暹粒省阿特瓦寺举行传统祭祀仪式，祈求风调雨顺

ពលរដ្ឋរៀបចំសែនព្រេននៅប្រាសាទវត្តអធ្វា នៅថ្ងៃ៣កើត ខែពិសាខ សៀមរាប៖ ខែពិសាខ គឺជាខែដើមរដូវវស្សា ហើយជាពេលដែលប្រជាកសិករត្រូវត្រៀមខ្លួនដើម្បីធ្វើស្រែចម្ការ។ សម្រាប់អ្នកស្រុកអង្គរ ពួកគេតែងតែសែនព្រេនដល់បារមីម្ចាស់ទឹកម្ចាស់ដី។ ជាក់ស្តែងនៅរៀងរាល់ថ្ងៃ ៣កើត ខែពិសាខ អ្នកភូមិចំណុះជើងវត្តប្រាសាទអធ្វា តែងជួបជុំគ្នាធ្វើពិធីបួងសួងសុំសេចក្ដីសុខ សូមឱ្យអ្នកតាម្ចាស់ទឹកម្ចាស់ដីបីបាច់ថែរក្សា និងឱ្យពរជ័យដល់អ្នកស្រុកគ្រប់គ្នា។ ពិធីនេះបង្ហាញនូវការដឹងគុណចំពោះធម្មជាតិ និងជាជំនួយផ្នែកស្មារតីដល់កសិករមុនចាប់ផ្តើមធ្វើស្រែ។ ចាស់ទុំដែលបានចូលរួមក្នុងពិធីបួងសួងនេះ រៀបរាប់ថា ខែពិសាខគឺជាខែចាប់ផ្ដើមរដូវវស្សា។ ពួកគេរៀបចំពិធីនៅថ្ងៃ៣កើត ខែពិសាខនេះ ដើម្បីបួងសួងសុំឱ្យមេឃបង្អុរភ្លៀងធ្លាក់មកបានជោកជាំ សុំសេចក្ដីសុខសម្រាប់ការចាប់ផ្ដើមធ្វើស្រែចម្ការ និងសូមបញ្ចៀសជំងឺដង្កាត់ផ្សេងៗដល់មនុស្ស និងសត្វពាហនៈ។ ពិសេសគឺសូមឱ្យការបង្កបង្កើនផលកសិកម្មទទួលបានទិន្នផលជាទីគាប់ចិត្ត។ ក្នុងពិធីនេះ អ្នកស្រុកយកនំចំណី ភេសជ្ជៈ និងគ្រឿងរណ្តាប់សំខាន់ៗដូចជា ស្លាធម៌ បាយសី ដើម្បីសែនព្រេន និងលេងភ្លេងអារក្សថ្វាយអ្នកតាដែលរក្សានៅភូមិឋានជុំវិញនេះ៕ វីដេអូ៖ ថោង ប្រណី