司法部成立禁毒工作组 强化毒品案件物证管理

ឯកឧត្តម ឯម ច័ន្ទមករា ដឹកនាំប្រជុំសមាសភាពថ្មីនៃក្រុមការងារក្រសួងយុត្តិធម៌ ពាក់ព័ន្ធនឹងការងារប្រយុទ្ធប្រឆាំងគ្រឿងញៀនខុសច្បាប់ និងការងារទាក់ទងនឹងវត្ថុតាង បទល្មើសគ្រឿងញៀន ===================== ភ្នំពេញ៖ ក្រោយការទទួលបានការចាត់តាំងដ៏ខ្ពង់ខ្ពស់ពីឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ជូន ឯកឧត្តម ឯម ច័ន្ទមករា រដ្ឋលេខាធិការ ធ្វើជាប្រធានក្រុមការងារក្រសួងយុត្តិធម៌ ពាក់ព័ន្ធនឹងការងារប្រយុទ្ធប្រឆាំងគ្រឿងញៀនខុសច្បាប់ និងការងារទាក់ទងនឹងវត្ថុតាង បទល្មើសគ្រឿងញៀន នៅរសៀលថ្ងៃទី៥ ខែសីហា ឆ្នាំ២០២៦នេះ នៅទីស្តីការក្រសួងយុត្តិធម៌ ឯកឧត្តម ឯម ច័ន្ទមករា បានដឹកនាំកិច្ចប្រជុំជាមួយសមាសភាពថ្មីនៃក្រុមការងារ ដើម្បីពិនិត្យលើវឌ្ឍនភាព សកម្មភាព និងបញ្ហាប្រឈមនាពេលកន្លងមក ព្រមទាំងដាក់ទិសដៅ ផែនការការងារសម្រាប់ការងារដែលត្រូវអនុវត្តនាពេលខាងមុខនេះ។ ឯកឧត្តម ឯម ច័ន្ទមករា រដ្ឋលេខាធិការ និងធ្វើជាប្រធានក្រុមការងារ បានមានប្រសាសន៍ថា ការងារប្រយុទ្ធប្រឆាំងគ្រឿងញៀនខុសច្បាប់ គឺជាកិច្ចការងារអាទិភាពមួយក្នុងចំណោមការងារអាទិភាពរបស់រាជរដ្ឋាភិបាលកម្ពុជា ពិសេសក្នុងយុទ្ធនាការទាំង២ របស់ក្រសួងយុត្តិធម៌ ដូច្នេះក្រុមការងារដែលទើបទទួលបានការចាត់តែថ្មីៗនេះ ត្រូវមានភារកិច្ចទទួលខុសត្រូវខ្ពស់ចំពោះទំនុកចិត្តពីថ្នាក់ដឹកនាំគឺឯកឧត្តម កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាអនុប្រធានអាជ្ញាធរជាតិប្រយុទ្ធប្រឆាំងគ្រឿងញៀន។