马德望省三洛县4公里沥青路完工 跨部门验收工作已启动

ឯកឧត្តម ឈឹម សៅគី អញ្ជើញដឹកនាំគណៈកម្មការអន្តរក្រសួង ចុះត្រួតពិនិត្យវាយតម្លៃបញ្ចប់សុពលភាព លើការងារស្ថាបនាផ្លូវក្រាលកៅស៊ូពីរជាន់ ចំនួន ១ខ្សែ ប្រវែង ៤ ០០០ម៉ែត្រ នៅស្រុកសំឡូត (ខេត្តបាត់ដំបង) នាថ្ងៃពុធ ៧រោច ខែទុតិយាសាឍ ឆ្នាំមមី អដ្ឋស័ក ព.ស.២៥៧០ ត្រូវនឹងថ្ងៃទី៥ ខែសីហា ឆ្នាំ២០២៦ ឯកឧត្តម ឈឹម សៅគី រដ្ឋលេខាធិការប្រចាំការ តំណាងដ៏ខ្ពង់ខ្ពស់ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញដឹកនាំគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ និងក្រសួងសេដ្ឋកិច្ច និងហិរញ្ញវត្ថុ ចុះត្រួតពិនិត្យវាយតម្លៃបញ្ចប់សុពលភាព លើការងារស្ថាបនាផ្លូវក្រាលកៅស៊ូពីរជាន់ ចំនួន ១ខ្សែ ប្រវែង ៤ ០០០ម ទទឹង ៦ម ចិញ្ចើមផ្លូវសងខាងក្រាលដីល្បាយក្រួស ទទឹងម្ខាងៗ ០,៥ម និងកម្រាស់ ០,២ម សាងសង់ស្ពានបេតុងចំនួន ១កន្លែង ប្រវែង ១៨ម ទទឹង ៨ម លូមូលមុខបីចំនួន ១កន្លែង និងផ្លាកឈ្មោះផ្លូវចំនួន ១កន្លង ស្ថិតនៅពីភូមិអូរច្រាប ទៅភូមិបឹងរុន ឃុំចំការចេក និងឃុំសំឡូត ស្រុកសំឡូត ខេត្តបាត់ដំបង អនុវត្តដោយនាយកដា្ឋនស្ថាបនា និងវិស្វកម្ម នៃអគ្គនាយកដ្ឋានភស្ដុភារ និងហិរញ្ញវត្ថុ ក្រសួងមហាផ្ទៃ។   កិច្ចត្រួតពិនិត្យ និងវាយតម្លៃមានការចូលរួមពី ឯកឧត្តម ជា ស្រ៊ុន រដ្ឋលេខាធិការ ក្រុមការងារ គ.ត.វ. នៃក្រសួងអភិវឌ្ឍន៍ជនបទ តំណាងក្រសួងសេដ្ឋកិច្ចនិងហិរញ្ញវត្ថុ តំណាងនាយកដា្ឋនអភិវឌ្ឍន៍ហេដ្ឋារចនាសម្ព័ន្ធផ្លូវជនបទ និងតំណាងអង្គភាពលទ្ធកម្ម និងតំណាងមន្ទីរអភិវឌ្ឍន៍ជនបទខេត្តបាត់ដំបង។ ទន្ទឹមនេះ ឯកឧត្តម ឈឹម សៅគី បានជួបសំណេះសំណាលជាមួយប្រជាពលរដ្ឋរស់នៅតាមដងផ្លូវ ហើយពួកគាត់បង្ហាញនូវសេចក្តីរំភើបរីករាយដែលទទួលបាននូវសមិទ្ធផលថ្មីបន្ថែមទៀតពីរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ ដែលបានស្ថាបនាឡើងស្របតាមគោលនយោបាយជាតិស្តីពីការអភិវឌ្ឍជនបទ** **ឆ្នាំ២០២៥**-**២០៣៥** **មានបេសកកម្មប្រែក្លាយតំបន់ជនបទកម្ពុជាឱ្យមានវិបុលភាពប្រកបដោយបរិយាបន្ន** **សមធម៌** **និងចីរភាព** **និងមានគោលបំណងធ្វើឱ្យប្រជាជននៅតំបន់ជនបទមានជីវភាពរស់នៅសមរម្យប្រកបដោយភាពធន់** **មានសុខភាពមាំមួន** **រស់នៅក្នុងបរិស្ថានល្អប្រកបដោយចីរភាព** **និងមានសេចក្តីថ្លៃថ្នូរ** **ឈានទៅសម្រេចចក្ខុវិស័យរបស់រាជរដ្ឋាភិបាលក្លាយទៅជាប្រទេសមានប្រាក់ចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។   ជាមួយគ្នានេះ ក្រសួងអភិវឌ្ឍន៍ជនបទដែលជាសេនាធិការរបស់រាជរដ្ឋាភិបាល ក្រោមការដឹកនាំរបស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បាននិងកំពុងយកចិត្តទុកដាក់យ៉ាងខ្លាំង ដោយបានចាត់ទុកការស្ថាបនា ការស្តារ ថែទាំ និងការកែលម្អហេដ្ឋារចនាសម្ព័ន្ធគឺជាការវិនិយោគដ៏ចាំបាច់ ព្រោះការតភ្ជាប់បណ្តាញផ្លូវនៅតាមជនបទ មានសារៈសំខាន់ណាស់ ក្នុងនោះក្រៅពីការធ្វើដំណើររបស់ប្រជាពលរដ្ឋ ផ្លូវគឺជាសរសៃឈាមបម្រើដល់សេដ្ឋកិច្ចផងដែរ។ បន្ទាប់ពីបានត្រួតពិនិត្យ និងប្រជុំពិភាក្សាជាមួយអ្នកទទួលការ អ្នកបច្ចេកទេស និងគណៈកម្មការអន្តរក្រសួងរួចមក គណៈកម្មការ បានឯកភាពទទួលយក និងវាយតម្លៃបញ្ចប់សុពលភាពផ្លូវខាងលើ៕ **——————** Connect with AKP: 🌐[Telegram](https://t.me/TheAKP) 🌐[Facebook](https://www.facebook.com/akp.official/) 🌐[Website](http://akp.gov.kh/) 👉[X](https://twitter.com/kampucheapresse) ([Twitter](https://twitter.com/kampucheapresse)) 🌐[Instagram](https://www.instagram.com/akp_news/) 🌐[TikTok](https://www.tiktok.com/@agencekampucheapresse) 🌐[YouTube](https://www.youtube.com/@agencekampucheapresse/featured) #CambodiaWantsPeace #JusticeForCambodia