中国驻泰使馆施压泰方 严查沙缴府中国公民绑架案

**ចិនដាក់សម្ពាធធ្ងន់ៗលើថៃ ជុំវិញករណីចាប់ជំរិតពលរដ្ឋខ្លួននៅខេត្តស្រះកែវ បាងកក៖ **ស្ថានទូតចិនប្រចាំប្រទេសថៃ បានចេញមុខដាក់សម្ពាធយ៉ាងខ្លាំងៗលើអាជ្ញាធរថៃ ឱ្យធ្វើការស៊ើបអង្កេតដោយតម្លាភាព ជុំវិញករណីចាប់ជំរិតទារប្រាក់លើជនជាតិចិនម្នាក់នៅខេត្តស្រះកែវ ដែលករណីនេះបានឆ្លុះបញ្ចាំងចំៗពីភាពធូរលុងនៃប្រព័ន្ធសន្តិសុខរបស់ថៃ។ នៅក្នុងសេចក្តីថ្លែងការណ៍នាថ្ងៃទី១៩ ខែឧសភា ភាគីចិនបានបង្ហាញជំហររឹងប៉ឹង និងទាមទារឱ្យថៃអនុវត្តវិធានការដាច់ខាតចំនួន៣ រួមមាន៖ ឱ្យថៃស៊ើបអង្កេតរកការពិតជាបន្ទាន់ដោយបើកចំហ យុត្តិធម៌ និងគ្មានការលាក់លៀម រួមទាំងវែកមុខ និងនាំខ្លួនជនល្មើសរួមទាំងអ្នកពាក់ព័ន្ធទាំងអស់មកផ្តន្ទាទោសឱ្យខានតែបាន និងត្រូវបង្កើនការការពារអាយុជីវិត និងទ្រព្យសម្បត្តិរបស់ពលរដ្ឋចិនឱ្យមានប្រសិទ្ធភាពជាងមុន។ ទាក់ទិនបញ្ហានេះ ស្ថានទូតចិនបានព្រមានជាប្រយោលថា ស្ថិរភាពសន្តិសុខគឺជាគ្រឹះនៃកិច្ចសហប្រតិបត្តិការរវាងប្រទេសទាំងពីរ។ បើថៃនៅតែបណ្តោយឱ្យមានអសន្តិសុខបែបនេះ វានឹងជះឥទ្ធិពលអាក្រក់ដល់ទំនុកចិត្តរបស់វិនិយោគិន និងភ្ញៀវទេសចរចិន។ ទន្ទឹមនឹងនេះ ស្ថានទូតចិនក៏បានចេញលិខិតព្រមានបន្ទាន់មួយ ណែនាំឱ្យពលរដ្ឋចិនដែលកំពុងស្នាក់នៅ ឬត្រៀមធ្វើដំណើរមកប្រទេសថៃ បង្កើនការប្រុងប្រយ័ត្នខ្ពស់ចំពោះសុវត្ថិភាពផ្ទាល់ខ្លួន និងត្រូវរាយការណ៍ទៅប៉ូលិស ឬស្ថានទូតភ្លាមៗក្នុងករណីអាសន្ន។