实居省三隆通县开展入户发放党员证活动

​នាថ្ងៃ សៅរ៍ ទី ២២ ខែ សីហា ឆ្នាំ ២០២៦ ឯកឧត្តម នាក់ សើគីរីន រដ្ឋលេខាធិការក្រសួងយុត្តិធម៌ អនុប្រធានទី១ ក្រុមការងារចុះជួយស្រុកសាមគ្គីមុនីជ័យ និងជាប្រធានក្រុមការងារចុះជួយមូលដ្ឋានឃុំក្រាំងចេក ស្រុកសាមគ្គីមុនីជ័យ ខេត្តកំពង់ស្ពឺ បានអញ្ជើញដឹកនាំក្រុមការងារ ចុះផ្ទាល់តាមខ្នងផ្ទះប្រជាពលរដ្ឋ ដើម្បីចែកកាតសម្គាល់សមាជិកគណបក្សប្រជាជនកម្ពុជា ជូនដល់សមាជិក-សមាជិកាគណបក្ស នៅក្នុងភូមិចំនួន៥ រួមមាន៖ ភូមិសំបុកក្រៀល, ភូមិត្នោត, ភូមិក្បាលគាយ, ភូមិអង្គ និងភូមិអកយំ។ ​ពិធីចុះចែកប័ណ្ណសម្គាល់សមាជិកនាឱកាសនោះ ក៏មានការអញ្ជើញចូលរួមយ៉ាងសកម្មពីសំណាក់ សមាជិកក្រុមប្រឹក្សាឃុំក្រាំងចេក ប្រធាន-អនុប្រធានភូមិ ព្រមទាំងក្រុមការងារចុះជួយមូលដ្ឋានឃុំ-ភូមិជាច្រើនរូបផងដែរ។ ​ក្នុងសកម្មភាពដ៏ស្និតស្នាលនេះ ឯកឧត្តម និងក្រុមការងារ បានចុះសួរសុខទុក្ខដល់ខ្នងផ្ទះនីមួយៗ ដោយបានពាំនាំនូវការផ្តាំផ្ញើសួរសុខទុក្ខយ៉ាងជ្រាលជ្រៅពីសំណាក់ថ្នាក់ដឹកនាំកំពូលនៃគណបក្សប្រជាជនកម្ពុជា។ ជាមួយគ្នានោះ ឯកឧត្តមក៏បានថ្លែងអំណរគុណយ៉ាងជ្រាលជ្រៅចំពោះបងប្អូនប្រជាពលរដ្ឋ ដែលតែងតែមានជំនឿទុកចិត្ត និងគាំទ្រយ៉ាងរឹងមាំលើការដឹកនាំរបស់គណបក្សប្រជាជនកម្ពុជា ក្នុងការថែរក្សាសន្តិភាព និងការអភិវឌ្ឍភូមិឃុំឱ្យកាន់តែរីកចម្រើនជាលំដាប់។ ​ទន្ទឹមនឹងនេះ បងប្អូនប្រជាពលរដ្ឋជាសមាជិកគណបក្សតាមខ្នងផ្ទះនីមួយៗ បានសម្តែងនូវក្តីរំភើបរីករាយ និងអរគុណយ៉ាងជ្រាលជ្រៅចំពោះ ឯកឧត្តម ប្រធានក្រុមការងារ និងសហការី ដែលបានចំណាយពេលវេលាដ៏មានតម្លៃចុះមកសួរសុខទុក្ខ និងប្រគល់កាតសម្គាល់សមាជិកដល់ដៃពួកគាត់ដោយផ្ទាល់។