金边波森芷区青少年暴力频发 居民呼吁警方加强巡逻

ប្រជាពលរដ្ឋខណ្ឌពោធិ៍សែនជ័យ ព្រួយបារម្ភជាខ្លាំងពីបញ្ហាក្មេងទំនើងដេញកាប់គ្នាយ៉ាងអាណាធិបតេយ្យ ​ភ្នំពេញ៖ វីដេអូដែលថតដោយប្រជាពលរដ្ឋផ្ទាល់ បាននិងកំពុងបង្ហោះចែកចាយនៅលើបណ្តាញសង្គម ដោយបង្ហាញពីសកម្មភាពក្រុមក្មេងទំនើងតែងតែធ្វើសកម្មភាពដេញកាប់ចាក់គ្នាយ៉ាងអាណាធិបតេយ្យ នៅក្នុងភូមិសាស្ត្រខណ្ឌពោធិ៍សែនជ័យ ដែលបង្កឱ្យមានការភ័យខ្លាច និងព្រួយបារម្ភយ៉ាងខ្លាំងពីបញ្ហាអសន្តិសុខសង្គម។ ​តាមប្រភពពីប្រជាពលរដ្ឋនៅបានឱ្យដឹងថា សកម្មភាពអនាធិបតេយ្យ និងអំពើហិង្សាបង្កដោយក្រុមក្មេងទំនើងទាំងនេះ បានកើតឡើងជាបន្តបន្ទាប់ ដែលមិនត្រឹមតែរំខានដល់ការរស់នៅដោយសុខសាន្តនោះទេ ប៉ុន្តែវាថែមទាំងគំរាមកំហែងដល់អាយុជីវិត និងទ្រព្យសម្បត្តិរបស់អ្នកដំណើរ ក៏ដូចជាអ្នកជិតខាងដែលមិនដឹងអីផងដែរ។ ​ការអំពាវនាវតាមរយៈការរំលែកវីដេអូទាំងនេះ ប្រជាពលរដ្ឋនៅក្នុងខណ្ឌពោធិ៍សែនជ័យ សូមគោរពអំពាវនាវយ៉ាងទទូចដល់អាជ្ញាធរមានសមត្ថកិច្ច ជាពិសេសកម្លាំងនគរបាលខណ្ឌ និងប៉ុស្តិ៍រដ្ឋបាល មេត្តាជួយបង្កើនការល្បាត និងមានវិធានការណ៍ច្បាប់ឱ្យបានតឹងរ៉ឹងបំផុត ដើម្បីបង្ក្រាបក្រុមក្មេងទំនើងទាំងនេះ និងជួយទប់ស្កាត់រាល់សកម្មភាពអសន្តិសុខ ក្នុងគោលបំណងផ្តល់ភាពកក់ក្តៅ និងសុវត្ថិភាពជូនប្រជាពលរដ្ឋឡើងវិញ៕