柬埔寨公务部与教育部联合举办教师法规解读论坛

រសៀលនេះ ក្រសួងមុខងារសាធារណៈ សហការជាមួយក្រសួងអប់រំ យុវជន​ និងកីឡា នឹងរៀបចំ «វេទិកាសារព័ត៌មានដើម្បីផ្សព្វផ្សាយ ព្រះរាជក្រឹត្យស្តីពីលក្ខន្តិកៈនៃអង្គគ្រូបង្រៀន»​ ក្នុងគោលបំណង ផ្សព្វផ្សាយឱ្យបានកាន់តែទូលំទូលាយ នូវខ្លឹមសារសំខាន់ៗ ដែលមានចែងក្នុងព្រះរាជក្រឹត្យ រួមជាមួយគុណតម្លៃ និងភាពចាំបាច់នៃការរៀបចំព្រះរាជក្រឹត្យថ្មីនេះ ជូនដល់គ្រូបង្រៀន និងសាធារណជន។ វេទិកានេះនឹងប្រព្រឹត្តទៅនៅអគារគណៈកម្មាធិការកែទម្រង់រដ្ឋបាលសាធារណៈ (បរិវេណសាលាភូមិន្ទរដ្ឋបាល) ដោយមានការអញ្ជើញជាវាគ្មិនកិត្តិយស ៣រូប ដែលជាថ្នាក់ដឹកនាំជាន់ខ្ពស់រួមមាន៖ (១) ឯកឧត្តម យក់ ប៊ុនណា រដ្ឋលេខាធិការប្រចាំការ ក្រសួងមុខងារសាធារណៈ (២) ឯកឧត្តមបណ្ឌិតសភាចារ្យ ណាត ប៊ុនរឿន រដ្ឋលេខាធិការក្រសួងអប់រំ យុវជន និងកីឡា និង (៣) ឯកឧត្តម ជុក មុន្នី រដ្ឋលេខាធិការក្រសួងមុខងារសាធារណៈ។ វេទិកានេះ ជាវេទិកាបើកចំហសម្រាប់ការសួរ-ឆ្លើយ និងការពិភាក្សាដោយផ្ទាល់រវាងអ្នកតំណាងក្រសួងមុខងារសាធារណៈ និងក្រសួងអប់រំ យុវជន និងកីឡា ទៅកាន់អ្នកសារព័ត៌មាន ដើម្បីផ្តល់ព័ត៌មានលម្អិតឱ្យបានកាន់តែទូលំទូលាយ ជូនដល់គោលដៅ ជាពិសេសមន្ត្រីរាជការ ដែលជាគ្រូបង្រៀន និងបុគ្គលិកអប់រំ។