劳工部波罗勉省招聘会提供3800个岗位 涵盖制衣及赴日劳务

ក្រសួងការងារ បន្តនាំយកឱកាសការងារ ៣ ៨០០កន្លែង និងកិច្ចគាំពារសង្គមទៅដល់ស្រុកកំចាយមារ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ»​ ​(ព្រៃវែង)៖​ ក្រសួងការងារនិងបណ្ដុះបណ្ដាលវិជ្ជាជីវៈ តាមរយៈវេទិកាការងារ សន្តិសុខសង្គម និងបណ្ដុះបណ្ដាលវិជ្ជាជីវៈ ក្រោមប្រធានបទ «ខ្មែរជួយរកការងារ និងផ្ដល់ការងារឱ្យខ្មែរ» បាននាំយកឱកាសការងារ ៣ ៨០០កន្លែង អត្ថប្រយោជន៍ ប.ស.ស. និងកម្មវិធី TVET ផ្សព្វផ្សាយជូនប្រជាពលរដ្ឋជាង ៦០០នាក់ ជាពិសេសអតីតពលករពីប្រទេសថៃ និងយុវជនកំពុងស្វែងរកការងារធ្វើ នាព្រឹកថ្ងៃទី១ ខែសីហា ឆ្នាំ២០២៦ នៅបរិវេណសាលាស្រុកកំចាយមារ ខេត្តព្រៃវែង។ លោកជំទាវ ម៉ៅ ធីតា រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា បច្ចុប្បន្នឱកាសការងារនៅក្នុងប្រទេសមានភាពសម្បូរបែប ដោយទូទាំងប្រទេសមានជាង ៩ម៉ឺនកន្លែង។ ក្រសួងបាននាំយកឱកាសការងារ ៣ ៨០០កន្លែង ពីសហគ្រាស ក្រុមហ៊ុន និងរោងចក្រ មកដល់មូលដ្ឋាន ដើម្បីឱ្យប្រជាពលរដ្ឋអាចចុះឈ្មោះ សម្ភាសការងារដោយផ្ទាល់ និងទទួលបានការងារធ្វើភ្លាមៗ។ លោកជំទាវបានបញ្ជាក់ថា ការផ្តល់ឱកាសការងារនេះ គឺជាកិច្ចខិតខំប្រឹងប្រែងរបស់រាជរដ្ឋាភិបាល និងក្រសួងការងារ ដើម្បីឱ្យប្រជាពលរដ្ឋ ជាពិសេសអតីតពលករ ទទួលបានការងារសមរម្យ មានប្រាក់ចំណូល និងលើកកម្ពស់ជីវភាពគ្រួសារ។ ការងារក្នុងស្រុកតាមសហគ្រាស ក្រុមហ៊ុន និងរោងចក្រ ក៏រួមចំណែកកសាងសេដ្ឋកិច្ចជាតិ និងផ្តល់សុភមង្គលក្នុងគ្រួសារ ខណៈកម្មករនិយោជិតទទួលបានអត្ថប្រយោជន៍ពី ប.ស.ស. រួមមាន ហានិភ័យការងារ ថែទាំសុខភាព និងសោធន ដូចមន្ត្រីរាជការផងដែរ។ ជាពិសេស ស្ត្រីមានផ្ទៃពោះទទួលបានការពិនិត្យផ្ទៃពោះ ការថែទាំសុខភាព និងប្រាក់ឧបត្ថម្ភរហូតដល់កូនមានអាយុក្រោម ២ឆ្នាំ។ លោកជំទាវបានលើកឡើងថា ការងារចំណាកស្រុកនៅប្រទេសថៃនៅតែប្រឈមនឹងហានិភ័យដូចជា បញ្ហាសុវត្ថិភាព ការកេងប្រវ័ញ្ចកម្លាំងពលកម្ម ខ្វះការគាំពារសុខភាព អំពើហិង្សា ការរើសអើង និងការបែកបាក់ពីក្រុមគ្រួសារ។ ទន្ទឹមនេះ ក្រសួងបានដាក់ឱ្យអនុវត្តការធ្វើតេស្តទទួលស្គាល់ជំនាញពីមុន (RPL) លើវិស័យសំណង់ចំនួន ៨មុខ ដើម្បីផ្តល់វិញ្ញាបនបត្របញ្ជាក់ជំនាញជាផ្លូវការ និងធានាឱ្យទទួលបានការងារធ្វើ ព្រមទាំងប្រាក់ឈ្នួលសមរម្យ។ ទន្ទឹមនេះ អតីតពលករ និងយុវជនក៏អាចចុះឈ្មោះរៀនជំនាញបច្ចេកទេសដោយឥតគិតថ្លៃ តាមរយៈកម្មវិធី TVET ១,៥លាន នៅវិទ្យាស្ថានពហុបច្ចេកទេសខេត្តព្រៃវែង ឬតាមរយៈរថយន្តចល័តដល់មូលដ្ឋាន ដោយមានជម្រើសជំនាញជាច្រើន ដូចជា សំណង់ ជួសជុលគ្រឿងម៉ាស៊ីន គ្រឿងអគ្គិសនី ម៉ាស៊ីនត្រជាក់ ដុតនំ ឆុងកាហ្វេ និងសាឡន។ ក្រោយបញ្ចប់ការសិក្សា អាចយកជំនាញទៅបង្កើតមុខរបរដោយខ្លួនឯង ស្របតាមគោលនយោបាយ «ប្រជាពលរដ្ឋម្នាក់ មានជំនាញមួយយ៉ាងតិចប្រចាំជីវិត»។ ជាមួយគ្នានោះ លោកជំទាវក៏បានអំពាវនាវឱ្យប្រជាពលរដ្ឋបន្តផ្សព្វផ្សាយអំពីឱកាសការងារ អត្ថប្រយោជន៍ ប.ស.ស. និងកម្មវិធី TVET ដល់សមាជិកគ្រួសារ សាច់ញាតិ និងមិត្តភក្តិ។ ក្នុងករណីមានបំណងទៅធ្វើការនៅក្រៅប្រទេស ដើម្បីទទួលបានប្រាក់ខែខ្ពស់ ប្រជាពលរដ្ឋត្រូវជ្រើសរើសក្រុមហ៊ុនស្របច្បាប់ និងធ្វើការផ្ទៀងផ្ទាត់បញ្ជីឈ្មោះជាមួយអាជ្ញាធរ ឬទាក់ទងខ្សែទូរស័ព្ទជំនួយរហ័ស Hotline លេខ ១២៩៧ សម្រាប់ផ្នែកផ្គូផ្គងការងារ និងលេខ ១២៨៦ សម្រាប់សេវា ប.ស.ស.។ សូមជម្រាបថា ឱកាសការងារជាង ៣ ៨០០កន្លែង ដែលបាននាំមកក្នុងវេទិកានេះ រួមមានពីក្រុមហ៊ុន ថាកូ អាហ្រ្គី, រោងចក្រ សាន ហ្វេង (ខេមបូឌា) ខមភេនី លីមីធីត, វិទ្យាស្ថានបណ្ដុះបណ្ដាលកាត់ដេរកម្ពុជា (CGTI) ព្រមទាំងក្រុមហ៊ុនជ្រើសរើសកម្លាំងពលកម្មទៅប្រទេសជប៉ុន ក្រុមហ៊ុន មង្គល អេចអ៕ #MLVT #HENGSour