公务部推进教育卫生领域绩效评估改革 覆盖基层行政人员

ក្រសួងមុខងារសាធារណៈ បន្តចុះផ្សព្វផ្សាយស្ដីពីការវាយតម្លៃសមិទ្ធកម្មការងាររបស់មន្ត្រីផ្អែកលើកិច្ចព្រមព្រៀងការងារ សម្រាប់វិស័យអប់រំ និងវិស័យសុខាភិបាល នៅរដ្ឋបាលថ្នាក់ក្រោមជាតិ ខេត្តតាកែវ៖ នាព្រឹកថ្ងៃទី២១ ខែសីហា ឆ្នាំ២០២៦ ឯកឧត្តម គង់ សុភី រដ្ឋលេខាធិការក្រសួងមុខងារសាធារណៈ និងជាប្រធានក្រុមការងារបច្ចេកទេសកែលម្អប្រព័ន្ធជ្រើសរើសមន្រ្តីនៃ គ.វ.រ. បានដឹកនាំក្រុមការងារបច្ចេកទេសកែលម្អប្រព័ន្ធជ្រើសរើសមន្រ្តីនៃ គ.វ.រ. បន្តចុះផ្សព្វផ្សាយស្ដីពីការវាយតម្លៃសមិទ្ធកម្មការងាររបស់មន្ត្រីផ្អែកលើកិច្ចព្រមព្រៀងការងារសម្រាប់វិស័យអប់រំ និងវិស័យសុខាភិបាល នៅរដ្ឋបាលថ្នាក់ក្រោមជាតិ។ នេះជាសិក្ខាសាលាតំបន់ទី ២ ត្រូវបានរៀបចំឡើងសម្រាប់រដ្ឋបាលខេត្តតាកែវ ខេត្តកំពត ខេត្តកែប ខេត្តកំពង់ស្ពឺ ខេត្តព្រះសីហនុ និងខេត្តកោះកុង។ ថ្លែងក្នុងពិធីបើកសិក្ខាសាលា ឯកឧត្តម វ៉ីិ សំណាង អភិបាល នៃគណៈអភិបាលខេត្តតាកែវ បានសម្ដែងការសាទរចំពោះផ្លែផ្កានៃការកែទម្រង់រដ្ឋបាលសាធារណៈរបស់រាជរដ្ឋាភិបាល ជាក់ស្ដែងការជ្រើសរើសមន្ត្រីបម្រើការងារក្នុងរដ្ឋបាលសាធារណៈ ជាពិសេស មន្ត្រីផ្អែកលើកិច្ចព្រមព្រៀងការងារ ដែលជាយន្តការថ្មីមួយនៃការគ្រប់គ្រងនិងប្រើប្រាស់ធនធានមនុស្សក្នុងវិស័យមុខងារសាធារណៈ ដែលមានការផ្លាស់ប្ដូរបន្តិចម្ដងៗពីការគ្រប់គ្រងនិងប្រើប្រាស់ធនធានមនុស្សតាមប្រព័ន្ធអាជីព មកជាការគ្រប់គ្រងនិងប្រើប្រាស់ធនធានមនុស្សផ្អែកលើសមិទ្ធកម្មតាមប្រព័ន្ធនិយោជន៍។​ មន្ត្រីផ្អែកលើកិច្ចព្រមព្រៀងការងារពិតជាបានរួមចំណែកក្នុងការបំពេញបន្ថែមធនធានមនុស្សក្នុងវិស័យអប់រំ និងវិស័យសុខាភិបាល ដើម្បីបង្កើនគុណភាព ប្រសិទ្ធភាពនៃការអប់រំចំណេះទូទៅនៅតាមគ្រឹះស្ថានសិក្សាសាធារណៈ ជាពិសេសនៅកម្រិតបឋមសិក្សា និងការបំពេញបន្ថែមបុគ្គលិកបម្រើការនៅតាមអង្គភាពសុខាភិបាលមូលដ្ឋាន ជាពិសេស នៅតាមមណ្ឌលសុខភាពនានា។ យន្តការនេះជាការឆ្លើយតបមួយទៅនឹងការរុញសេវាសាធារណៈឱ្យខិតជិតប្រជាពលរដ្ឋ ជាពិសេស វិស័យអប់រំ និងសុខាភិបាល