឹងទុករបស់ប្រជាពលរដ្ឋឱ្យកាន់តែមានភាពរហ័ស តម្លាភាព ស្របតាមទិសដៅកែទម្រង់ដ៏មុតស្រួចរបស់រាជរដ្ឋាភិបាល៕