柬埔寨公立学校教师招聘考试阅卷工作今日启动

គណៈកម្មការរៀបចំការប្រឡង ចាប់ផ្ដើមកំណែសន្លឹកកិច្ចការបេក្ខជនហើយ ភ្នំពេញ៖គណៈកម្មការរៀបចំការប្រឡង នៃក្រសួងមុខងារសាធារណៈ ចាប់ផ្ដើមកំណែសន្លឹកកិច្ចការបេក្ខជនប្រឡងគ្រូបង្រៀនផ្អែកលើកិច្ចព្រមព្រៀងការងារ នៅព្រឹកថ្ងៃទី២០ ខែតុលានេះ។ ដូចសព្វដង លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានចូលរួមពិនិត្យដោយផ្ទាល់ នៅមណ្ឌលកំណែសាលាភូមិន្ទរដ្ឋបាល។ ការប្រឡងជ្រើសរើសគ្រូបង្រៀនផ្អែកលើកិច្ចព្រមព្រៀងការងារ សម្រាប់កម្រិតមធ្យមសិក្សា បានប្រព្រឹត្តទៅនៅរសៀលថ្ងៃទី១៩ ខែតុលា ដោយមានបេក្ខជនចូលរួមប្រឡងជាង១ម៉ឺននាក់។ ការប្រឡងនេះ នឹងជ្រើសរើសគ្រូបង្រៀន កម្រិតអនុវិទ្យាល័យ ១ ២០០នាក់ និងកម្រិត វិទ្យាល័យ ១ ៨០០នាក់ សម្រាប់ឆ្នាំសិក្សា ២០២៦-២០២៧។ គណៈកម្មការ អាចនឹងប្រកាសលទ្ធផលនៅចុងសប្ដាហ៍នេះ ក្រោយការបូកស្រង់ពិន្ទុ និងផ្ទៀងផ្ទាត់លទ្ធផលយ៉ាងម៉ត់ចត់បំផុត។ ឈរលើគោលការណ៍ «គុណាធិបតេយ្យ តម្លាភាព យុត្តិធម៌ ប្រសិទ្ធភាព និង បរិយាបន្ន ការប្រឡងនេះរៀបចំដោយក្រសួងមុខងារសាធារណៈ សហការពីក្រសួងអប់រំ យុវជន និងកីឡា និងក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមសង្កេតការណ៍ពីអង្គភាពប្រឆាំងអំពើពុករលួយ៕ ដោយ៖ ឡេង សុភានិត្យ