终身学习全国委员会首次会议召开 韩春那龙主持

កិច្ចប្រជុំលើកទី១ នៃគណៈកម្មាធិការជាតិ សម្រាប់ការសិក្សាពេញមួយជីវិត ស្តីពីការផ្សព្វផ្សាយវឌ្ឍនភាពការងារ និងទិសដៅអនុវត្តបន្ត។ — រាជធានីភ្នំពេញ៖ ព្រឹកថ្ងៃទី៣០ ខែតុលា ឆ្នាំ២០២៦ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការក្រសួងសុខាភិបាល និងក្រុមការងារបច្ចេកទេស បានអញ្ជើញចូលរួមកិច្ចប្រជុំលើកទី១ នៃ គ.ជ.ស.ជ ក្រោមប្រធានបទ «ការផ្សព្វផ្សាយវឌ្ឍនភាពការងារ និងទិសដៅអនុវត្តបន្ត» ក្រោមអធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការជាតិ សម្រាប់ការសិក្សាពេញមួយជីវិត (គ.ជ.ស.ជ)។ ឯកឧត្តមបណ្ឌិតសភាចារ្យ ប្រធាន​អង្គប្រជុំបានគូសបញ្ជាក់ថា រាជរដ្ឋាភិបាលកម្ពុជាបានដាក់ចេញនូវគោលនយោបាយជាតិ ស្តីពីការសិក្សាពេញមួយជីវិត ដោយមានចក្ខុវិស័យអភិវឌ្ឍន៍ប្រជាពលរដ្ឋកម្ពុជា គ្រប់រូបឱ្យមានវិជ្ជាសម្បទា បំណិនសម្បទា ចរិយាសម្បទា កាយសម្បទា និងគុណសម្បទា ដើម្បីចូលរួមចំណែកក្នុងការជំរុញកំណើនសេដ្ឋកិច្ច និងលើកកម្ពស់សុខុមាលភាព និងសុខដុមរមនារបស់បុគ្គល គ្រួសារ និងសង្គមជាតិ។ កិច្ចប្រជុំរយៈពេលមួយថ្ងៃនេះ មានរបៀបវារៈសំខាន់ចំនួនពីរ រួមមាន៖ ទី១៖ ពិនិត្យ និងអនុម័តបទបញ្ជាផ្ទៃក្នុងរបស់ គ.ជ.ស.ជ ដើម្បីកំណត់នូវគោលការណ៍ និងរបៀបរបបការងារឱ្យបានច្បាស់លាស់ សំដៅធានាឱ្យដំណើរការបំពេញការងារ របស់គណៈកម្មាធិការប្រព្រឹត្តទៅដោយមានរបៀបរៀបរយ តម្លាភាព គណនេយ្យភាព និងប្រសិទ្ធភាព។ ទី២៖ ពិនិត្យ និងអនុម័តផែនការសកម្មភាពសម្រាប់ការអនុវត្តគោលនយោបាយជាតិស្តីពី ការសិក្សាពេញមួយជីវិត ឆ្នាំ២០២៥-២០២៨ ដែលជាក្របខណ្ឌសកម្មភាពរួមសម្រាប់ក្រសួង ស្ថាប័ន ដៃគូអភិវឌ្ឍន៍ និងភាគីពាក់ព័ន្ធ ក្នុងការរៀបចំ និងអនុវត្តសកម្មភាពតាមតួនាទី និងភារកិច្ចរៀងៗខ្លួន ប្រកបដោយភាពស៊ីសង្វាក់គ្នា និងមានការសម្របសម្រួលច្បាស់លាស់ ដើម្បីរួមគ្នាសម្រេចបាននូវគោលដៅ និងចក្ខុវិស័យនៃគោលនយោបាយជាតិ។ បន្ទាប់ពីកិច្ចប្រជុំ ក៏មានរៀបចំវេទិការថ្នាក់ជាតិ ស្តីពីការសិក្សាពេញមួយជីវិត ឆ្នាំ២០២៦ ក្រោមប្រធានបទ «មជ្ឈមណ្ឌលសិក្សាពេញមួយជីវិត ជាកម្លាំងចលករនៃនវានុវត្តន៍ការសិក្សា និងការអភិវឌ្ឍសហគមន៍ប្រកបដោយចីរភាព និងបរិយាបន្ន ឆ្ពោះទៅការកសាងទីក្រុងសិក្សានៅកម្ពុជា»។​ វេទិការនេះ មានបទបង្ហាញចំនួន ៤ ប្រធានបទ មានដូចខាងក្រោម៖ -ប្រធានបទទី១ ការសិក្សាជាមូលដ្ឋានគ្រឹះនៃការកសាងសហគមន៍បៃតង និងការពង្រឹងភាពធន់នឹងការប្រែប្រួលអាកាសធាតុ -ប្រធានបទទី២ ការសិក្សាជាមូលដ្ឋានគ្រឹះនៃការកសាងទីក្រុងឆ្លាតវៃ និងពលរដ្ឋឌីជីថល -ប្រធានបទទី៣ វិធីសាស្ត្រទីក្រុងសិក្សារបស់យូណេស្កូរ ពីក្របខណ្ឌសកលទៅសកម្មភាពមូលដ្ឋាន -ប្រធានបទទី៤ បទពិសោធន៍របស់មជ្ឈមណ្ឌលសិក្សាពេញមួយជីវិត ក្នុងការជំរុញការអភិវឌ្ឍនសហគមន៍ប្រកបដោយចីរភាព និងឆ្ពោះទៅការកសាងទីក្រុងសិក្សានៅកម្ពុជា កិច្ចប្រជុំនេះមានការអញ្ជើញចូលរួមពី ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា ថ្នាក់ដឹកនាំ និងតំណាងក្រសួង ស្ថាប័នជាសមាជិកនៃ គ.ជ.ស.ជ និងអង្គការពាក់ព័ន្ធ សរុប​ចំនួន ៧៥រូប។ **🌐**[Website](https://moh.gov.kh/kh/home) 📱[Facebook](https://www.facebook.com/MinistryofHealthofCambodia?mibextid=ZbWKwL) 📱[Telegram](https://t.me/MOHCambodia) 📱[X (twitter)](https://x.com/MohCambodia) 📱[Tiktok](https://www.tiktok.com/@mohcambodia) 📱[YouTube](https://www.youtube.com/@MOHCambodia)