គឺពិតជាមានតម្រូវការធនធានមនុស្សគ្រប់គ្រាន់ទាំងបរិមាណ និងគុណភាព ដែលមន្ត្រីបម្រើការងារពោរពេញដោយគុណវុឌ្ឍិ សមត្ថភាពស្របតាមស្តង់ដានិយាមវិជ្ជាជីវៈ និងឆន្ទៈបម្រើប្រជាជនពិតប្រាកដ ដើម្បីជាគ្រឹះក្នុងការកសាងនិងអភិវឌ្ឍជាតិ។ សិក្ខាសាលាពេលនេះ រៀបចំឡើងដើម្បីស្វែងយល់ពីប្រព័ន្ធគ្រប់គ្រងសមិទ្ធកម្មរបស់រាជរដ្ឋាភិបាល ដែលនឹងត្រូវប្រើប្រាស់ជាឧបករណ៍វាយតម្លៃសមិទ្ធកម្មការងាររបស់មន្រ្តីម្នាក់ៗ រួមទាំងការផ្តល់ការលើកទឹកចិត្តប្រចាំខែ និងប្រចាំឆ្នាំ និងការសម្រេចចិត្តជំហានបន្ទាប់របស់ប្រធានអង្គភាពចំពោះមន្ត្រីផ្អែកលើកិច្ចព្រមព្រៀងការងារ។ តាមរយៈសិក្ខាសាលានេះក៏ផ្ដល់ឱកាសដល់អ្នកចូលរួមបានស្វែងយល់ពីការអនុវត្តជាក់ស្តែងរបស់រដ្ឋបាលថ្នាក់ក្រោមជាតិ ចំពោះមន្រ្តីផ្អែកលើកិច្ចព្រមព្រៀងការងារដែលត្រូវបានជ្រើសរើស និងការអនុវត្តភារកិច្ចរបស់មន្ត្រីផ្អែកលើកិច្ចព្រមព្រៀងការងារដែលបានចុះកិច្ចព្រមព្រៀងជាមួយប្រធានអង្គភាពប្រកបដោយភាពបត់បែន តម្លាភាព និងគណនេយ្យភាព ដែលផ្តល់ឱកាសដល់មន្ត្រី និងប្រធានអង្គភាព ជួបពិភាក្សានិងព្រមព្រៀងគ្នាលើការបែងចែកការងារ លក្ខខណ្ឌការងារ នីតិវិធីត្រួតពិនិត្យការបំពេញការងារ និងវាយតម្លៃសមិទ្ធកម្មការងារជាប្រចាំ។ សិក្ខាសាលាតំបន់ទី២ មានការអញ្ជើញចូលរួមពី ឯកឧត្តម លោកជំទាវ តំណាងក្រសួងមហាផ្ទៃ តំណាងក្រសួងអប់រំ យុវជន និងកីឡា តំណាងក្រសួងសុខាភិបាល តំណាងលេខាធិការដ្ឋានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លោក លោកស្រី ប្រធានមន្ទីរមុខងារសាធារណៈ ប្រធានមន្ទីរអប់រំ យុវជន និងកីឡា ប្រធានមន្ទីរសុខាភិបាល នៃរដ្ឋបាលខេត្តតាកែវ ខេត្តកំពត ខេត្តកែប ខេត្តកំពង់ស្ពឺ ខេត្តព្រះសីហនុ និងខេត្តកោះកុង ព្រមទាំងប្រធានអង្គភាព និងតំណាងមន្ត្រីផ្អែកលើកិច្ចព្រមព្រៀងទាំងពីរវិស័យ សរុបប្រមាណជាង ៣០០នាក់។ ផែនការយុទ្ធនាការសិក្ខាសាលាផ្សព្វផ្សាយនេះ នឹងត្រូវបានបន្តរៀបចំនៅរដ្ឋបាលថ្នាក់ក្រោមជាតិ តំបន់ទី៣ (ខេត្តកំពង់ចាម) និងតំបន់ទី៤ (ខេត្តស្ទឹងត្រែង) ជាបន្តបន្ទាប់។