劳工部推动教育医疗绩效考核 提升公共服务效率

របត់ថ្មី! ក្រសួងមុខងារសាធារណៈ ជំរុញការវាយតម្លៃសមិទ្ធកម្មមន្ត្រីអប់រំ និងសុខាភិបាល ថ្នាក់ក្រោមជាតិ ផ្អែកលើកិច្ចព្រមព្រៀងការងារ ដើម្បីបង្កើនប្រសិទ្ធភាពសេវាសាធារណៈ ខេត្តកំពង់ចាម៖ បន្ទាប់ពីឯកឧត្តម គង់ សុភី រដ្ឋលេខាធិការក្រសួងមុខងារសាធារណៈ និងជាប្រធានក្រុមការងារបច្ចេកទេសកែលម្អប្រព័ន្ធជ្រើសរើសមន្រ្តីនៃគណៈកម្មាធិការជាតិកែទម្រង់រដ្ឋបាលសាធារណៈ (គ.វ.រ.) ប្រកាសបើកសិក្ខាសាលាស្តីពី «ការវាយតម្លៃសមិទ្ធកម្មការងាររបស់មន្ត្រីផ្អែកលើកិច្ចព្រមព្រៀងការងារ» សម្រាប់វិស័យអប់រំ និងសុខាភិបាលនៅរដ្ឋបាលថ្នាក់ក្រោមជាតិ រួចមក អង្គសិក្ខាសាលា បានបន្តរៀបចំឱ្យមានការធ្វើបទបង្ហាញរបស់វាគ្មិន ជាអ្នកជំនាញជាន់ខ្ពស់ និងអ្នកសរសេរគោលនយោបាយកំណែទម្រង់រដ្ឋបាលសាធារណៈ ប្រកបដោយបទពិសោធលើប្រធានបទចំនួន៣។ នៅក្នុងអង្គសិក្ខាសាលានេះ វាគ្មិនជំនាញបានធ្វើបទបង្ហាញលើប្រធានបទយុទ្ធសាស្ត្រចំនួន៣ រួមមាន៖ (១)ការចែករំលែកបទពិសោធគ្រប់គ្រង និងវាយតម្លៃសមិទ្ធកម្ម៖ ផ្ដោតលើការកំណត់សូចនាករគន្លឹះ ឱ្យស្របតាមការងារជាក់ស្តែង ដើម្បីធានាតម្លាភាព និងមិនលំអៀង, (២)ការជ្រើសរើស និងគ្រប់គ្រងមន្ត្រីផ្អែកលើកិច្ចព្រមព្រៀងការងារ៖ ផ្លាស់ប្តូរពីការមើលលើវត្តមាន ឬអតីតភាព មកជាការភ្ជាប់កាតព្វកិច្ចការងារច្បាស់លាស់ ដើម្បីលុបបំបាត់ភាពអសកម្ម និង (៣)ការវាយតម្លៃសមិទ្ធកម្មផ្អែកលើកិច្ចព្រមព្រៀងការងារ៖ ប្រើប្រាស់នីតិវិធី និងឧបករណ៍បច្ចេកទេស ដើម្បីធ្វើជាគ្រឹះផ្លូវការក្នុងការលើកទឹកចិត្ត ឬបណ្តុះបណ្តាលបន្ថែម។ អង្គសិក្ខាសាលាកាន់តែមានភាពរស់រវើក តាមរយៈវេទិកាសំណួរ-ចម្លើយ និងការជជែកដេញដោលយ៉ាងសកម្ម លើបញ្ហាប្រឈមជាក់ស្តែង រួមមាន៖ ភាពបត់បែននៃកិច្ចព្រមព្រៀងតាមមុខជំនាញ, យន្តការដោះស្រាយការមិនចុះសម្រុងលើលទ្ធផលវាយតម្លៃ, ការគ្រប់គ្រងធនធានមនុស្សក្នុងស្ថានភាពលើសឬខ្វះមន្ត្រី និងការបែងចែកបន្ទុកការងារព្រមទាំងអត្ថប្រយោជន៍រវាងមន្ត្រីក្របខ័ណ្ឌ និងមន្ត្រីកិច្ចព្រមព្រៀង។ ជាការឆ្លើយតប ឯកឧត្តម គង់ សុភី រួមជាមួយគណៈវាគ្មិន បានធ្វើការបកស្រាយយ៉ាងក្បោះក្បាយ និងចំគោលដៅ។ ឯកឧត្តមក៏បានសង្កត់ធ្ងន់ថា រាល់ក្តីបារម្ភ និងធាតុចូលដ៏មានតម្លៃទាំងនេះ ជាពិសេសយន្តការប្រើប្រាស់កម្លាំងមន្ត្រីឱ្យមានតុល្យភាព និងការលុបបំបាត់ភាពមិនស៊ីសង្វាក់គ្នារវាងមន្ត្រីទាំងពីរប្រភេទ នឹងត្រូវយកទៅសិក្សា វិភាគ ដើម្បីកែលម្អប្រព័ន្ធអនុវត្តឱ្យកាន់តែមានភាពលម្អិត រលូន និងគ្រប់ជ្រុងជ្រោយទូទាំងប្រទេស ឆ្លើយតបទៅនឹងការចង់បានរបស់ប្រជាពលរដ្ឋលើវិស័យអប់រំ និងសុខាភិបាល៕