金边普雷诺区发放1714份土地证 规范产权减少纠纷

រដ្ឋបាលខណ្ឌព្រែកព្នៅ និងមន្ទីររៀបចំដែនដីរាជធានីភ្នំពេញ ចែកប័ណ្ណកម្មសិទ្ធិ ១.៧១៤ ក្បាលដី ជូនប្រជាពលរដ្ឋសង្កាត់សំរោង ----------------------- (ភ្នំពេញ)៖ នៅព្រឹកថ្ងៃចន្ទ ទី៣១ ខែសីហា ឆ្នាំ២០២៦ នេះ រដ្ឋបាលខណ្ឌព្រែកព្នៅ សហការជាមួយមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ បានរៀបចំពិធីចែកវិញ្ញាបនបត្រសម្គាល់ម្ចាស់អចលនវត្ថុ (ប័ណ្ណកម្មសិទ្ធិ) សរុបចំនួន ១.៧១៤ ក្បាលដី ជូនដល់ប្រជាពលរដ្ឋ។ ពិធីនេះបានប្រារព្ធឡើងស្ថិតក្នុងភូមិសំរោងកណ្តាល និងភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ ក្រោមអធិបតីភាពដ៏ខ្ពង់ខ្ពស់របស់ លោក ធឹម សំអាន អភិបាល នៃគណៈអភិបាលខណ្ឌព្រែកព្នៅ និងលោក ពឹង រតនៈ អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី រាជធានីភ្នំពេញ ព្រមទាំងមានការអញ្ជើញចូលរួមពីថ្នាក់ដឹកនាំមូលដ្ឋាន មន្ត្រីជំនាញពាក់ព័ន្ធ និងប្រជាពលរដ្ឋជាច្រើនរូប។ ការផ្ដល់ជូនប័ណ្ណកម្មសិទ្ធិអចលនវត្ថុនាឱកាសនេះ គឺជា ជំហានដ៏មានសារៈសំខាន់មួយទៀតក្នុងការធានាដល់សិទ្ធិកាន់កាប់ស្របច្បាប់លើដីធ្លី ការពារផលប្រយោជន៍ និងកាត់បន្ថយទំនាស់ដីធ្លីជូនដល់ប្រជាពលរដ្ឋនៅមូលដ្ឋាន ព្រមទាំងផ្តល់លទ្ធភាពឱ្យពួកគាត់អាចយកប័ណ្ណនេះទៅប្រើប្រាស់ជាទុនទ្រព្យក្នុងការអភិវឌ្ឍសេដ្ឋកិច្ចគ្រួសារប្រកបដោយនិរន្តរភាព។