洪玛奈强调行政改革以民众满意度为核心

សម្តេចធិបតី ហ៊ុន ម៉ាណែត គូសបញ្ជាក់ពីរបៀបកែទម្រង់រដ្ឋបាលសាធារណៈ «ដើរសន្សឹមៗ តែទិសដៅនឹងនរ» ដោយរក្សាចំនួនក្រសួង និងពង្រឹងប្រសិទ្ធភាពផ្ទៃក្នុង ខេត្តក្រចេះ ៖ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវផ្លូវជាតិលេខ៧៣ និងផ្លូវខេត្តលេខ៣៧៧ ព្រមទាំង៣៧៧A នាថ្ងៃទី២៥ ខែសីហា ឆ្នាំ២០២៦ ក្រោមឥណទានសម្បទានរបស់ធនាគារពិភពលោក សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានថ្លែងគូសបញ្ជាក់យ៉ាងច្បាស់អំពីទិសដៅយុទ្ធសាស្ត្រនៃការកែទម្រង់រដ្ឋបាលសាធារណៈសម្រាប់នីតិកាលទី៧ នៃរដ្ឋសភា។ ជាទិសដៅយុទ្ធសាស្ត្រ កម្ពុជានឹងមិនចម្លងតាមគំរូរចនាសម្ព័ន្ធរដ្ឋបាលពីប្រទេសណាមួយឡើយ ដោយត្រូវអនុវត្តតាមអភិក្រម «ដើរសន្សឹមៗ តែទិសដៅរបស់យើងគឺនឹងនរ»។ រាជរដ្ឋាភិបាល មិនជ្រើសរើសវិធីសាស្ត្រកែទម្រង់បែបសម្រុក ឬរុះរើរចនាសម្ព័ន្ធទាំងបង្ខំ ដែលអាចប៉ះពាល់ដល់ស្ថិរភាពនយោបាយ និងប្រតិបត្តិការងារប្រចាំថ្ងៃនោះទេ។ ផ្ទុយទៅវិញ ការកែទម្រង់នេះត្រូវដើរទៅមុខដោយជំហានម៉ត់ចត់ ផ្អែកលើការសិក្សាស្រាវជ្រាវ និងការវាយតម្លៃផលប៉ះពាល់ជាក់ស្តែង ដើម្បីធានានូវនិរន្តរភាព និងផលប្រយោជន៍ជាតិយូរអង្វែង ស្របតាមយុទ្ធសាស្ត្របញ្ចកោណ-ដំណាក់កាលទី១។ ក្នុងស្មារតីនេះ រាជរដ្ឋាភិបាលបានប្រកាសជំហរម៉ឺងម៉ាត់ថា មកទល់ពេលនេះ គ្មានគម្រោងកាត់បន្ថយ ឬបង្កើតក្រសួងស្ថាប័នថ្មីនោះទេ។ សម្តេចធិបតី បានដាស់តឿនថា នេះលែងជាពេលដែលត្រូវចោទសួរថាតើ ក្រសួងច្រើន ឬតិច ទៀតហើយ។ សំណួរស្នូលដែលគ្រប់ស្ថាប័នត្រូវដោះស្រាយចំពោះមុខគឺ ការធានាថាតើក្រសួងស្ថាប័នដែលមានស្រាប់ រៀបចំបានមានប្រសិទ្ធភាពហើយឬនៅ ដែលការណ៍នេះតម្រូវឱ្យមានការអនុវត្តយ៉ាងខ្ជាប់ខ្ជួននូវអភិក្រម «ពង្រឹង ជាជាងពង្រីក»។ ដើម្បីលុបបំបាត់ការងារជាន់ភារកិច្ចគ្នា និងបញ្ហារចនាសម្ព័ន្ធ «ធំក្បាល ជើងតូច» រាជរដ្ឋាភិបាលនឹងបន្តពង្រឹងផ្ទៃក្នុងតាមក្រសួងស្ថាប័ននីមួយៗ តាមរយៈសសរស្តម្ភគន្លឹះចំនួនបី។ សសរស្តម្ភទាំងនោះរួមមាន ការពង្រឹងរចនាសម្ព័ន្ធតាមរយៈការរៀបចំខ្សែបណ្តោយនៃការទទួលខុសត្រូវឱ្យបានច្បាស់លាស់ ការពង្រឹងមុខងារ និងប្រព័ន្ធការងារតាមរយៈការធ្វើវិភាគមុខងារលម្អិតដើម្បីធានាថាការអនុវត្តការងារចំគោលដៅ និងការពង្រឹងធនធានមនុស្ស។ ទន្ទឹមនឹងនេះ យន្តការដ៏សំខាន់មួយទៀតគឺការអនុវត្តប្រព័ន្ធលើកទឹកចិត្តគាំទ្រសមិទ្ធកម្ម និងវាយតម្លៃមន្ត្រី ផ្អែកលើប្រព័ន្ធសមិទ្ធកម្ម (Performance-based) ដើម្បីបង្កើនប្រសិទ្ធភាព និងសមត្ថភាពស្ថាប័នរដ្ឋបាលសាធារណៈឱ្យកាន់តែរឹងមាំ៕