柬埔寨乡分区行政管理法修正案正式颁布实施

ព្រះរាជក្រម ស្តីពី «ច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាលឃុំ សង្កាត់» ច្បាប់ស្តីពីវិសោធនកម្មច្បាប់ស្តីពីការគ្រប់គ្រងរដ្ឋបាលឃុំ សង្កាត់ ត្រូវបានប្រកាសឱ្យប្រើប្រាស់ជាផ្លូវការហើយ តាមរយៈព្រះរាជក្រមលេខ នស/រកម/០៩២៦/០១៥ ចុះថ្ងៃទី២៤ ខែកញ្ញា ឆ្នាំ២០២៦ ចុះហត្ថលេខា ក្នុងព្រះបរមនាមនិងតាមព្រះរាជត្រាស់បង្គាប់ ដោយប្រមុខរដ្ឋស្តីទី សម្តេចអគ្គមហាសេនាបតីតេជោ ហ៊ុន សែន។ ច្បាប់វិសោធនកម្មនេះ ត្រូវបានរដ្ឋសភាអនុម័តកាលពីថ្ងៃទី២០ ខែសីហា ឆ្នាំ២០២៦ នាសម័យប្រជុំរដ្ឋសភាលើកទី៦ នីតិកាលទី៧ និងព្រឹទ្ធសភាបានពិនិត្យចប់សព្វគ្រប់លើទម្រង់និងគតិច្បាប់ទាំងស្រុង កាលពីថ្ងៃទី៤ ខែកញ្ញា ឆ្នាំ២០២៦ នាសម័យប្រជុំពេញអង្គព្រឹទ្ធសភាវិសាមញ្ញ នីតិកាលទី៥ ព្រមទាំងត្រូវបានក្រុមប្រឹក្សាធម្មនុញ្ញប្រកាសថាស្របនឹងរដ្ឋធម្មនុញ្ញ ក្នុងសេចក្តីសម្រេចលេខ ២៣២/០០២/២០២៦ កបធ.ច ចុះថ្ងៃទី១០ ខែកញ្ញា ឆ្នាំ២០២៦។ ការធ្វើវិសោធនកម្មនាពេលនេះ ផ្តោតសំខាន់លើការកែសម្រួលបទប្បញ្ញត្តិចំនួន ៤មាត្រា រួមមាន៖ មាត្រា៣៣ មាត្រា៣៤ មាត្រា៣៥ និងមាត្រា៣៨ នៃច្បាប់ដើមឆ្នាំ២០០១ ដោយបានធ្វើការកែប្រែទៅលើនីតិវិធីនៃការកំណត់ឋានៈដឹកនាំ និងការគ្រប់គ្រងស្ថិរភាពការងាររបស់រដ្ឋបាលថ្នាក់ក្រោមជាតិ។ ក្នុងនោះ ច្បាប់ថ្មីបានកំណត់យ៉ាងច្បាស់លាស់អំពីបែបបទ និងលក្ខខណ្ឌនៃការជ្រើសរើសសមាសភាព មេឃុំ ចៅសង្កាត់ ជំនួយការទី១ និងជំនួយការទី២ ដោយផ្អែកលើលទ្ធផលនៃការបោះឆ្នោត និងលំដាប់លេខរៀងនៃបញ្ជីបេក្ខជនរបស់គណបក្សនយោបាយ។ ច្បាប់វិសោធនកម្ម បានបង្កើតយន្តការជាក់លាក់ក្នុងការដោះស្រាយ និងជ្រើសរើសសមាសភាពជំនួសជាបន្ទាន់ ក្នុងករណីដែលមេឃុំ ចៅសង្កាត់ ឬជំនួយការ បាត់បង់សមាជិកភាពពីក្រុមប្រឹក្សា ព្រមទាំងកំណត់អំពីកាលកំណត់ និងនីតិវិធីរដ្ឋបាលផ្សេងៗសម្រាប់ការប្រកាសទទួលស្គាល់សមាសភាពដឹកនាំថ្មី សំដៅធានាឱ្យកិច្ចដំណើរការការងាររដ្ឋបាល និងការផ្តល់សេវាសាធារណៈជូនប្រជាពលរដ្ឋនៅតាមមូលដ្ឋានប្រព្រឹត្តទៅដោយរលូន មិនមានការរអាក់រអួល។ ការប្រកាសឱ្យប្រើច្បាប់វិសោធនកម្មនេះ នឹងក្លាយជាគតិយុត្តដ៏សំខាន់ ក្នុងការជួយឱ្យមន្ត្រីរាជការ និងបុគ្គលិករដ្ឋបាលថ្នាក់ក្រោមជាតិ អាចបំពេញភារកិច្ចបានកាន់តែច្បាស់លាស់ ចំទិសដៅ ជំរុញវប្បធម៌ការងារសកម្ម និងលើកកម្ពស់គុណភាព ព្រមទាំងប្រសិទ្ធភាពនៃការផ្តល់សេវាសាធារណៈ ជូនប្រជាពលរដ្ឋនៅតាមមូលដ្ឋាន ស្របតាមការកែទម្រង់រដ្ឋបាលសាធារណៈ និងគោលនយោបាយវិមជ្ឈការ និងវិសហមជ្ឈការរបស់រាជរដ្ឋាភិបាល៕