洪森回应国库资金充足 强调货币发行基于财政稳健

សម្តេចតេជោ ហ៊ុន សែន៖ រាជរដ្ឋាភិបាលមានសាច់ប្រាក់ក្នុងរតនាគារជាង ២,៥ពាន់លានដុល្លារ មិនមែនបោះក្រដាសប្រាក់ថ្មីព្រោះអស់លុយទេ ភ្នំពេញ៖ សម្តេចតេជោ ហ៊ុន សែន ប្រធានព្រឹទ្ធសភា បានលើកឡើងថា សម្តេច មិនចង់ឆ្លើយតបចំពោះការរិះគន់ពីអ្នកនយោបាយនៅក្រៅប្រទេសមួយចំនួននោះទេ ប៉ុន្តែសម្តេចយល់ថា ការមិនបកស្រាយអាចធ្វើឱ្យប្រជាពលរដ្ឋមានការភាន់ច្រឡំ។ តាមរយៈហ្វេសបុកសម្តេចតេជោ ហ៊ុន សែន បានសរសេរថា កន្លងមក រាល់ពេលរាជរដ្ឋាភិបាលដាក់ឱ្យចរាចរក្រដាសប្រាក់ថ្មី តែងមានការលើកឡើងពីអ្នករិះគន់នៅក្រៅប្រទេសថា រាជរដ្ឋាភិបាលអស់លុយ ទើបត្រូវបោះក្រដាសប្រាក់ថ្មី។ សម្តេចតេជោបានបញ្ជាក់ថា តាមទិន្នន័យ សាច់ប្រាក់ក្នុងរតនាគារជាតិមានមិនតិចជាង ២,៥ពាន់លានដុល្លារ ខណៈការចំណាយលើបៀវត្សរ៍ប្រចាំខែមានប្រមាណ ២៣០លានដុល្លារ។ សម្តេចតេជោ ហ៊ុន សែន បន្តថា ក្នុងរយៈពេល៩ខែ រាជរដ្ឋាភិបាលប្រមូលចំណូលបានជាង ៥ពាន់លានដុល្លារ ដែលជាមធ្យមប្រមាណ ៥០០ ទៅ ៦០០លានដុល្លារក្នុងមួយខែ។ សម្តេចថា ចំណូលនេះអាចគ្រប់គ្រាន់សម្រាប់ការចំណាយ និងអាចរក្សាសាច់ប្រាក់ក្នុងរតនាគារឱ្យនៅមិនក្រោម ២,៥ពាន់លានដុល្លារទេ។ ជាមួយគ្នានេះ សម្តេចតេជោ ហ៊ុន សែន ក៏បានលើកឡើងពីថវិកាដែលបានរៃអង្គាសនៅវត្តភ្នំសេរី(វត្តខ្មែរនៅសហរដ្ឋអាមេរិច) ដោយអំពាវនាវឱ្យអ្នកនៅក្រៅប្រទេសយកថវិកាដែលប្រមូលបានទាំងនោះមកជួយជនភៀសសឹក ដែលសម្តេចថា ពលរដ្ឋកំពុងត្រូវការជំនួយ។ សម្តេចតេជោបានអះអាងបន្ថែមថា សម្តេចនឹងបង្ហោះសារសំឡេងពីកិច្ចប្រជុំមួយនៅពេលក្រោយ ដែលសម្តេចថា មានការពិភាក្សាអំពីការប្រើប្រាស់ថវិកាដែលរៃអង្គាសឡើងសម្រាប់ជួយជនភៀសសឹក ទៅជួយគណបក្សនយោបាយមួយនៅក្នុងប្រទេស។ សម្តេចតេជោ ហ៊ុន សែន ក៏បានរិះគន់អ្នកនយោបាយនៅក្រៅប្រទេសដែលសម្តេចចាត់ទុកថា បានផ្សព្វផ្សាយព័ត៌មានមិនត្រឹមត្រូវពាក់ព័ន្ធនឹងស្ថានភាពហិរញ្ញវត្ថុរបស់រាជរដ្ឋាភិបាល។ នៅចុងបញ្ចប់ សម្តេចតេជោបានលើកឡើងថា ប្រសិនបើរាជរដ្ឋាភិបាលពិតជាអស់ថវិកាមែន នោះអ្នកនយោបាយនៅក្រៅប្រទេសគួរតែអបអរសាទរ ព្រោះតាមការលើកឡើងរបស់សម្តេច ស្ថានភាពបែបនេះអាចនាំឱ្យរាជរដ្ឋាភិបាលដួលរលំ និងផ្តល់ឱកាសឱ្យអ្នកទាំងនោះបានចូលកាន់អំណាច ដូចដែលពួកគេចង់បាន៕