柬埔寨司法部赴越参加东盟AI法律应用论坛

ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ ដឹកនាំគណៈប្រតិភូកម្ពុជា ចូលជួបសម្តែងការគួរសមនិងពិភាក្សាការងារជាមួយរដ្ឋមន្រ្តីក្រសួងយុត្តិធម៌វៀតណាម និងចូលរួមវេទិកាច្បាប់អាស៊ានឆ្នាំ២០២៦ ស្តីពីការប្រើប្រាស់បញ្ញាសិប្បនិម្មិត (AI) ក្នុងការបង្កើត និងអនុវត្តច្បាប់ នៅក្នុងសម័យឌីជីថល" នៅរដ្ឋធានីហាណូយ ប្រទេសវៀតណាម ==================== រដ្ឋធានីហាណូយ ប្រទេសវៀតណាម៖ នាថ្ងៃចន្ទ ៤កើត ខែស្រាពណ៍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី១៧ ខែសីហា ឆ្នាំ២០២៦, ឯកឧត្តមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ អមដំណើរដោយ ឯកឧត្តមបណ្ឌិត ឃ្លោក ដារ៉ា ប្រតិភូរាជរដ្ឋាភិបាល និងជាអគ្គនាយកនៃអគ្គនាយកដ្ឋានកិច្ចការអន្តរជាតិ និងអភិវឌ្ឍន៍វិស័យយុត្តិធម៌ បានអញ្ជើញដឹកនាំគណៈប្រតិភូកម្ពុជា ចូលជួបសម្តែងការគួរសម និងពិសារអាហារការងារពេលល្ងាច (Working Dinner) ជាមួយ ឯកឧត្តមរដ្ឋមន្ត្រីក្រសួងយុត្តិធម៌ នៃសាធារណរដ្ឋសង្គមនិយមវៀតណាម។ ជំនួបនេះបានផ្តោតការពិភាក្សាលើកិច្ចសហប្រតិបត្តិការរវាងក្រសួងយុត្តិធម៌នៃប្រទេសទាំងពីរ ដែលរួមមានការជជែកពិភាក្សាបន្ថែមលើខ្លឹមសារនៃសេចក្តីព្រាងនៃអនុស្សរណៈនៃការយោគយល់គ្នាស្តីពីកិច្ខសហប្រតិបត្តិការរវាងក្រសួងទាំងពីរ និងកិច្ចសហប្រតិបត្តិការទ្វេភាគីផ្សេងៗទៀតក្នុងវិស័យច្បាប់និងយុត្តិធម៌រវាងក្រសួងយុត្តិធម៌ទាំង២ ផងដែរ។ ទន្ទឹមនឹងនេះផងដែរ គណៈប្រតិភូកម្ពុជានឹងបន្តអញ្ជើញចូលរួមក្នុង "វេទិកាច្បាប់អាស៊ាន ឆ្នាំ២០២៦ ស្តីពីការប្រើប្រាស់បញ្ញាសិប្បនិម្មិត (AI) ក្នុងការបង្កើត និងអនុវត្តច្បាប់ នៅក្នុងសម័យឌីជីថល" ដែលប្រព្រឹត្តទៅនៅថ្ងៃទី១៨ ដល់ថ្ងៃទី១៩ ខែសីហា ឆ្នាំ២០២៦ នៅទីក្រុងហាណូយ។ វេទិកានេះមានការអញ្ជើញចូលរួមពីប្រតិភូ និងតួអង្គពាក់ព័ន្ធសរុបប្រមាណ ១៥០ រូប រៀបចំដោយក្រសួងយុត្តិធម៌វៀតណាម ដោយមាន តំណាងមកពីរដ្ឋសមាជិកអាស៊ានទាំងអស់ តំណាងអគ្គលេខាធិការអាស៊ាន អ្នកជំនាញការ អ្នកស្រាវជ្រាវ ស្ថាប័នសិក្សាធិការ មេធាវី និងអ្នកវិជ្ជាជីវៈពាក់ព័ន្ធផ្សេងៗទៀត ដើម្បីផ្លាស់ប្តូរបទពិសោធន៍ ពិភាក្សា និងស្វែងយល់បន្ថែមអំពីការវិវឌ្ឍ បញ្ញាសិប្បនិម្មិត (AI) ក្នុងទិដ្ឋភាពច្បាប់ និងបញ្ហាប្រឈមនានាពាក់ព័ន្ធនឹងការប្រើប្រាស់បញ្ញាសិប្បនិម្មិត (AI) នៅក្នុងតំបន់អាស៊ាន។